Womusu 94:4-21

⁴Wee be bɑ rɑ n tɔmbu kɔ̃sɑ kuɑmmɛ bɑ ɡɑri sɑɑrimɔ kɑ tii suɑbu.

⁵Yinni Gusunɔ, bɑ wunɛn tɔmbu dɑm dɔremɔ be, be bɑ sɑ̃ɑ wunɛn ɑrumɑni.

⁶Bɑ ɡɔminibu kɑ sɔbu ɡoomɔ. Mɑ bɑ ɡobekubɑ sɛ̃remɔ bɑ ɡoomɔ.

⁷Bɑ mɔ̀, Yinni Gusunɔ kun sun mɛɛrɑ. Gusunɔ Yɑkɔbun Yinni wi, kun bɛsɛn lɑɑkɑri mɔ̀.

⁸Bɛɛ ɡɑri bɑkɑsu, i n tii sɛ. Sere sɑɑ yerɑ̀ i ko i bwisi ko.

⁹Gusunɔ wi u tɔnu swɑsu ɡirɑ, wiyɑ kun kpɛ̃ u ɡɑri nɔ? Wi, wi u tɔnu nɔni ɡirɑ, wiyɑ kun kpɛ̃ u yɑm wɑ?

¹⁰Wi, wi u rɑ bwesenu sɛɛyɑsie, wiyɑ kun tɔnu sɛɛyɑsiɑmɔ? Wi, wi u rɑ tɔnu yɛ̃ru wɛ̃, wiyɑ kun bwisi mɔ?

¹¹Yinni Gusunɔ u tɔmbun bwisikunu yɛ̃. U yɛ̃ mɑ nu sɑ̃ɑwɑ kɑm dirum.

¹²Yinni Gusunɔ, doo nɔɔruɡiiwɑ wi ɑ sɛɛyɑsiɑmɔ. Doo nɔɔruɡiiwɑ wi ɑ seeyɑ kɑ wunɛn woodɑ.

¹³Wɑhɑlɑn sɑɑ sɔɔ, u ko n wɑ̃ɑwɑ bɔri yɛndu sɔɔ sere bu kɑ tɔn kɔ̃so suurɑ ɡbeɑ.

¹⁴Yinni Gusunɔ kun win tɔmbu derimɔ. U ǹ bu biru kisimɔ, be, be bɑ sɑ̃ɑ win ɑrumɑni.

¹⁵Domi ɡemɡiiwɑ u koo siribu di. Bèn ɡɔ̃ru ɡɑ dɛɛre kpɑ bu siri bi wurɑ.

¹⁶Wɑrɑ u koo mɑn sɑnnɑ tɔn kɔ̃sobun mi. Wɑrɑ u koo kɑ mɑn yinɑ kɔ̃sɑn kowo ben nɔmɑn di.

¹⁷Yinni Gusunɔ ù kun dɑɑ mɑn somi, nɑ n dɑɑ wɑ̃ɑ ɡɔribun wɑ̃ɑ yerɔ.

¹⁸Yinni Gusunɔ, nɑ̀ n bɑ̃ɑrimɔ, wunɛn duromɑ mu rɑ de nɑ n tɑ̃sɑ.

¹⁹Bwisiku dɑbinu nù n wɑ̃ɑ nɛn ɡɔ̃ruɔ, ɑ rɑ mɑn nukuru yɛmiɑsie. Kpɑ nɑ n nuku dobu mɔ.

²⁰Yinni Gusunɔ, mbɑ n bɛɛ mɔɔsinɛ wunɛ kɑ siri kowo tɔn ɡowo be bɑ rɑ n wunɛn woodɑbɑ ɡɛmɑ bɑ n tɔmbu dɑm dɔremɔ,

²¹kpɑ bɑ n nɔɔ tiɑ mɔ̀ bu kɑ ɡemɡibu wɔri. Kpɑ bɑ n tɑɑrɛ sɑriruɡibu tɑɑrɛ wɛ̃ɛmɔ.