Taha Bapare Sâcmutâc 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Wofuŋzi Mose dâŋ kecʒiŋuc âzâcnewec:

²“Go Israe ŋic ŋokac ʒiŋuc jazazemec: Ŋokac moczi kogoc kiweckerâ motec roocmu irec faicnao wâwânâŋhec juha ʒoaŋ gie bapa 7 tarazejec; mosa dameŋ‐ticnao soc rohuc wâwânâŋhec ewec irec sâc jaha juzejec.

³Eme ʒoaŋ gie bapa namba 8 maickeme motec e sahac tofa‐ticne hetâcnenʒepieŋ.

⁴Eme ŋokac e tâpiri‐ticne mocwâc fuaocte ʒoaŋ gie bapa 33 ficko ŋehuc juzejec, e wiac tirine ba bâuac mi ehuc â tirificko wâc mi fefe mâc ŋehuc juha ɋaɋacne juju dameŋ‐ticne mocwâc maickezejec.

⁵Me ŋokac e kogoc kiweckerâ naru roocmu irec faicnao wâwânâŋhec juha sonda 2 tarazejec, e mosa dameŋ‐ticnao soc rohuc wâwânâŋhec ewec irec sâc jaha juzejec. Eme irec faicnao ʒoaŋ gie bapa 66 mâc ŋehuc juha ɋaɋacne juju dameŋ‐ticne mocwâc maickezejec.

⁶“Ŋokac e naru me motec roocmu irec faicnao taha bapa tutumaŋ qoruc bozere motâcko juekac erao taha râezejec, ine lama moc jara‐ticne wâŋ ekicne i qowi bâzi tahare biŋe â hapâ me buni moc ine sâqocne tâtâmire tahare biŋe râezejec.

⁷Eme taha bapa e wiac i Wofuŋte maio taha bahuc ŋokacte kiwiric rozejec, ehame ŋokac e soc rohuc wâwânâŋhec juweczi ɋaɋackezejec. Ŋokac naru me motec roocmu ere sâcmutâc dâŋ iŋuc hâcne fokac.

⁸Me lama moc mi jucneŋgopieŋko ine hapâ jajahec me buni jajahec rocjofarâ moc qowi bâzi tahare biŋe â moc sâqocne tâtâmire tahare biŋe râezejec. Ehame taha bapazi taha bahuc kiwiric rocneme ɋaɋackezejec.”