1A buk ri, a wasiso puaso anun o Iesu Karisito, ra o God i pitar tari tano, sur in ese tar anun a kum tultul una kum utna ra milau in nanpat. O Iesu i tulu ru anun a ensel torom anun a tultul o Jon, sur in wasiso puaso una kum utna ri tano.
2O Jon i wasiso talapor una kum utna rop ra i sa tama tari. Iri a kum utna ra: a wasiso anun o God, ma a wasiso talapor anun o Iesu Karisito.
3Osi ra in luk a kum wasiso na poropet ri, in dan. Ma det ra det in longoro a kum wasiso ri, ra di sa tumus tari, ma det in muri, det kai det in dan, uni i sa milau sur a kum utna ri in nanpat.
4Iau o Jon, a tumtumus torom mot a taro na lotu una wonom mawit na tamon tong una papor Asia. A marmaris ma a malmal torom mot tan o naro ra i laun numugu, i laun uniri ma numur in nanpat, ma tan a wonom mawit na nion kai ra det tur numugu tan anun a kiskis na king,
5ma tan o Iesu Karisito, i a lingmulus na tene wasiso talapor un o God, ma a mugano tandet ra det in laun melet gusun a minat, ma a mugumugu anun a kum king una rakrakon bual. I maris dat, ma i ulangolango pas dat gusun anundat a kum sakino petutna nama gapino,
6ma i ubek tar dat sur dat in warkurai tomo nami una nun a matanitu ma sur dat a kum tene etabor torom o Tamano, i ra o God anunu. Dat a kum tene etabor sur dat in papam torom o God. A minamar ma a dekdek rop i kis un o Iesu Karisito, ken rop ma ken rop. Amen.
7Tama i, i wan pirso nama kum du bakut, ma a matan a taro rop det in tama i, ma det utkai ra det so tari nama bele. Ma a kum kamkabo taro rop una rakrakon bual det in tangis, kibino uni. In nanpat ut lenra. Amen.
8A Labino o God i watungi lena, “Iau a Alpa ma a Omega, ra a laun numugu, a laun uniri ma numur an nanpat, ma a dekdek sakit.”
9Iau o Jon, a tisimot ma a pasamot ra dat tur tomo una kum ngunungut, ma una matanitu anun o God ma una tuntunur dekdek ra dat taramo a ngunungut, uni dat anun o Iesu. A kis na karabus una ailan Patmos, uni a warawai nama wasiso anun o God ma nama wasiso talapor anun o Iesu.
10Una bung anun a Labino, a bukus nama Tokodos na Nion, ma tong numur tang, a longoro in labino walngan ara, i elar namin tuwuru.
11I watungi lena, “Asau ra u tama i, un tumus ukai i una buk ra di puli ma un pitar ru i utong torom a kum tene lotu una wonom mawit na tamon ri: o Epeses, o Smerna, o Pergamum, o Taiataira, o Sardis, o Piladelpia ma o Laodisia.”
12A tur tupukus sur an tama o naro ra i wasiso torom iau. Ra a tupukus, a tama a wonom mawit na turtur na lam na gol.
13Ma epotor tan a kum turtur na lam, a tama ara i “elar nama Nutun a Musano,” i emar namin walos na malu i walos pirso tuk ut una aru kikino, ma i ker a romrobono namin narus na gol.
14In lorino ma a iwu na lorino der kabang doko elar nama iwu na sipsip, ma i elar kai nama busu na top, ma arin nikiok na matano der elar nama kunabor ina sungun.
15Aru kikino der talapor elar nama bras ra di sa tun talapor tari una sungun, ma in nalngano i elar nama wungu ina danim ra i noro.
16I pam pas a wonom mawit nin nangnang una sot na lamano, ma in totok na inaim ra aru paporino rop der wangon doko, kura uwano i gom pasi. Ma in masarino i pilpil elar namin matanas ra i talapor doko.
17Ra a tama i, a puku pirso taru nisan a aru kikino elar nama minat. Numur i ubek tar a sot na lamano sapat netes un iau, ra i watungi lena, “Gong u ngara, iau a mugano ma a ururopino.
18Iau a laun. A sa mat pas, tama i, a sa laun tukum ma a pam ukai a kum ki ina minat ma ina tamon Edes, a tamon anundet ra det mat.
19“I mo ra un tumus a kum utna ra u sa tama tari, a kum utna ri i wanpat ma a kum utna ra in nanpat numur.
20Iri a kukurai ina utna na pidik tagun a wonom mawit nin nangnang ra u sa tama tari una sot na lamang, ma a wonom mawit na turtur na lam na gol: A wonom mawit nin nangnang ra, i tur ukinalong a kum ensel anun a taro na lotu una wonom mawit na tamon, ma a wonom mawit na turtur na lam ra, i tur ukinalong a taro na lotu una wonom mawit na tamon.
