Tamtama 10

1

2

3

4

5

6

7

8

9

10

11

12

13

14

15

16

17

18

19

20

21

22

¹Numur a tama ara dekdek na ensel bulung i wan pirso nanan tagisapat una langit. I emar nama bakut, ma in nongogol i kis lao taru netes unin lorino. In masarino i elar namin matanas, ma aru kikino i elar nama sungun ra i kunabor toto elar nama ru pos.

²I pam pas a nat na buk ra di ser puli, kura i papos una lamano. I utur tar a sot na kikino netes una tasi, ma a kair na kikino una piso.

³Ra i kukukuk namin labino walngano, i elar namin nalngan a laion. Ra i kakabo, a walngan a wonom mawit na pungpugur det wasiso.

⁴Ra a wonom mawit na pungpugur det sa wasiso rop pas, a ling na tumtumus, ikut a longoro in nalngan ara tagisapat una langit i watungi lena, “Gong u tumus ukai a kum wasiso ra a wonom mawit na pungpugur det sa watung tari, un pidik bati kut.”

⁵Ra a ensel ra a tama tari ra i tur taru netes una tasi ma una piso, i tulsu toto a sot na lamano usapat una langit.

⁶Ma i liliman nam o naro ra i laun tukum, ken rop ma ken rop, ra i ukis a bakut ma a kum utna rop ra det kis uni, a rakrakon bual ma a kum utna rop ra det kis uni, ma a tasi ma a kum utna rop ra det kis uni, ma i watungi lena, “Ka din balbalon melet mo.

⁷Una bung ra a ururop na ensel tagun a wonom mawit in ling sur in wup anun in tuwuru, din pam sot pas a utna na pidik anun o God, elar nami ra i sa watung tari tan anun a kum tultul, a kum poropet.”

⁸Numur in nalngan ara, ra a sa longoro tari tagisapat una langit i wasiso melet torom iau, i watungi lena, “Un nan ma un los pas a buk, ra kura i papos taru una laman a ensel ra i tur taru netes una tasi ma una piso.”

⁹Ra a wan torom a ensel, ra a saringi sur in pitar tar a nat na buk tang, ra di ser puli. Ma i watungi tang lena, “Los pasi, ra un nani. In mapak tiro ubalam, ikut una wam in namnamin elar nama polono tatos.”

¹⁰Ra a los pas a nat na buk gusun a laman a ensel, ra a wani. Una wang i namnamin elar nama polono tatos, ikut, ra a konomi, i mapak nin ubalang.

¹¹Ma di watungi tang lena, “Un wasiso na poropet melet una susut na taro tagun a kum tamon, tagun a kum gapman, ma tagun a wur ngas na wasiso, ma a susut na king.”