Mboe 94:4-21

⁴Zin wal ta tikamam mbulu sananŋana na, kwon bok pa sua pakurŋana. Timap ma kalŋan izalla mi tipakurkur zitun zan.

⁵Yooba, zin tikamam pataŋana biibi pa wal ku. Pa zin wal ta itum peikat zin mi kam zin ma tiwe lem na, wal tana tiseseeze kat matan.

⁶Mi tipunun zin noroŋa mi moondo ma timetmeete. Mi zin wal ta tiwe leembe isu toono ti na, tikazas zin.

⁷Mi tikamam sua repiiliŋana pu ta kembei: “Aa, Yooba ire yam? Mbulu ta amkamam i, Anutu ki Yakop iute som.”

⁸Niom tina talliŋoyom kat! Leyom ŋgar sa som. Niom kankaanaŋoyom. Ŋiizi na kakam kat ŋgar?

⁹Parei, ni ta iur talŋoyom na, irao ileŋ sua tiom som? Mi ni ta iur motoyom na, irao ire mbulu tiom som?

¹⁰Ni ta ipazalzal zin karkari ta boozomen na, ko iŋgal motoyom som? Ni ta ipaute tomtom ta boozomen na, itunu le ŋgar som?

¹¹Yooba, ni iute ŋgar turkeŋan boozomen ta tomtom lelen iurur pa. Mi ni iute: Ŋgar kizin tana ŋono somŋana.

¹²O Yooba, tomtom ta so nu pazali mi paute i pa sua ku, na ni ko leleene ambai kat. Pa kampeŋana ku ko imbotmbot se kini.

¹³Wal ta kembei, sombe pataŋana sa indeeŋe zin, na irao tikam ŋgar boozo pa som. Pa nu itum ko kipiiri zin mi motom pizin ma irao kel naala pa zin wal sananŋan ma titoptop sula.

¹⁴Pa Yooba, ni irao ipizil ndemeene pa wal kini na som. Zin wal ta ni itunu ikam zin ma tiwe lene kek na, ni ko izem zin som.

¹⁵Tana ni ko iur zin peeze kan ambaimbaiŋan be tikam kat peeze mi tipombol mbulu ndeeŋeŋana. Mi wal boozomen ta lelen ŋgeezeŋan, nako tipombol mbulu ta kembei.

¹⁶Sombe tomtom tikam ŋoobo mbulu pio, na asiŋ ko ilae tio mi iuulu yo? Mi sombe zin wal sananŋan tiŋgal sua pio, na asiŋ ko imender pio? Tomtom sa som. Yooba itunu tau.

¹⁷Mibe Yooba iuulu yo som, so karau men mi aŋmeete mi aŋbot sula zin meeteŋan murin. Zin wal ta timbot lele tana na, tizzo sua mini som.

¹⁸Yooba, indeeŋe ta aŋyasipir mabe aŋtop pa urlaŋana tio na, muŋaiŋana ku ta ikis yo mi ikipiiri yo.

¹⁹Mi indeeŋe ta kopoŋ rru mi leleŋ ipata kat na, nu potor leleŋ ma ambai mini.

²⁰Zin peeze kan sananŋan ta timbutultul se tiiriŋana muriini kizin mi tiurur tutu ta ipasansaana zin tomtom na, nu gabgaaba zin? Som kat!

²¹Wal tana tilup zin mi timbuk sua be tikas zin wal ndeeŋeŋan ta len uunu sa isaana som na ma siŋ kizin ireere.