Hechos 24:5-20

⁵Pues cani nacan quie benꞌ ni naquëꞌ benꞌ zëdi gula. Rdanëꞌ duz̃e yedyi layu rbionëꞌ yaca benëꞌ chopa cueꞌ de entre yaca benꞌ Israel. Lëzi naquëꞌ xanꞌ ja benꞌ nao xneza Jesús, benꞌ yedyi Nazaret.

⁶Pues reꞌennëꞌ utitunëꞌ idaoꞌ rnabëꞌra quiendoꞌ. Reꞌennëꞌ iquiëꞌnëꞌ benꞌ binaca benꞌ Israel luꞌe naꞌ. Pero lenaꞌ nacan z̃udyi gula según ca naca ley quiendoꞌ. Quie lenaꞌ bëxondoꞌnëꞌ ta reꞌenndoꞌ huendoꞌ justicia de acuerdo con cabëꞌ rna lëꞌë guichi ley quiendoꞌ.

⁷Pero biz̃i naꞌ cati blaꞌ comandante Lisias, a la fuerza begubanëꞌ bequiëꞌnëꞌ lëbëꞌ.

⁸Naꞌ unëꞌ de que yaca benꞌ rao lëbëꞌ xquia reyaꞌalaꞌ guidajëꞌ laoloꞌ ni. Quie lenaꞌ bablaꞌndoꞌ laole. Pues mejorla cuincazoꞌ uquëpiloꞌnëꞌ ta yetila diꞌidzaꞌ bixquienꞌ raondoꞌnëꞌ xquia. ―Canaꞌ una Tértulo gudyinëꞌ gobernador.

⁹Naꞌra yaca benꞌ Israel nitaꞌrë naꞌ, lëzi unayaquëꞌ de que tabala naꞌ ca una Tértulo.

¹⁰Caora naꞌ bë benꞌ naca gobernador seña conlë nëꞌë lao Pablo ta inezi Pablo ta sulaonëꞌ inënëꞌ huenëꞌ defender cuinnëꞌ. Naꞌ una Pablo rëbinëꞌ benꞌ naca gobernador: ―Legazi redaohuedaꞌ huaꞌ defender cuinaꞌ iniaꞌ laoloꞌ ni, porque nezdaꞌ azio zë iza nacoꞌ juez lao ja benꞌ Israel.

¹¹Naꞌ binegaca chipchopa dza bedyinaꞌ ciudad Jerusalén ta tzionlaꞌadyaꞌ Diuzi.

¹²Nitu ganu rnëliaꞌ, ni tazëdi biudilogaꞌ luꞌu idaoꞌ rnabëꞌra naꞌ, ni luꞌu yaca sinagoga, ni lao ciudad naꞌ, nitugazi. Pues nitaꞌ ja testigo quiaꞌ. Huanëyaquëꞌ chi nacan tali, chi binacan tali, con cabëꞌ rniaꞌ luëꞌ.

¹³Yaca benꞌ ni, bibi prueba decazi quiejëꞌ danꞌ raoyaquëꞌ nëꞌëdiꞌ xquia.

¹⁴Pero claro gula reꞌendaꞌ iniaꞌ luëꞌ de que rionlaꞌadyaꞌ Diuzi quie xuzixtaꞌondoꞌ, pero de modo tula, modo cubila. Benꞌ ni biraxeyaquëꞌ modo quiaꞌ nayaquëꞌ binacan dyaꞌa. Pero rnaohuaꞌ yugulu con cabëꞌ rnën lëꞌë guichi ley pcaꞌn Diuzi lao naꞌa xuzixtaꞌondoꞌ Moisés len con cabëꞌ rnën lëꞌë guichi bë yaca los demás benꞌ udixogueꞌ con cabëꞌ rna xtiꞌidzaꞌ Diuzi dza naꞌte.

¹⁵Rbezaꞌ idyin dza useban Diuzi yugu benꞌ huati, chi benꞌ bë tadyaꞌa, chi benꞌ bë tamedian. Quie lenaꞌ yugu dza, yugu yëla, rapaꞌ cuidado tacuenda taꞌa tu neza dyaꞌa, gaca yëri laxtaꞌohuaꞌ lao Diuzi, len lao yaca benëꞌ.

¹⁶Cala tuzaꞌ nëꞌëdiꞌ rbezaꞌ idyin dza useban Diuzi yaca benꞌ huati, dechanꞌ len zë ja benꞌ yedyi quiaꞌ, benꞌ Israel, rbezarëyaquëꞌ dza useban Diuzi yaca benꞌ huati.

¹⁷’Naꞌra como baguca zë iza rdaꞌa du yedyi quie ja benꞌ binaca benꞌ Israel, naꞌ bedyinaꞌ yedyi quiaꞌ ta huaꞌa yaca benꞌ yëchiꞌ nitaꞌ yedyi naꞌ caridad, lëzi ta udziꞌa gun quie idaoꞌ rnabëꞌra naꞌ.

¹⁸Naꞌra ude beyudyi bzuaꞌ diꞌidzaꞌ según ley quiendoꞌ tacuenda gacaꞌ benꞌ laxtaꞌo yëri lao Diuzi, bibi zëdi udilogaꞌ, biyetupaꞌ nu yaca benëꞌ. Zuaꞌ rudziꞌa gun quie idaoꞌ rnabëꞌra naꞌ cati dexaca tu chopa ja benꞌ Israel nëꞌëdiꞌ, benꞌ uzaꞌ yu nebaba Asia.

¹⁹Naꞌ yaca benꞌ dexaca nëꞌëdiꞌ luꞌu idaoꞌ rnabëꞌra naꞌ, reyaꞌalaꞌ guidajëꞌ niga tacuenda naꞌ chi gaoyaquëꞌ nëꞌëdiꞌ xquia. Pues a ver bi inayaquëꞌ chi de bi de quiejëꞌ conlë nëꞌëdiꞌ.

²⁰Naꞌ chi bisaqueꞌ guidajëꞌ, reyaꞌalaꞌ ina benꞌ nitaꞌ niga chi bedzelejëꞌ nu causa quiaꞌ cati zuaꞌ lao xanꞌ pxuzi len lao yaca los demás benꞌ rnabëꞌ quie benꞌ Israel.