1Kədəs ka Fɛstus dɔcɔm da dɛbɛ tataka ta maas, k’ɛyɛfɛ dare da Sesari kəkɔ ka Yerusalɛm.
2Aloŋnɛ apɔŋ kɔ afum alel a dɔtɔf aSuyif ŋaŋkɔ ŋabokɛnɛ nnɔ eyi mɔ, teta Pol.
3Kɔ ŋaŋgbəc ŋac-tola Fɛstus kəmar kəŋan pakɛrɛ Pol Yerusalɛm, mba kɔ ŋalompəs towul mpɛ ŋantam kədifɛ Pol dɔpɔ mɔ.
4Kɔ Fɛstus oloku ŋa a aŋcaŋər Pol dare da Sesari, a nkɔn yati pəmar pəkɔ di mata mamɔkɔ.
5K’endeŋər, «Afum acərɛ kəlok-loku aŋɛ ŋayi nu dacɔ mɔ, ŋasol kɔ ina, səkɔ. Kɔ fum wəkawɛ ɛnaləsər tes-ɛ, ŋakɔ ŋalɔm kəbokɛnɛ kəŋan dəndo.»
6Fɛstus ɛnacepərɛnɛ fɛ mata camət-maas, kɔ pəyɔnɛ fɛ ti-ɛ mata wəco Yerusalɛm, k’olukus dare da Sesari. Dɔckɔsɔk k’ɛndɛ dəŋkiti, k’osom a pakɛrɛ Pol.
7Ntɛ Pol ender mɔ, kɔ aSuyif aŋɛ ŋanator Yerusalɛm mɔ ŋaŋkɛl kɔ, kɔ ŋamboŋcɛ kɔ mes mɔpɔŋ mɛlarəm, mmɛ ŋanatɔ-tam kəsɔkəs mɔ.
8Pol oŋc-loku kəyacnɛ kɔn: «Ali tes iləsər fɛ! Iŋciya fɛ sariyɛ sa aSuyif, iŋciya fɛ kəlɔ kəpɔŋ ka Kanu, iŋciya fɛ Sesar.»
9Fɛstus, nwɛ ɛnafaŋ kəbɔtəs aSuyif mera mɔ, eyif Pol: «Məfaŋ kəpɛ Yerusalɛm pakɔ-kit’ əm di fɔr yem kiriŋ ba?»
10Kɔ Pol oloku: «Fɔr ya dəŋkiti da Sesar y’ iŋcəmɛ kiriŋ tantɛ, difɔ pəmar pakit’ im. Ali tes iləsərɛ fɛ aSuyif, pəmɔ tatɔkɔ məna yati məŋcərɛ ti mɔ.
11Kɔ pəyɔnɛ fɔ iŋciya, kɔ pəyɔnɛ fɔ iyɔ ntɛ o ntɛ pəmar padif’em mɔ-ɛ, ifɔtola a paŋaŋnɛn’ em. Mba kɔ pəyɔnɛ fɔ mes mamɛ amboŋc’ em mɔyɔnɛ fɛ kaŋce-ɛ, pəmar fɛ nwɛ o nwɛ pəsɔŋ im ŋa. Intola ti wəbɛ wəka tɔf ya Rom fəp pəkit’ im.»
12Awa Fɛstus, ntɛ ŋalip kəmɔmən mes mmɛ kɔ amar ɔn mɔ, k’oloku: «Ntɛ məloku a Sesar məfaŋ a pəkit’ əm mɔ, kəkɔ kɔ mənder Rom pəkɔ-kit’ əm.»
13Ntɛ mataka mɔlɔm məŋcepər mɔ, kɔ wəbɛ Akripa kɔ wəkirɛ kɔn Bernis ŋander dare da Sesari, kədeyif Fɛstus.
14Ntɛ ŋawak di kəwon mɔ, kɔ Fɛstus ɔlɔmər wəbɛ nwɛ teta Pol, pəc-loku: «Felikəs ɛnasak fum wəlɔma dəbili.
15Ntɛ inakɔ Yerusalɛm mɔ, aloŋnɛ apɔŋ kɔ abeki a dɔtɔf aSuyif ŋanabokɛnɛ tetɔn, ŋac-tola kədif kɔn.
16K’iloku ŋa a aRom ŋafɔsɔŋ fum kədif ta wəkayi ŋantatɛfərɛnɛ kɔ aboŋcɛ ɔn mes-ɛ, pəyacnɛ moloku mɔkɔ amboŋcɛ kɔ mɔ.
17It’ ɔsɔŋɛ ntɛ ŋatɔwon kəderɛnɛ nnɔ mɔ. Dɔckɔsɔk, k’indɛ dəŋkiti, k’isom a pakɛrɛ fum wəkakɔ.
18Ntɛ aboŋcɛ ɔn mes ŋander mɔ, ali tes ŋamboŋcɛ fɛ kɔ ntɛ inafɔtɔnɛ kɔ mɔ.
19Ŋaŋgbɛkəlɛnɛ kəgbɛkəlɛnɛ dəm teta dinɛ daŋan, kɔ teta Yesu wəlɔma, nwɛ efi mɔ, mba kɔ Pol nkɔn oloku a eyi wəyeŋ.
20Kɔ ina, ntɛ intɔcərɛ ntɛ indeloku teta mes ma dinɛ daŋan mɔ, k’iyif Pol, kɔ pəyɔnɛ oŋwosɛ kəkɔ Yerusalɛm pakɔ-kiti kɔ dəndo-ɛ.
21Mba Pol ontola ntɛ ɛfaŋ mɔ: A wəbɛ kosu wəlel pəkiti kɔ, it’ ɔsɔŋɛ ntɛ iloku a pacaŋər kɔ haŋ ic-tam kəkenɛ kɔ Sesar wəbɛ wəka tɔf ya Rom fəp.»
22Kɔ Akripa oloku Fɛstus: «Ina sɔ, ifaŋ kəcəŋkəl fum wəkawɛ.» Kɔ Fɛstus oloku: «Alna məŋcəŋkəl kɔ.»
23Dɔckɔsɔk Akripa kɔ wəkirɛ kɔn Bernis ŋanderɛnɛ asos ŋayesnɛ, kɔ ŋambɛrɛ nde dukulɔ dɔkɔ aŋkiti mɔ, kɔ abɛ apɔŋ asɔdar aRom, kɔ afum alel a dare. Kɔ Fɛstus osom k’aŋkɛrɛ Pol.
24Awa kɔ Fɛstus oloku: «Wəbɛ Akripa, kɔ nəna fəp fonu aŋɛ nəyi su dacɔ mɔ, nənəŋk fum wəkawɛ, tetɔn tɔ aSuyif alarəm akaŋɛ ŋambokɛnɛ nnɔ iyi mɔ. Kəyɛfɛ Yerusalɛm haŋ nnɔ, ŋac-kulɛ-kulɛ a pəmar fɛ pəyi doru.
25Kɔ ina, inəŋk fɛ ntɛ o ntɛ pəmar a padifɛ kɔ mɔ. Mba ntɛ nkɔn wəsərka ontola a wəbɛ kosu wəlel pəkiti kɔ mɔ, it’ iŋcɛm-cɛmnɛ kədekenɛ kɔ Pol wəkawɛ.
26Ntɛ intɔyɔ ntɛ o ntɛ tosoku tecicɛ wəbɛ kosu wəlel teta fum wəkawɛ mɔ, it’ iŋkɛrɛnɛ kɔ fɔr yonu kiriŋ, pənaŋkanɛ məna wəbɛ Akripa, nəyifət kɔ ntɛ tɔŋsɔŋɛ isɔtɔ tɔkɔ indecic mɔ.
27Bawo, pəwurɛn’ em kəyi samnɛ, kəsɔŋ kelmani pac-kekərɛ Rom ta məsɔkəs kəcic mes mɔkɔ amboŋcɛ kɔ mɔ-ɛ.»
