1A tama ara labino ukinalong melet sapat una langit, ma a kisin doko uni. A wonom mawit na ensel det pam pas a wonom mawit na ukadik. A kum ukadik ra, a kum ururopino, uni a kankan anun o God i sot maragom.
2Ra a tama ara utna i tamtama elar nama tasi di pami nama galas ma di pam tomo i nama sungun. A taro ra det sa winim pas a kuabor na wewegua, ma a malalarino, ma a namba ina risano, det tur nisan a papor tasi ra, ma det pam a kum gita ra o God i sa pitar tari tandet.
3Det kele a kelekele anun o Moses, a tultul anun o God, ma a kelekele anun a Barman na Sipsip lena, “Labino o God u dekdek sakit, anum a kum pinapam det labo ma di kisin doko un det. Ui a King anun a taro tagun a kum gapman rop, anum a kum petutna det tokodos ma det lingmulus.
4Labino, osi ra ken ngara sur ui? Ma osi ra ken watung ulabo pas a risam? Uni ui kut u tasur. A taro tagun a kum gapman rop det in nanpat, ma det in lotu torom ui, uni anum a kum tokodos na pinapam i talapor rop torom a taro.”
5Numur a tamtama, ra a tama pas a rumu na etabor sapat una langit i sa papos taru. A rumu ra, i a rumu na sel ra i upuaso i lena o God i kis tomo nam anun a taro.
6A wonom mawit na ensel ra det pam pas a wonom mawit na ukadik det pirso gusun a rumu na etabor ra. Det emar nama kum wakak na malu ra det talapor ma det pilpil doko, ma det ker a kum romrobon det nama kum warus na gol.
7Numur ara tagun a wat na utna ra det laun i pitar tar a wonom mawit na dis di pami nama gol torom a wonom mawit na ensel ra. A wonom mawit na dis na gol ri det bukus nama kankan anun o God, o naro ra i laun tukum, ken rop ma ken rop.
8Ma a rumu na etabor i bukus nama mis tagun a minamar anun o God ma tagun a dekdekino. Ma kataio i pet lar pasi sur in ruk una rumu, tuk ra din pam sot pas a wonom mawit na ukadik anun a wonom mawit na ensel ra.
