1“Ŋic moc e ŋic âgo‐ticnezi wiac repicne ebac eme hone manac erâ mi mufuaocmuo ine kiŋ hotâckeocmu.
2Me ŋic moczi wiac wâwânâŋne, qowi mimicne me hae qowi jaŋere qâŋɋâŋ me wiac babarâ jueŋgopieŋ jaŋere qâŋɋâŋ moc mi mana tarahuc ba bâuac erâ wâwânâŋhec ehuc kiŋ bâfuaocmu hâcne.
3Me ŋic moc e ŋic âgofâc‐ticne wiac repicne izi me izi bâpuriŋ‐jopaha qanaŋ mi mana tarahuc he heuac ejareocmu mecne, ʒâhec ine mana tarahuc ʒiŋuc muocmu: No kiŋhec ekopac hâcne.
4Me ŋic moczi wiac biaŋne me sâqocne ebac eocte mi mana tarahuc acmâc jaha mupaŋkeocmu mecne, ʒâhec ine fuŋne‐ticne mana tararâ kiŋhec ekopac muocmu.
5Ŋic moc e wiac i me i ehuc kiŋ bâfuaocmuo ine sâqocne bâfuawec i mufuazejec.
6Ehuc sâqocne bâfuawec irec kiŋ tatarare bâzi Wofuŋtao râezejec. Lama me noniŋ ŋokacne moc sâqocne tâtâmire taha râezejec hâcne. Eme taha bapazi sâqocne‐ticnere erâ kiwiric‐ticne rozejec.
7“Me lama moc mi focnekacko ine sâqocne bâfuawec irec kiŋ tatara tahare biŋe hapâ jajahec me buni jajahec Wofuŋtao râec‐jofazejec. Moc i sâqocne tâtâmire tahare biŋe ehame moc i qowi bâzire biŋe ezejec.
8E wiac i taha baparao râezejec. Eme eki hapâ moc i sâqocne tâtâmire tahare biŋe râezejec, ehuc upene mâc ʒâkiriŋkerâ mi hetâcnezejec.
9Erâ soc gâcne rorâ alata tambaraŋnao tiehuc nâfocne ine alata fuŋnao hesiezejec. Iŋuc eme sâqocne tâtâmire taha eocmu hâcne.
10I tarame hapâ moc mumutâc dâŋte sâcko qowi bâzire biŋe râezejec. Taha bapa e ŋic sâqocne bâfuawec ere kiwiric rome sâqocne bâbâtâmire fuacnezejec.
11“Me ŋic hapâ jajahec me buni jajahec moc mi jucnepie ine sâqocne bâfuawec irec sâqocne tâtâmire tahare biŋe poroŋ uucne amae 10‐konec wâŋ râezejec. Sâqocne tâtâmire taha ekacte wokemaŋ opâne me wiac âsu biaŋhec moc mi ʒuhuckezejec.
12E wiac i taha baparao bafisime eki hosâc âsure biŋe me fufusuc jaha rorâ alatao bâzi gâcne Wofuŋte biŋe ʒahuc fokac irec fainao rikezejec i sâqocne tâtâmire taha ekac hâcne.
13Taha bapa eki ŋic e wiac i me i ehuc sâqocne bâfuawec ere kiwiric rome sâqocne tâtâmire fuacnezejec. Ehame taha bâzire ekicne sâc ijaha ehapie poroŋ tiwânezi taha bapare biŋe ezejec.”
14Wofuŋzi Mose dâŋ ʒiŋuc âzâcnewec:
15“Ŋic moczi mi mana tarahuc wiac moc Wofuŋte biŋe bâtirikicne i sâctiri râeocmu ine kiŋ tatara tahare biŋe lamafâc‐ticne jaŋeraonec ŋicne biaŋne moc Wofuŋtao râezejec. Furi‐ticne ine tiri ficte siliwa moneŋ fokac irec sâcko muzemec, wiac i kiŋ tatarare taha hâcne.
16Wiac bâtirikicne sâckoa mi râewec irec okacne bârisiezejec, erâ i sawa mâcne, wiac fiuc rowec irec 5‐konec wâŋ ʒuhuckerâ taha bapa râcnezejec. Eme taha bapa e lama ŋicne kiŋ tatara tahare biŋe râehuc kiwiric jâoc rome sâqocne bâbâtâmire fuacnezejec.
17“Wofuŋzi wiac ebac ezore sâcmutâc râewec i ŋic moczi mi mana tarahuc huckerâ sâqocne bâfuaocmuo ine sifu kiŋ hotâckeocmu.
18Irec ŋic e goki mutâcnecnecmu irec sâc lamafâc‐ticne jaŋeraonec ŋicne biaŋne moc kiŋ tatara tahare biŋe taha baparao bafisizejec. Eme taha bapa eki, ŋic mi mana tarahuc bahac bâfuawec ere kiwiric jâoc rome sâqocne bâbâtâmire fuacnezejec.
19Ŋic e Wofuŋte maio kiŋ bâfuawecte taha izi kiŋ tatara taha ekac hâcne.”
