SALAMO 94:4-21

⁴Edia heaḡi herevadia e gwaurai momomu, kara havara taudia iboudiai na e hekokorokumu.

⁵Iehova e, emu bese taudia e moidia taomu, emu tano e hadikaiamu;

⁶vabu bona idau tauna e aladiamu, ihareha e aladia masemu.

⁷Idia na e tomu: Iehova ese se itaiamu; Iakob ena Dirava ese se laloamu.

⁸Lalo-duhu herea taumui e, ba diba. Kavakava taumui e, edena nega ai lalomui bae parara?

⁹Taia vada e ato Diravana na se kamonaimu a? Mata vada e kara Diravana na se itamu a?

¹⁰Bese idau-idau matadia e hakanimu Diravana na dava basine heni a? Taunimanima e ha-aonegadiamu Diravana,

¹¹Iehova, ia na taunimanima edia lalo-hadai dibana; ia dibana idia na hahodi tamona na heto.

¹²Iehova e, matana o hakaniamu tauna be namo, emu taravatu o hadibalaia tauna danu.

¹³Hekwarahi dinadia ai na laḡa-ani o heniamu, ela bona kara dika taudia iabidia rikirikina gurina baine heḡei.

¹⁴Badina be Iehova ese ena bese taudia na basine rakatanidia; ena tano danu basine rakatania.

¹⁵Badina be hahemaoro ḡoevaḡoevana ese kara maoromaoro taudia baine lou henidia, bona lalo-ḡoevaḡoeva taudia iboudiai ese bae ḡavaia.

¹⁶Daika baine tore isi, baine durugu, kara dika taudia ilao-ahudia? Daika baine gini tore, baine kahagu, kara havara taudia ilao-ahudia?

¹⁷Iehova basinema durugu, lau laumagu na asi reḡereḡena tanona bema hanoho haraḡa.

¹⁸Lau banava nato “Aegu e dedimu” negana ai, Iehova e, emu hebogahisi ese e dogogu tao;

¹⁹Ialogu e hekwarahi momomu negadia ai, emu tauhalo ese laumagu e hamoaleamu.

²⁰Lohia dikadia na oi ida bae hebou diba a? Idia ese edia taravatu amo dika e havaraiamu.

²¹Idia na e henega boumu, kara maoromaoro taudia edia mauri iabiohona totona; idia ese asi edia kerere taudia na e revadia mase.