Tukpɔɠaaleʋe Nuiti 19:2-20

²Kɛlɛ anzanui naa ɓɔɠɔ lɔɔni koloɠologi zu, é zeɠeni pɔ bɛ, é ɠale ma kɛɛɠɛ ʋɔ bɛ Ɓɛteleyɛme, é kɛɛni ná ga alu naanigɔ.

³Sinigi wuzeɠeni, é li pɔ bɛ, é ʋa ɓɔɛ pɔ, é ziila, é lii la. Ná-botiɠɛ zunu loungoi ɠɛni ba, ta soovale felegɔ. Anzanu loungoi naa lɛɛni kɛɛɠɛ ná-pɛlɛi wu, siɛgi zu kɛɛɠɛ zunui ɠaani la, é yeezeini bu ga koozunɛ.

⁴Nɛkoi, anzanu loungoi kɛɛɠɛ, naa yeeʋilini su, é yɛ naa ʋɔ bɛ, é kɛ ná ga folo saʋagɔ. Ti ɗa daamii wo, ti ɗa ɓɔɔle, ti ɗa ɲi ná.

⁵Foloi naanisiɛi, ti wuzeɠeni ga sobuzobui, Leevi nui ɠɛʋele ɓɛtɛni ga é li. Kɛlɛ anzanu loungoi kɛɛɠɛ ɠɛni nɛkoi ma: «Ani go mi, è zɛbɛ zɔlɔɔ, wa li niina.»

⁶Ti zeini, ti daamii wo, ti ɓɔɔle ʋɔɔma ti felegɔ. Naa ʋolu anzanu loungoi kɛɛɠɛ ɠɛni anza zinigi ma: «Deve, è ɲi ʋɛ, è yiilɛi.»

⁷Anza zinigi wuzeɠeni ga é li, kɛlɛ nɛkoi ɠilini ma, é kpidi ɠila kɛɛni ná mɔnɔ.

⁸Foloi lɔɔlusiɛi, é wuzeɠeni ga sobuzobui ga é li. Anzanui kɛɛɠɛ ɠɛni ma: «Nà è maanɛɛnɛzu, ani go mi, wo naa maaɓɔun, foloi gaayei.» Ti felegɔ pɛ ti daamii woni.

⁹Anza zinigi wuzeɠeni, ga ti li ta anzai nii é la ɠɛni fuluni ga zɔiti kɛʋele, ta ná-botiɠɛ zunu loungoi, kɛlɛ anzai kɛɛɠɛ ɠɛni ma: «Wɛlɛ foloi gaayeiɗa, woza lia, à ɲi ʋɛ, foloi lia. À ɲi ʋɛ, è yiiɠaalɛi, lina wa wuzeɠe ga sobuzobui, wo ʋilɛ pelei zu, è li ɗa-laazu.»

¹⁰Anza zinigi la ɠɛni pɔ ga é ʋa ɲi ná, é wuzeɠeni, é li. É zeelini Yeeɓuse ɠakalaʋɛ, nii é ga Zeeluzalɛme, ta soovale felegɔiti ti maaɠiliai, ta anzai nii é la ɠɛni vuluni ga zɔiti kɛʋele.

¹¹Siɛgi zu ti zeelini la Yeeɓuse, foloi wola liini niina. Botiɠɛ zunu loungoi ɠɛni maliɠii ma: «Ade li, de lati Yeeɓuse nuiti ta-laai tɛi ma, ade ɲi ná.»

¹²Maliɠii gooɠaaʋoteni, é ɠɛ ma: «Ɓa-o, ade la laazu zii ɠiligiti ta-laazu, ʋɛ Izelayɛle nu la ná, ada ɲiizu Giɓea.»

¹³É ɠɛni mɔnɔ ná-botiɠɛ zunu loungoi ma: «Ade li, de maaɓuɠa nuuma adaʋɛti ta ʋa, Giɓea ɓaa Lama, de ɲi ná.»

¹⁴Ti yɛni ziɛzu eyɛsu foloi da, siɛgi zu ti maaɓuɠani la Giɓea ʋa, nii é Ɓɛnzamɛn yooi zu.

¹⁵Ti latini eyɛsu ti zeeli miná, ti ɲi Giɓea. Leevi nui lɛɛni, é lo taa zaamaʋɛ. Nu nɔpɛ ge la ɠɛni suzoni, é ʋa daazuʋɛɛ ná-pɛlɛi wu, ga é ɲi ná.

¹⁶Gaaɓelasu, kɛwola ʋɔlɔi ta ʋaani kpɔkɔi, é zeɠe boti ɠɛɛzuʋɛ kpalagaʋɛ, zunui naa ɠɛni ga Efelayime ɠize yooi zu nui ta, é ɠɛni zeini Giɓea, kɛlɛ náʋɛ nuiti ti ɠɛni ga Ɓɛnzamɛn nuiti.

¹⁷É ɠaazuwuzeɠeni, é wɛɛin ɠa taa zaamaʋɛ. Kɛwolai ɠɛni ma: «Ɗa liizu mini? Ɗa zeɠezu mini?»

¹⁸É gooɠaaʋoteni, é ɠɛ ma: «Gá zeɠezu Ɓɛteleyɛme Zuda yooi zu, gá liizu Efelayime ɠize yooi ɠaaɓelazuʋɛ, miná ɠa gè zɔlɔɔni ná. Pàaʋɛ, gè zeɠe Ɓɛteleyɛme Zuda yooi zu, nà liizu Ɠɔoɠɔ GALAGI ná-pɛlɛi wu, kɛlɛ nu nɔpɛ ge la ná, nii é yeezeizu bù.

¹⁹Tama, tufai ɠa gi ya soovalegiti kɔnɔ fai zu, ta ɓului ɓalaa, ta dɔɔi, gi ʋɛ ga ànzai ta nà-botiɠɛ nui, gi ɓɛdɛ la ani nɔpɛ ba.»

²⁰Kɛwolai ɠɛni ma naazu: «Ziilɛigi ɠɛ è ʋɛ! Gè minazeɠea ga è-maavai pɛ, è la ɲia taa zaamaʋɛ.»