Levi 10:5-13

⁵Ru vano ru kaloho tala na mada a podane rua, i manga a ngava e Moses i vakuku. Pali uka ma ru kali tala a nirodo na bakovi nga ru mate.

⁶Ngane e Moses i habi a ngava tabu ne Aron turana e tuna ala rua, e Eleasar, e Itamar. I taki tou i ta maea, “Nahea ge patoka a vune matou, naha ni rape a varakia matou, ma ga moto rata mavonga bara moto mate, a rongova ne BAKOVI DAGI bara i bele ne huriki. Pali e huriki a viri ne mua a Israel, ria ri gi kalo vona ra bakovi nga e BAKOVI DAGI i rabalaki rua na kanono.

⁷Naha ni pe taroa a Kape na Vaponga, ma moto go mate. A gamai matou pali, matou a vora ne BAKOVI DAGI kunana.” I mavonga, to longoa a nitane Moses, to ramaia.

⁸E BAKOVI DAGI i takia e Aron i ta maea,

⁹“Na tahuna ioe turana e tumu ala rua moto dili na Kape na Vaponga, naha ni ninu a vain a naru vagole, ma moto go mate. Ra vinara iea, ge ramai vakaroroa e huriki a hamone matou.

¹⁰Moto tovo matou ni matakilaka vona a maki ni taba, a maki i uka ma ni taba, a maki i kaba, a maki i muto.

¹¹Bara moto tovo e huriki a Israel na maka vinara e BAKOVI DAGI i vakuku e Moses vona.”

¹²E Moses i taki e Aron turana e tuna ala rua ru tababana ni mahuri, e Eleasar, e Itamar, i ta maea, “Moto bole a vit i tababana na nihabi ni gutu na kanono ne BAKOVI DAGI, moto rata a bret i uka is, moto kani tabukoi na dede, a vuhuna a bret iea ni taba.

¹³Moto kani na hini ni taba pololilo na nure na Kape na Vaponga. A naguna vit ni gutu kaleva ra ni habi ne BAKOVI DAGI, moto bole ge ne matou, ne vona e tune matou bakovi, moto bole tala na nihabi ni gutu na kanono ne BAKOVI DAGI, i ramaia a ngava ni vakuku iau vona.