Tamtama 11:1-11

¹Di pitar tar in kakaul tang, elar namin nanai ra di ser mak nami, ma di inanos iau lena, “Un nan ma un mak a rumu na etabor anun o God, ma a kabulu na tuntun etabor, ma un luk det ra det ser lotu tiro iai.

²Ikut un madek ru a dino nago upiso nisan a rumu na etabor, gong u maki. Uni di sa pitar tari torom a taro ra awu sur a taro anun o God, ra det in pas tataun a tamon anun o God elar nama wat na noino ma aru kalang.

³Ma an pitar tar a dekdek tan anung aru tene wasiso puaso un iau. Der in emar namin namalu na tobo, ma der in wasiso na poropet pas ara arip ma aru mar ma wonom na noino bung.”

⁴Aru tene wasiso puaso ri, der arin nanai na oliw ma aru turtur na lam, ra der tur umatan a Labino anun a rakrakon bual.

⁵Ra taio i nemi sur in ban laulau der, a sungun in nanpat tagun a wander ma in tun ru anunder a kum ebar. Ra taio i nem na ban laulau der in iru lenra.

⁶Aru musano ri der utur ukai a dekdek, sur der in turbat a bakut, sur gong a bato i puku una du bung ra der wasiso na poropet. Der utur ukai a dekdek, sur der in keles a kum danim sur a gap, ma der in rapus a rakrakon bual nama wur ngas na ukadik rop, una iso du bung ra der nemi.

⁷Ra der sa urop ru anunder a wasiso puaso, a kuabor na wewegua ra in nan toto gusun in labino tung ra katu tuktukino, in waim tomo nam der. In winim pas der ma in um doko ru der.

⁸Ma a minatinder in inep kut una kisapi ina labino tamon di watung larlari nam o Sodom ma o Ijip, a tamon ra di sak wati kai anunder a Labino iai.

⁹Ma a taro tagun a kum tamon rop, tagun a kum kamkabo taro rop, tagun a wur ngas na wasiso rop, ma tagun a kum gapman rop, det in tama a minatin der a tulu bung ma a kukur, ma ka det in mulaot sur din por der.

¹⁰Ma a taro tagun a rakrakon bual det in gas kut un asau ra di pami un der, det in ese anundet a gasgas nama etabor etetalai torom det, uni aru poropet ri der ukadik a taro una rakrakon bual.

¹¹Ikut numur tan a tulu bung ma a kukur, o God i wup tar a wuwu na nilaun un der. Ra der laun ma der tur, ma a labino nginara i los det ra det tama der.