Taha Bapare Sâcmutâc 2

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹“Moc e Wofuŋ taha bacneocte taha bâzi râezo murâ ine poroŋ uucne râecnezejec, ehuc wokemaŋ fainao hoŋkehuc wiac âsu biaŋ ʒuhuckezejec.

²Iŋuc erâ Aroŋ ŋokâfâcne taha bapa jaŋerao barazejec. Eme jaŋeraonec moczi wiac irecnec poroŋ uucne â wokemaŋ me fufusuc jaha rorâ wiac âsu biaŋ sasawa ihec alata faio ʒocko rike siŋsiŋkeme Wofuŋte maio âsu biaŋ fuazejec.

³Taha bâzire nâfocne izi ine Aroŋ â ŋokâfâcne jaŋere biŋe ezejec, i Wofuŋte taha bâzi rikepie wiac tirine jâmbâŋ ewec irec nâfocne hâcne.

⁴“Ŋoŋe taha bâzi ofeŋ maŋnao rikekicne tahare biŋe râezo murâ ine poroŋ uucne goreŋ tâmiric wokemaŋ opânehec bâsifuckekicne me poroŋ goreŋ tâmiric wokemaŋ opâ ruacnekicne i râenʒepieŋ.

⁵Me taha bâzi ofeŋ fainao rikekicne tahare biŋe râezo murâ ine poroŋ uucne goreŋ tâmiric wokemaŋ opânehec bâsifuckekicne râenʒepieŋ.

⁶Ŋoŋe poroŋ bâfâuckepie piic piic eme wokemaŋ ruacnenʒepieŋ. Iŋuc epie taha bâzi eocmu hâcne.

⁷Me taha bâzi‐ŋeŋic ʒocrâqâcko rikekicne tahare biŋe râezo murâ ine poroŋ uucne jaha wokemaŋ opânehec bâsifuckerâ rikenʒepieŋ.

⁸Erâ taha bâzi wiac izi bakicne i Wofuŋtao baranʒepieŋ, ehuc taha bapa râcnepie alatao râezejec.

⁹Erâ taha bapa e taha bâzi nâfocne rorâ alata faio ʒocko rike siŋsiŋkeme Wofuŋte maio âsu biaŋ fuazejec.

¹⁰Taha bâzire tiwâne ine Aroŋ â ŋokâfâcne jaŋere biŋe ezejec, i Wofuŋte taha bâzi rikepie tirine jâmbâŋ ewec irec nâfocne hâcne.

¹¹“Ŋoŋe Wofuŋte biŋe taha bâzi râezo murâ goreŋ tâmiric banʒepieŋ. Ŋoŋe goreŋ me baŋac wiac Wofuŋ taha bacnehuc ʒocko moc mi rikepie ʒazejec.

¹²Wiac iŋucne i Wofuŋte biŋe râezo murâ nânâ nânâsu dameŋko taha râeeŋgopieŋ irec sâc râenʒepieŋ, âsu biaŋ fuaocte ine alata faio mi rikenʒepieŋ.

¹³Ŋoŋe taha bâzi wiac‐ŋeŋic râezo murâ hâwec hefârenʒepieŋ. Anutuhec ʒâʒâfic ekicne irec hâwec i behepie taha bâzi‐ŋeŋic nocne mi ezejec. Aricne taha bâzi wiac‐ŋeŋic sasawa i hâwec hefârehuc râenʒepieŋ.

¹⁴“Ŋoŋe gie ɋârionec jacgoŋ taha bâzire biŋe Wofuŋ râcnezo murâ ine hazecne moc ʒocko rikekicne me ɋâricne banʒaŋnekicne râenʒepieŋ.

¹⁵Ehuc wokemaŋ opâne hoŋkepie ruacnezejec. Erâ wiac âsu biaŋhec ʒuhuckenʒepieŋ, iŋuc epie taha bâzi eocmu hâcne.

¹⁶Eme taha bapazi hândâŋne banʒaŋnekicne â wokemaŋ irec nâfocne, erâ wiac âsu biaŋhec sasawa i rorâ rikeme ʒazejec. Iŋuc eme Wofuŋte taha bâzi rikekicne eocmu.