Soukapwüng 19:2-20

²Iwe, ülüpwülüan a song ngeni, a sü seni o liwiniti imwen seman mi nom Petleem lon Juta. A nom ikenan lon ükükün rüanü maram.

³Mürin, pwülüan we a ütä o feila mürin, pwe epwe fos pwetete ngeni o aliwinisefäli. Nge eman nöün chon angang me ruoman aas ra eti. Iwe, neminewe a emwenalong lon imwen saman, nge lupwen semen ewe föpwül a küna, a etiwa fän pwapwa.

⁴Mürin, semen ülüpwülüan we a pesei pwe epwe nom ren lon ükükün ülüngat rän. Ra mongö o ün, ra pwal pwinipwin ikenan.

⁵Iwe, lon arüanün rän ra pwätä lesosorusich, nge ewe mwän seni ewe ainangen Lefi a amolätä ngeni an epwe feila. Nge semen ewe föpwül a üreni pwülüen nöün we, “Kopwe chunuk me mwen om kopwe feila.”

⁶Iei mine ekewe ruoman mwän ra mottiu, ra mongö o ünfengen. Iwe, semen ewe föpwül a üreni ewe mwän, “Kose mochen kopwe pwal pwinini epwin o pwapwa.”

⁷Nge lupwen ewe mwän seni ewe ainangen Lefi a ütä pwe epwe feila, semen ülüpwülüan we a pesei tori a pwal pwinipwinsefäl.

⁸Iwe, lon alimuen rän ewe mwän seni ewe ainangen Lefi a pwätä lesosorusich pwe epwe feila. Nge semen ewe föpwül a üreni, “Kopwe chunuk o witiwit tori leolopal.” Iwe, ra mongöfengen.

⁹Nge lupwen ewe mwän me ülüpwülüan we pwal nöün chon angang ra ütä pwe repwe feila, semen ülüpwülüan we a üreni, “Nengeni, a arapakan epwe le lekuniol, kose mochen kopwe nonom rei pwal lon ei pwin. A arapakan epwe le pwinila. Kopwe pwinipwin ikei o pwapwa. Iwe, lesor kopwe pwätä lesosorusich o sai ngeni leniom.”

¹⁰Nge ewe mwän esap mochen pwinini pwal epwin. Iei mine a ütä, a feila o sai wenewen ngeni Jepus, iei Jerusalem, pwal nöün kewe ruoman aas mi uwou pisek me ülüpwülüan we ra eti.

¹¹Lupwen ra arap ngeni Jepus, a pwinila. Iwe, ewe chon angang a üreni an samol. “Ousipwe rik ngeni ewe telinimwen chon Jepus o pwinipwin lon.”

¹²Nge an we samol a üreni, “Apwi, sisap rik ngeni ewe telinimwen chon ekis, ir resap chon Israel. Nge sipwe feila Kipea.”

¹³A pwal üreni nöün we chon angang, “Ousipwe feila pwe sipwe achocho ngeni ach sipwe tori Kipea ika Rama o pwinipwin ie.”

¹⁴Iei mine ra feila won aler, nge ewe akkar a tuputiu, lupwen ra arap ngeni Kipea lon fanüen chon ewe ainangen Peniamin.

¹⁵Iwe, ra rik ngeni Kipea pwe repwe pwinipwin ikenan. Ra tolong lon ewe telinimw o mot lon ewe lenien amwicheich, nge esap wor eman a etiweer lon imwan pwe repwe pwinipwin.

¹⁶Lon ewe chök kuniolun, eman chinlap mwän a liwinto seni an angang lemäl. Wesewesen lenien ewe mwän won chukuchukutän ewe fanü Efraim, nge iei a nom lon Kipea. Nge chon ewe leni chon ewe ainangen Peniamin.

¹⁷Iwe, ewe chinlap mwän a küna ewe chon siamü lon ewe lenien amwicheich o aisini, “Ia ka feito me ie? Nge ia kopwe feila ie?”

¹⁸Nge ewe mwän seni ewe ainangen Lefi a pälüeni, “Äm aia feito seni Petleem lon Juta, pwe aipwe le feila ngeni chukuchukutän ewe fanü Efraim mi toauala, ia üa feito me ie. Üa feila Petleem lon Juta, nge iei üpwe liwiniti leniei. Iwe, esap wor eman a etiwaei lon imwan.

¹⁹A wor rei fetilipwas me enen nöüm aas. A pwal wor pilawa me wain fän itei, fän iten ülüpwülüei me nei we chon angang. Esap wor och am aia osupwang ren.

²⁰Iwe, ewe chinlap mwän a üreni, “Ngang üpwe pwapwa le etiwook lon imwei. Üpwe tümwünü ngonuk meinisin mine ka osupwang ren. Eu chök, kosap annut lon ei lenien amwicheich.”