1Ʒoaŋ gie bapa namba 8 maickeme Mosezi Aroŋ â ŋokâfâcne erâ Israe soŋaŋ micne hetumaŋ‐jopa‐fârewec.
2Ehuc Aroŋ ʒiŋuc âzâcnewec: “Go bulimakao motecnezi ŋicne biaŋne moc sâqocne tâtâmire tahare biŋe, erâ lama ŋicne biaŋne moc qowi bâzire biŋe rocjofarâ Wofuŋte maio bâzi rikec‐jofazemec.
3Ehuc Israe ŋic ʒiŋuc jazazemec: ‘Ŋoŋe noniŋ ŋicne moc sâqocne tâtâmire tahare biŋe rorâ bulimakao motecne â lama biaŋne jara‐jekic wâŋ ekicne i qowi bâzire biŋe rocjofanʒepieŋ.
4Wofuŋte maio wama bâzi rikeniŋte bulimakao ŋicne moc â lama ŋicne moc rocjofanʒepieŋ, erâ taha bâzi i wokemaŋhec bâsifuckenʒepieŋ; Wofuŋ e miŋecgac maic‐ŋopaocmu hâcne.’”
5Eme Mosezi wiac mutâcne‐jarewec irec sâc tutumaŋ qoruc bozeo bafisipie kikefuŋ sasawa jaŋe Wofuŋte maio tumaŋne‐fârembiŋ.
6Ehame Mosezi ʒiŋuc jazawec: “Wofuŋ e huriri qâreŋ‐ticnezi fua‐ŋareocmurâ iŋuc hâcne eniŋte mutâcne‐ŋarewec.”
7Mose e iŋuc murâ Aroŋ ʒiŋuc âzâcnewec: “Go alata maickehuc sâqocne tâtâmire taha â qowi bâzige rikehuc gahacne â wiacfâcge ŋaŋacne kiwiric rozemec. Izi ine Wofuŋzi mutâcnewec irec sâcko ŋic ŋokac jaŋere taha bahuc kiwiric‐jeŋic wâc rozemec.”
8Eme Aroŋ e alata maickehuc e jahacne biŋe sâqocne tâtâmire tahare bulimakao motecne moc qâhâmowec.
9Ehame ŋokâfâcne jaŋe soc râcnepie memotec‐ticne ira âke uruckerâ alata ʒuŋene ruacnewec, soc tiwâne ine alata fuŋnao hoŋkewec.
10Sâqocne tâtâmire tahare wokemaŋ â râpe hândâŋ erâ bugâpâcte qârurune i ine Mose mutâcnecnewec irec sâcko alatao râeme ʒawec.
11Biucne â sahacne ine hae râpeo ʒocko rikewec.
12Aroŋ e iŋuc erâ qowi tahare biŋe qâhâmowec; ehame ŋokâfâcne jaŋe soc râcnepie alata râreckehuc tie rawec.
13Eme jaŋe qowi bâzi i dâkâne dâkâne erâ qizecne wâc râcnepie alata faio râeme ʒawec.
14Ehame hobune â kikene opâzi ʒurerâ qowi bâzihec mâmâc alata faio râeme ʒawec.
15Ʒafâreme ŋic ŋokac jaŋere taha ʒiŋuc râewec: E qanaŋ e jahacne biŋe sâqocne tâtâmire taha râewec irec sâc jaha ehuc noniŋ ŋicne rorâ ŋic ŋokac jaŋere biŋe sâqocne tâtâmire taha rikewec.
16Erâ mumutâc‐ticne fowec irec sâcko qowi bâzi rikewec wâc.
17Erâ taha bâzi mâmâc râewec, ehuc me fufusuc jaha alata faio furictere qowi rikewec ijaha ʒuhuckerâ râeme ʒawec.
18Eme Aroŋ e bulimakao â lama ŋicne ŋic ŋokac jaŋere biŋe wama bâzire qâhâmowec, ehame ŋokâfâcne jaŋe soc râcnepie alata râreckehuc tiewec.
19Bulimakao â lama jahere wokemaŋ me gecne wokemaŋhec â qârurune honao mecne, râpe hândâŋko mecne, erâ bugâpâcnao mâmâc bohotarâ fokac
20i hâcne amec siec‐jekicko ropie feme alatao râeme ʒawec.
21Amec siecne â ŋefacne fâreopec i ine Mosezi mutâcnecnewec irec sâcko Wofuŋte maio fenʒoŋkehuc taha râewec.
22Aroŋ e iŋuc erâ mejahec‐ticne ŋic ŋokac jaŋeraopec bâfeŋnehuc jambuŋ‐jopawec. Iŋuc erâ sâqocne tâtâmire taha â qowi bâzi erâ wama bâzi rike‐fârerâ wahawec.
23Eme Mose â Aroŋ jahe tutumaŋ qoruc bozeo raʒipic. Izi risie wefurâ ŋic ŋokac jambuŋ‐jopapire Wofuŋte huriri qâreŋzi ŋic ŋokac sasawa jaŋerao fua taniŋkewec.
24Ehame Wofuŋtaonec ʒoc bâruŋzi fuarâ qowi bâzi â wokemaŋ alata faio fowec i ʒâseŋkewec. Eme ŋic ŋokac jaŋe wiac i honerâ ʒeri ehuc fodape‐fârembiŋ.
