Vitendo 24:5-20

⁵Eyu munu‑yu timmonerera kuwa ndanganyifu na nsabwanyizi nkati ya Mayahudi piya mulumwengu‑mu. Visitoshe, iye ndi nkulungwa wa kundi ra waNazareti.

⁶Mpaka kafika kuyerera kufezeyi Nyumba Takatifu, fala tikinkola tikinfunga.

⁸Uwe mwanyewe ukindairi ukwijiwa kutunza ukweli kwa makosa atimmonerere.”

⁹Mayahudi newo wajumana kwakikisha vyakilongoperiwa vire kuwa vyakweli.

¹⁰Guvinadoru Felishi ire kantendera alama Paulu anze kusowera, basi Paulu akamba: “Omi nukwijiwa kuwa myaka mingi yawenye utilamulanga shariya noyi inti‑yi. Ndimana nirikotola mbere yako kwa kutumaini.

¹¹Kamba vyawijiwe mwanyewe, ukisaka ndairi asaka kuwa onse, epa rero suku ya kumi na mbiri tangu nikikwera Yerusalemu kuka kuntukuza Mwenyezimungu.

¹²Mayahudi awanisingane nikikaidiyana naye munu nNyumba Takatifu, wala awanisingane nikiwomanisa wanu nsinagoga wala mahala paasaka kuwa ponse nkaya mure.

¹³Ikisa tena, ewo awakikisha kuwa vyakweli vyawasema kuwa nikosa‑vi.

¹⁴Ila canitikiza kutenda kinu kimoja. Nifulata kundi ra Njira ya Insa, fala ewo wakwamba kuwa kundi ra walongo. Omi nintumika Mwenyezimungu wawantukuze wababu zetu. Nukwamini piya vyaandikiwe nTaureti na vyawandike minabii.

¹⁵Omi nirindira na nitumaini ka Mwenyezimungu kamba vyawantumaini ewo novyo, kuwa wenye shariya na ware sawana shariya wakuja kufufuka.

¹⁶Ndimana daima vinajibu moyo wangu usisusuke mbere ya Mwenyezimungu pamoja na wanu piya.

¹⁷Bandi ya myaka mingi yawenye, niludira inti yangu nilavye zaka na nitende kafara.

¹⁸Panikitenda javyo, nakwisa jambo ra kuswafi, waniwona nNyumba Takatifu, nemo siwere kaumu ya wanu, wala siwadimbwanye.

¹⁹Falakini nomo, wakiwapo Mayahudi wamojawapo wa Aziya. Ewo ndi wajuzi kuja mbere yako, wereze makosa angu ikiwa wawonerera kinu kimojawapo julu yangu omi.

²⁰Kuwasa ewo, ewa wari epa‑wa, wereze kamba waniwonerera kosa panimisiwe mbere ya Baraza ya kulamula.