Tamtama 2

1

2

3

4

5

6

7

8

9

10

11

12

13

14

15

16

17

18

19

20

21

22

¹“Un tumtumus torom a ensel anun a taro na lotu tong o Epeses lena: O naro ra i pam a wonom mawit nin nangnang una sot na lamano, ma i wan epotor una wonom mawit na turtur na lam na gol, i watung a wasiso ri:

²A tasman anumot a kum pinapam ma anumot a kum dekdek na pinapam, ma anumot a tuntunur dekdek ra mot taramo a ngunungut. A tasmani lena ka mot madek tar a kum sakino taro. Ma mot sa lar tar det ra det warango det lena, det a kum aposel, ikut awu sur det a kum aposel mulus, ma mot sa tama lele tar det lena, a kum tene torotoro.

³Mot sa taramo a ngunungut, uni mot mur iau, ma a pinimot ke ngoro, mot tur dekdek ut.

⁴Ikut a takun mot una utna ri: Ka mot nem iau mo elar nami ra numugu mot nem iau.

⁵Mot in nuk pas anumot a wakak na kinkinis sakit ra mot sa puku taru gusuni! Mot in nukpukus, ma mot in pam melet a kum pinapam ra numugu mot ser pami. Ra ka mot in nukpukus, an nanpat torom mot, ma an rakon ru anumot a turtur na lam gusun a kinano.

⁶Ikut ara utna ri mot pami, i wakak: Mot nget a kum pinapam anun a taro ra det mur a etowo anun o Nikolas, ra iau kai a ngeti.

⁷Osi ra arin talngano kura, i wakak sur in longoro a wasiso ra a Tokodos na Nion i watungi torom a kum lotu. Osi ra i winim pas a inaim, an mulaot pasi sur in nangon tagun in nanai na nilaun, ra kusapat una Paradais anun o God.

⁸“Un tumtumus torom a ensel anun a taro na lotu tong o Smerna lena: O naro ra a mugano ma a ururopino, i ra i mat pas, ma i sa laun melet, i watung a wasiso ri:

⁹A tasman a kum ngunungut ra i monong mot, ma anumot a kinkinis na pot na marmaris, ikut mot a kum tene gongon mot! A tasman a kum du emang ra ara taro det watungi un mot. Det ra, det watungi lena, det a kum te Juda, ikut awu, det tagun o Satan.

¹⁰Gong mot ngaran a kum ngunungut ra milau mo in monong mot. Tama i, o Satan in uruk tar a ramano taro tagun mot una karabus sur in lar mot, ma mot in taramo a ngunungut una noino bung. Ra a taro det nem na um doko mot, mot in tur dekdek ut una numot a nurnur, ra an pitar tar a nilaun torom mot elar nami ra di pitar a ikul torom taio ra i winim pas a kinalabor.

¹¹Osi ra arin talngano kura, i wakak sur in longoro a wasiso ra a Tokodos na Nion i watungi torom a kum lotu. Osi ra i winim pas a inaim, a manru na minat ken ban laulau i.

¹²“Un tumtumus torom a ensel anun a taro na lotu tong o Pergamum lena: O naro ra anun in totok na inaim aru paporino rop der wangon doko, i watung a wasiso ri:

¹³A tasman a tamon ra mot kis iai, a tamon ra o Satan i sa kis na king iai. Ikut mot tur dekdek un iau, ma anumot a nurnur ke wan gisen gusun iau. Mot pami utkai lenra una kilalo ra di um doko o Antipas. I ra anung a lingmulus na tene wasiso talapor, ra di um doko i una numot a tamon, ra o Satan i kis iai.

¹⁴Ikut a takun mot una kum utna ri: Ara taro ra kura det epotor tamot, det sa mur a etowo anun o Balam, i ra i ususer o Balak sur in usobor a taro Israel ma det pam a sakino petutna, ra det wan a utna na inangon di etabor nami torom a kum torotoro na god, ma det pam a kum petutna na pamuk.

¹⁵Lenutkai ra ara taro tagun mot det sa mur a etowo anun o Nikolas.

¹⁶I mo ra mot in nukpukus! Ra awu, an nanpat lakit torom mot, ma an waim nama taro ra det mur a etowo anun o Nikolas, namin totok na inaim ra kuri uwang a gom pasi.

¹⁷Osi ra arin talngano kura, i wakak sur in longoro a wasiso ra a Tokodos na Nion i watungi torom a kum lotu. Osi ra i winim pas a inaim, an tabori nam lako mana ra i kis eno. Ma an tabori kai nama kabang na wat, ra di sa tumus tar a matok na rising uni, ra katutaio i tasmani. O naro sot kut, ra an pitari tano, in tasmani.

¹⁸“Un tumtumus torom a ensel anun a taro na lotu tong o Taiataira lena: A Nutun o God, ra arin nikiok na matano der elar nama kunabor ina sungun, ma aru kikino der talapor elar nama bras ra di sa tun talapor tari una sungun, i watung a wasiso ri:

¹⁹A tasman anumot a kum pinapam, anumot a marmaris, anumot a nurnur, anumot a pinapam na warut a taro, ma anumot a tuntunur dekdek ra mot taramo a ngunungut. A tasmani lena anumot a kum pinapam uniri, det labo taun a kum pinapam ra mot pami numugu.

²⁰Ikut, a takun mot una utna ri: Ka mot lu ru o Jesabel, a ino ra i watungi lena i a poropet. I ususer raro anung a kum tultul, sur det in pam a kum pamuk na petutna ma sur det in nan a utna ra di sa etabor taru nami torom a kum torotoro na god.

²¹A sa pitar tar a du bung tano sur in nukpukus uni gusun anun a kum pamuk na petutna, ikut ke nemi.

²²An pitar a labino misait tano, ra in ser inep kut una bano. Ma det kai ra det pam a pamuk na petutna tomo nami, ma ka det nukpukus gusun a petutna ra anun o Jesabel, an pitar a dekdek na ngunungut torom det.

²³Ma an um doko a kum nutnutun o Jesabel, sur a taro na lotu rop det in tasmani lena, a tasman a balan a taro ma a nuknukin det rop, ma an balu i torom mot taktakai elar ut nam anumot a kum pinapam.

²⁴Ikut ara taro kai tagun mot tiro o Taiataira ka det mur a kum etowo anun o Jesabel, ma ka det mur a kum utna ra ara taro det watungi nama ‘kum utna na pidik anun o Satan ra i madu doko.’ A watungi tamot lena, kan ubek melet tar tu maut netes un det.

²⁵A kum sau rop ra mot sa utur ukai i, mot in tur dekdek uni tuk ra an nanpat.

²⁶Osi ra i winim pas a inaim ma i pam sot pas anung a nemnem tuk una ururopino, an pitar tar a warkurai tano, lenutra o Tita i pitar tar a warkurai tang. An pitar tar a warkurai tano, sur in warkurai sur a taro tagun a kum gapman rop. ‘In warkurai dekdek det namin nubuku na aen, ma in gino det elar nami ra di pagol ginogino a kuro ra di pami nama piopap.’

²⁸Ma an tabori kai namin borodo.

²⁹Osi ra arin talngano kura, i wakak sur in longoro a wasiso ra a Tokodos na Nion i watungi torom a kum lotu.