Taha Bapare Sâcmutâc 10:5-13

⁵Iŋuc mume jahe rarâ qâŋɋâŋ jahe ŋaqi‐jekiczi foŋjofarâ Mosezi mutâcne‐jactewec irec sâcko hae râpenao reŋjofa hupic.

⁶Eme Mose e Aroŋ â ŋokâ jahec‐ticne Eleaʒa â Itama jaŋe ʒiŋuc jazawec: “Ŋoŋe hâmonʒipiŋte â Wofuŋzi kikefuŋ aaric mana‐jarezacte qizec susuc‐ŋeŋic behepie mi ʒorazejec â ŋaqi‐ŋeŋic wâc mi bâsuckenʒepieŋ. Qomâfâc‐ŋeŋic Israe kikefuŋ hâcne jaŋe ine Wofuŋzi manaha ʒoc fuarâ ŋic jahe ʒâseŋ‐jofawec irec ki soŋgâŋ ezo murâ enʒepieŋ.

⁷Ŋoŋe Wofuŋzi wokemaŋ rua‐ŋarewecte, me hâmonʒipiŋte tutumaŋ qoruc bozere motâc beherâ mi hunʒepieŋ.” Eme Mosere dâŋ reŋkehuc iŋuc embiŋ.

⁸Eme Wofuŋ e Aroŋ dâŋ kecʒiŋuc muhuc âzâcnewec:

⁹“Go mecne, ŋokâfâcge mecne, ŋoŋe hâmonʒipiŋte tutumaŋ qoruc bozeo raʒizo murâ waiŋ me opâ sanaŋ gâcne moc mi nânʒepieŋ; dâŋsanaŋ i mimiŋzi ɋâric bajunʒepieŋ.

¹⁰Ŋoŋe wiac tirine â omane erâ wiac ɋaɋacne â wâwânâŋhec i ʒâŋitarâ mana wosâenʒepieŋ.

¹¹Ehuc noni Mose dâŋsanaŋ âzâcne mutâc epe mufua‐ŋarewec i Israe ŋic ŋokac qazu‐jare‐fârenʒepieŋ.”

¹²Eme Mose e Aroŋ â ŋokâfâcne jaŋeraonec jajahec sawa jupic, Eleaʒa â Itama jaŋe ʒiŋuc jazawec: “Ŋoŋe taha bâzi Wofuŋte biŋe rikepie tiwâne foekac i wâc tirine jâmbâŋ ekacte rorâ alata heririŋko goreŋ tâmiric nânʒepieŋ.

¹³I Wofuŋte biŋe rikekicnaonec go â ŋokâfâcge ŋoŋere biŋe qakicnere tiri haeo nânʒepieŋ. No iŋuc hâcne mutâcne‐narekicne.