Apocanisi 11:1-11

¹Majoya Eyacuiñajjiya pea eyajo nequiya eya quia mee canaje acui eꞌipiaꞌajjajji. Ohuaya eya huohui canaje jama baꞌa: —Huani, ¡Eyacuiñajjija equi ipiaꞌajjacue! ¡Mei eꞌiya aa aquiana dahuajji peaꞌai ipiaꞌajjacue! ¡Dejja cuana jomajo nequi Eyacuiñajji bihuiajji peaꞌai sicocue!

²¡Jodio pojjeamaja eꞌanijji Eyacuiñajjija equi pejjejo ani aꞌa ipiaꞌajjajji! Jodio pojjeama cuaa Eyacuiñajjija epeejji cuana napa caje beshahua nei ebeca pee peaꞌai shequiajame, 42 baꞌime. Jodio ojaya epeejji cuana Eyacuiñajjija quea boti nee, ojaya Jenosanena cuiñajji quea boti nee jayojjaya.

³Eyaya ecuea becanejjijji peaꞌai esohui huohuijji huoojeaje dejja cuana huasijje ecuea esohui huohuiya. Eyaya oya cuana ecue sohui huohui meeje quea huiso cahuijo, 1.260 cahuime. Ohuaya pea daqui huosho caje, dejja emanoꞌyojo quea yeno nee nee poani jayojjaya. Jamajjeya ojjañaa ba caje ojjaña meshijo baꞌeca cuana quea nee nee poaje.

⁴Ma ecuea becanejjijji peaꞌai esohui huohuijji cuana beca onimo acui cuana jayojja. Oya cuana beca cuaquijiji nequijji Eyacuiñajji cojja nei nequi jayojja peaꞌai. Jamajjeya ojjañaa ba caje Eyacuiñajjiya oya cuana jaahuana cani.

⁵Eꞌe, onaa esohui huohuijji napa cajo cuaqui cuayani ojaya enabajje, o napajji poani quiyojeaje dejja mimishi cuana. Jamaya ojjaña manojeꞌyo, ma beca esohui huohuijji napajji poani.

⁶Eyacuiñajjiya jiquio esohui huohuijji quea caꞌa po mee cani. Jamajjeya ohuaya jama acajeꞌyo baꞌa: Eyacuiñajjija esohui huohuijji poaniya ohuaya ena chamaꞌ po mee cani. Quea jabo po mee cani. Ohuaya sa majje enaꞌ jayojja po mee cani cuei cuana, bae cuana peaꞌai. Ohuaya sa majje ojjaña cuana napa cani peaꞌai.

⁷Majoya jiquio beca esohui huohuijji cuaa huohui pajea majje, oe aquiana quea mase nee nee ma jjani ai quea doe neejo baꞌe poeje ma esohui huohuijji cuana cuiajeaa. Jeabichajea majje cuiajea cajeꞌyo.

⁸Oya cuana manoꞌyo majje jamatii jaaje ejiojjijo, Jenosanena cuiñajjijo. Ma cuiñajjijo pea cuaa yahuajo Jesosa, ese jaahuanajji acui ecueataꞌapeejo baꞌehuanasohuajea canaje. Dejja cuana Jenosanena cuiñajjijo baꞌeca quea mimishi poaje, ojjaña Sonoma meshijo yahuajo nei baꞌya poa jayojja, Ejito meshijo baꞌeca jayojjaya peaꞌai quea mimishi poaje.

⁹Jamajjeya quea mimishi poaniya jjejojo Eyacuiñajjija esohui huohuijji poani manoꞌyajo emojeajji pojjeama. Ejiojjijo tii oya jamatii jaajeaje pea beca peejjima cahuime. Ojjaña cuiñajjijo baꞌeca cuana, ojjaña pea esohuijo mimiani cuana ojjaña meshijo baꞌe peaꞌai poeje ma esohui huohuijji emanoꞌyojaa baa.

¹⁰Ojjaña dejja mase cuana quea bihui nee nee poaje ma esohui huohuijji manoꞌyonajejo. Jamajjeya aquiana quia caje onajaya epeejji cuana huasijje sosemaꞌ. Eꞌe, ma esohui huohuijjiya ojjaña quea mimishi poani napa canaje quea huiso cahuime. Jamajjeya o manoꞌyajo quea bihui nee poaje ojjaña mimishi cuana.

¹¹Jamatii pea beca peejjima cahuime poajo Eyacuiñajjiya ma beca esohui huohuijji shequi mee caje oꞌoya. Nequisohua mee caje oꞌoya peaꞌai. Jamajjeya ojjaña dejja mimishi cuana oya cuana eshe oꞌoya ba majje quea mete nee nee poaje.