1Tjuulalu nyakula Tiipananya wiyarringutjangka yunyparringu. Yiitjuku walytja tjuṯangku yularra Tiipananya mantjira katirra tjarrpatjunu, ngaṯingka. Tiipananya wiyarringutjangka, tjiṉṯu panyapangkaya Tiipanaku kuyarripayi tjuṯangku paluru tjana Yiitjuku walytja tjuṯa ngurrira pungkuyinangi. Yalatji pungkutjipingkamarra Yiitjuku walytja kutjupa tjuṯaya Tjarutjalumanya wantikatirra yanu ngurra kutjupa tjuṯawana. Yankulaya nyinangi manta Tjuutiyalawana, manta Tjamiriyalawanaṯarra. Yiitjuku waarrkana panyapa tjuṯa kutjuya Tjarutjalumala kutu nyinangi. Palulanguru Tjuulalungarri tjananya Yiitjuku walytja tjuṯa waaḻa tjuṯangka tjarrparra witirinangi. Tjana wati tjuṯa minyma tjuṯaṯarra tjananya witira katipayi tjiilakutu. Tjuulalu yalatji kuliṉingi, “Yiitjuku walytja tjuṯaya wiya kututja tjungurringkunytjaku. Ngayulu kuwarri witira tjananya katirra tjiilangka tjarrpatjunku, kutuya nyinarra waḻkuntjala.”
4Yiitjuku walytja tjuṯaya Tjarutjalumanya wantikatirra ngurra kutjupa kutjupa tjuṯawanaya yankula wangka Yiitjunyatjarra tjakultjurinangi.
5Pilipanya yanu manta Tjamiriyalakutu. Yankula tawunu tiṉangka tjananya nintiṉingi yalatji, “Yiitjunya yilta Kurayitjanya nyinangi. Katutjaku wangka watjalpayi tjuṯangku yirriṯi watjaṉu paluru mantakutu ngalyankula mayutju tiṉalampa nyinanytjaku.”
6Paluru tjana Pilipaku yunyparringkula palumpa wangka purinypangkulpiya kuliṉingi. Paluru Yiitjukuṉu ngangkaritjarrangku nyumpu tjuṯa, parralayitji tjuṯaṯarra palyalpayi. Mamutjarra tjuṯangka Pilipalu mamu payira wantirriyalpayi. Mamu tjuṯangku tjananya wantikatirra pakara yankupayi, palunyatjanu yaṉangulpi ngaṉṯi mamungku wantirra yankunytjala mirrapayi, mikintjarra.
8Tawunu palunya ngurrara tjuṯaya Pilipaku yunypalingku nyinangi.
9Tawunu palula wati kutju yini Tjaamananya nyinangi, ngangkaritjarra. Paluru tjanampa kutjupa kutjupa matjikingku palyalpayi, tjana nyakula palunya mayutju tiṉa puḻkapungkunytjaku. Yaṉangu tjuṯangku, mani tiṉatjarra tjuṯangkuṯarra palunya nyakula watjalpayi, “Palatja yilta ngangkari tiṉatjarra, paluru ilkari ngurrara nyinanyi.” Paluru walytjangkungku rikinarripayi, “Ngayulu ngangkari tiṉatjarrangku palyalpayi.” Paluru yalatji kutjupa kutjupa palyantjala paluru tjana kututja tjungurringkula nyakula yunyparripayi.
12Yaṉangu tjuṯangku Pilipaku wangka kulira Tjaamana palunyaya kulilwiyangku wantingulpi. Pilipalu tjananya watjaṉingi kutu, “Wangka Yiitjunyatjarra nyurrangarri kulintjala Katutjalu nyurrangarrinya ngulytjura purinypangku yaṉṯayaṉṯalku.” Paluru tjana Pilipaku wangka kulira Yiitjuku walytjarringu. Pilipalu tjananya wati tjuṯa, minyma tjuṯaṯarra kapingka papatatjimilaṉu.
13Tjaamana paluruṯarra Yiitjukuṉu wangka kulira palumpa walytjarringu, wati ngangkaritjarra paluru. Paluruṯarra papatatji mantjiṉu. Pilipalu ngangkari tiṉatjarrangku miiṉṯa tjuṯa mamutjarra tjuṯaṯarra palyantjala paluru nyakula Pilipalawana kutu parra yulytjapayi.
14Palulanguru Yiitjuku waarrkana tjuṯangkuya Tjarutjalumala tjakulpa kuliṉu, Tjamiriyanya ngurrara tjuṯangku Yiitjukuṉu wangka kuliṉutjangka. Yiitjuku waarrkana paluru tjana Piitanya Tjaananya pulanya wantirriyaṉu tawunu Tjamiriyalakutu.
15Yankulapula tawunu palula tjarrpangu. Yurrunpa Pilipalu tjananya papatatjimilantjala wiya Katutjaku kurrunpa tjanala tjarrpangi. Palulanguru ngaṉṯilpi tjanala Katutjaku kurrunpa wiya tjarrpangu. Piitalu Tjaanalu Katutjanya tjapiṉu, palumpa kurrunpa tjanala Yiitjuku walytja tjuṯangka tjarrpanytjaku.
17Paluru kutjarra tjanala mara tjunkunytjala katangka Katutjaku kurrunpalpi tjarrpangu tjanala.
18Tjaamana paluru nyangu Katutjaku kurrunpa tjanala tjarrpanyingka, Piitalupula Tjaanalu mara tjunanyingka. Tjaamanalulpi pulanya mani yungkukitjangku watjaṉu,
19“Nyupali ngayunya nintila!, ngayululpiṉa ngangkari tiṉatjarra nyinanytjaku, wati kutjupangka ngayulu mara tjunanyingka Katutjaku kurrunpa tjarrpanytjaku.”
20Piitalu wati palunya watjaṉu yalatji, “Wiya. Nyuntu wiyawanangku kuliṉi. Nyuntupa maningka wiyalinyatjun payimilantjaku. Katutjalu wiya palumpa ngangkari tjarrpatjunanyi yaṉangungku maningka payimilaṉingka, wiya. Ngula nyuntu mani palunyatjarra warungka kampamalpa.
21Nyuntun mungutja. Wiya nganaṉa tjungungku Katutjaku waarrka palyalku. Nyuntu wiya tjukarurru kuliṉi Katutjaku waarrka palyalkitjangku, nyuntu ngunytjinytju.
22Nyuntu Yiitjuku wangkaku tuunlayiki nyinanyi, nyuntu kuya palyalpayi yilta. Wiyawana kulira nyuntu kuya palyantjawiyangku wanti! Tjukarurru nyinakitjangku Katutjanya tjapilawarri!, paluru nyuntupa kuya waṉinytjaku.”
24Tjaamanalu nguḻurringkula palunya kutjarra watjaṉu, “Nyupali Katutjanya tjapilatju!, ngayunya warungka waṉitjipingkamarra.”
25Palulanguru paluru kutjarra yaṉangu tjuṯangka tjanala wangka Yiitjunyatjarra nintiṉu. Yalatji tjanala nintira Piitanya Tjaananya ngaṉṯikutu yanu, Tjarutjalumalakutu. Yankulapula wangka Yiitjunyatjarra tjakultjunkuyinangi, tawunu tjuṯawanangku, manta Tjamiriyalawanaṯarra.
26Tawunu Tjarutjalumala yulparirra manta yini Yitjiyupiyala wati kutju nyinangi. Manta palunya ngurrara tjuṯaku tjanampa kungka mayutju tiṉa nyinangi, yini Kantitjinya. Kungka paluru wati palunya watjaṉu, waarrka kamantaku mani witintjaku. Wati waarrkana paluru Tjarutjalumalakutu yanu Katutjanya waḻkuntjaku. Tjarutjalumala Katutjanya waḻkura wati paluru paaki timanatjarrangka yanangi ngurra walytjakutu ngaṉṯikutu. Wati waarrkana paluru paakingka yankula riitarririnangi Katutjaku wangka. Wangka palunya, Katutjaku wangka watjalpayingku, Yaatjayalu, yirriṯi wakaṉutja. Pilipanya manta Tjamiriyala nyinarra palyaṉingitjangka Katutjaku waarrkana ilkari ngurrarangku palunya yalatji watjaṉu, “Kuwarri, nyuntu Tjarutjalumalawana yankula yulparirralku yarra!, ruutu yungkiya panyapakutu. Ruutu paluru maa ngarrinyi Tjarutjalumalanguru tawunu Kaatjalakutu. Kuwarri paaki tjuṯa wiya ruutu palulawanaya yankupayi.” Pilipalu kulira ruutu palulakutu yanu.
29Ruutu palulawana yankula paaki nyangu yananyingka. Katutjaku kurrunpangku Pilipanya watjaṉu, “Yankula wanala paaki palatja!”
30Pilipalu tjalkaḻungkula wanara kulirinangi Katutjaku wangka paluru riitarrinkunytjala. Pilipalu mayutju palunya tjapiṉu, “Nintingkumpanu riitarringanyi wangka palatja?” Paluru watjaṉu,
31“Puṯuṉa riitarringanyi, kutjupangkuṉi nintintjaku.” Pilipanya wati paluru tjapiṉu paakingka kaḻparra nyinayinkunytjaku. Pilipanya kaḻparra tjungupula nyinayinangi.
32Katutjaku wangka mayutju paluru puṯu kulirinangi, yalatji ngarringu “Paluru, tjiipi nguwanpa ngaraku. Palunya, tjiipi nguwanpaya katiku, mirri pungkukitjangku. Tjiipi wiima wangkawiya ngarapayi, kutjupangku yinyu yinyuntjala. Tjiipi wiima nguwanpa paluru wangkanytjawiya ngaraku.
33Tjuṯangkuya palunya panypurangku. Paluru kuutawutjungka ngaranytjala wiyaya tjukarurrungku wangkaku, ngunytjinytjuya wangkaku yiluntankukitja. Paluru wiya miiṯatjarra nyinarra pipirri tjuṯa mantjilku, tjana palunya yiluntankuku.”
34Mayutju paluru wangka panyapa riitarriyinkula Pilipanya tjapiṉu, “Ngananyampa Katutjaku wangka watjalpayingku watjaṉu?, tjiipi nguwanpa katirra mirri pungkunytjaku?, tjinguru Yaatjayanya?, tjinguru yaṉangu kutjupa?”
35Pilipalu mayutju palula watjaṉu, “Wangka palunya yurrun yurrunpa tjunu Yiitjunyalanya nintilkitjangku. Yiitjunya yilta tjiipi nguwanpaya katirra yiluntanu.” Katutjaku wangka panyapa, Pilipalu palula riitarrirra nintirinangi, wangka Yiitjunyatjarra. Katutjaku wangka kutjupa tjuṯaṯarra paluru riitarriyinkula wati palula nintirinangi, Yiitjunya paluru mayutju tiṉa puntu kulira walytjarrinytjaku.
36Ruutuwanangkupula yankula nyangu kapilpi. Mayutju paluru Pilipanya tjapiṉu, “Karru ngaangka kapi yuru ngarrinyi. Nyuntuṉin ngayunya tjarrpatjunkula papatatjimilalku, yilta?” Pilipalu yuwa wangkangu.
38Mayutju paluru waarrkana watjaṉu paaki ngaratjunkunytjaku. Tjarukatirrapula kapingkalpi tjarrpangu. Pilipalu palunya tjarrpatjunkula papatatjimilaṉu.
39Kapingurupula ngalya kaḻpanytjala ngankirriwana Katutjaku kurrunpangku Pilipanya ngurra kutjupakutu katingu. Palunyatjanu wati palurura puṯu nyangu. Puṯura nyakula paakingka kaḻparra kutulpi yanu ngurrakutu. Paluru kulirinangi yunypangku Yiitjunya mayutju yilta.
40Pilipanya yankula tawunu Yatjutatjala yutirringu. Palulanguru tawunu tjuṯawanangku wangka Yiitjunyatjarra tjakultjurinangi. Yalatji tjakultjurinkula tawunu Tjiitjarriyalalpi tjarrpangu.
