1Numur a longoro in labino walngan ara tagisapat una rumu na etabor i watungi torom a wonom mawit na ensel ra lenri, “Mot in nan ma mot in lingis a wonom mawit na dis na kankan anun o God una rakrakon bual.”
2A mugano ensel i wan ma i lingis anun a dis na kankan netes una piso. Ma a kum laulau na inangon sakit, ra det tamtama sursurin, det wanpat una taro ra a ukinalong anun a kuabor na wewegua kura un det, ma det ser lotu torom a malalarino.
3A manru na ensel i lingis anun a dis netes una tasi, ra a tasi i keles sur a gap, elar nama gapin a musano ra i mat. Ma a kum utna rop ra det laun sa utasi det mat.
4A mantul na ensel i lingis anun a dis netes una kum danim, ma una kum matmatano danim, ra det keles sur a gap.
5Ma a longoro a ensel ra i tamtamabat a tasi ma a kum danim, i watungi lena, “God, ui u laun numugu ma u laun uniri, a Tasur na Musano ui, ui u tokodos, uni u warkurai lenri.
6Det sa um doko ru anum a taro ma anum a kum poropet, ma a gapindet i tilingis. I mo ra u sa pitar tar a gap torom det sur det in inum uni. I elar nama warkurai na minabalu torom det una anundet a sakino pinapam.”
7Ma a longoro in nalngan ara tagisapat una kabulu na tuntun etabor i watungi lena, “A lingmulus, Labino o God, u dekdek sakit, anum a kum warkurai det lingmulus ma det tokodos.”
8A manwat na ensel i lingis anun a dis netes unin matanas, ma di pitar tar a dekdek tan in matanas sur in tun a taro nama sungunino.
9Ma a labino mararongino, i tun a taro, ma det watung laulau a risan o God, i ra i pitar tar a kum ukadik ri, ikut ka det nukpukus ma ka det watung ulabo pasi.
10A manlimo na ensel i lingis anun a dis netes una kiskis na king anun a kuabor na wewegua, ra anun a matanitu i dumirum rop. Ma a taro det karot a kum karmendet una labino ngunungut ra,
11ma det watung laulau o God ra i kis sapat una langit, i kibino una labino ngunungut ma a kum laulau na inangon ra i kis un det, ikut ka det nukpukus gusun anundet a kum sakino petutna.
12A manwonom na ensel i lingis anun a dis netes una labino danim Iupretis, ma a danim i mamaso rop sur in waninar a kisapi sur a kum king tagitong una matmatano tobar.
13Numur a tama tulu laulau na nion detul tamtama elar nama tulin rokrok. Detul pirso tagun a wan in labino sui, a wan a kuabor na wewegua ma a wan a torotoro na poropet.
14Detul a tulu laulau na nion ma detul pam a kum ukinalong ma detul wan tuptupukus sur a kum king tagun a rakrakon bual rop, sur detul in ben tomo det sur a inaim una labino bung anun o God, i ra i dekdek sakit.
15“Tama i, an nanpat elar nama tene wolong. Osi ra i kis na tamtamabat ma i waninar anun a kum malu, i dan, sur gong i mengere ma i maimai.”
16Ma a tulu laulau na nion detul ben tomo tar a kum king una nubual di watungi nama wasiso Ibru Amagedon.
17A ururop na ensel i lingis anun a dis una maino, ma in labino walngan ara i pirso tagun a kiskis na king sapat una rumu na etabor, ma i watungi lena, “I sa rop!”
18Numur in nememe, a pungpugur, a rurung ma a labino guri sakit det wanpat. Turpasi ra o God i ukis tar a taro, katu guri utmakai lenri i wanpat taru una rakrakon bual. A labino guri ra, i dekdek doko.
19A labino tamon Babilon i terege sur a tulu nubual, ma a kum lamlabino tamon anun a taro tagun a kum gapman rop det terege rop. O God i nuk pas a labino tamon Babilon ma i pitar a kap na wain toromi sur in inumi. A kap ra i bukus nama karangop ina nun a kankan.
20A kum ailan rop det sa rorom ma a kum tangai kai, kataio mo i tama det.
21A labino bato na ais, tekteken nututu ino, a mautino i elar nama limo na noino kilogrem, i puku netes una taro. Ma a taro det watung laulau o God una ukadik na bato na ais ri, uni a ukadik ri i laulau doko.
