Kraisgo Geme Dualali Sę Pedelabo Po Jonbolo Ola Mani 11:1-11

¹Te ensel mobo bidigo enabolo te usu ni sabo nai mani, te bilibo dono tiwai nai, tama agai enabolo te po wali, “Nage hodaloama, te usu sabo nigo te Godigo Moni Lotu Be tempel dali, tomode elalubo te Godibolo maiabo ofa nai ulubo sai dali te si usu sao. Tama nago te lotu be tomode bidiyu agabolo lotu po wabo we bidi augwali nedao.

²Tiali goli te lotu be bulu badu, te we bidi bilibo madi, te nago tagalao, tede nago usu nigo usu sigio. Te madi te Godigo po wali pisąwani we bidigo nogoba mawai dao, tama augwaligo te Tedali Wiegi Yai Hanu sągągo agayu, tama polua bidi sese si olama me si tama yaibao,” te po wai.

³Tama Godigo enabolo te po wai, “Eno po pusabo te bidi si tagala palaibao. Tama te bidi sigo gudubo ugwa te beg nigali nami ugwa tama gudulama, tama eno po augwali sigo pususu pidubadi te polua bidi sese si olama me badu nogo si te 42 polua bideibao, te tama polua dabede bidada pali sogo nedali usu nama te bidi sese hauwa mu wabo nogi te 1,260 ulade bidibo tiwai si tama bideibao,” te po wai dao.

⁴Te bidi si augwali te oliv ni si tiwai, te sole si tiwai me, te tigidali tǫ tonalubo Genuai Bidigo gesabidide dolalubo nai si dao.

⁵Tama bidi mebago augwali si dali dwai dene mabo sę ebo homu eyu da, augwali sigo pedauwalide te sia bogoli pedaliyu, tama te boi ebo bidi te siago dolaibao. Awe, bidigo dwai sę augwali si dali eyu da, te kolesagade naga te aga isaibao.

⁶Tama te bidi sigo te dagalu dąų walobo bomo elalubao. Tama te dagalu dąų olama, tama augwali sigo Godigo po pusubadi te tulubage tulugobeo. Tama augwali sigo bomogo te tigidali wę begelama kaneme pedalabo bomo elalubo. Tama te haniani dwai naigo te tǫde we bidi dolabo bomo me elalubao. Tigidali sogo augwali sigo homugo tama tiainogo eyu da, teda te augwali sigo te sę ebo usu yaibao.

⁷Te bidi sigo te Godigo po pusubo silibo si, tama te dwai hudigi ebo hasa te tǫ dedage page meni yai digi bidali tagaliyu, tama aga buluba eda holaibao. Tama holama tama agai te bidi si dali hwįaibao. Agai te bidi sigo bomo aiyaba elaluyu, tama te bidi si ela mueibao.

⁸Tama ela munama, tama te bidi sigo tigi te genuai hanu tomode te genuai po mibo pesagede olo munalueibao, te hanude polobadu augwali sigo Genuai Bidi te we bidigo ni pedaide dagana selama isali. Te genuai hanu nogi po digi pogo begelama tama nogi Sodom wabo, me nogi Isip wabo dao, te po digi pode.

⁹Tama bidi meba tigidali haniani tigi yai me, te tigidali tǫde, te haniani po wabo me, te tigidali bidi hani, augwaligo te bidi si tigi te sela sogo bidilama me sogo te giligade deli tama sogo te bidi si tigi te po mibo pesagede munalubo sueibao. Tama bidi meba augwaligo “Te bidi si pubulumainao,” te po waibao. Tiali goli gasa bidi dabego “Menio, tagalao,” waibao.

¹⁰Tama tǫde we bidi augwaligo te bidi si isalide augwali wiegi yai homu yaibao, tama augwali tęąbi eyu, nai tuyu, tama wiegi yai nai dabe dobu si yaibao. Magi baso meni. Te Godigo po pusali bidi sigo te tǫde bidibo we bidi tigidali dwai dene mawai dao.

¹¹Tama te sela sogo olama me deli sogo te giligade tama sogo silama, tama Godigo pedauwalidu mobo augwali sigo tigi tomoba ponai. Tama mobo ponama, tama te bidi si hodaloama doligulai. Tama te bidi si suali we bidi tigidali augwali wi mu yai.