Levitikus 10:5-13

⁵Ma aram marbow ra kolew e mad u daken fagali ldow ngar fekew nga wuru’ e gin’em, ni bod rogon nike yog Moses.

⁶Me ga’ar Moses ngak Aron nge fa gali pumo’on ni fak ni aram Eleazar nge Ithamar, “Dab mu ted lolgumed ndab kum raweyed ara mu guchthiyed e mad romed ni gimed be dag ni be taganan’med. Ya gimed ra rin’, ma gimed ra yim’, mra damumuw SOMOL ngak yu Israel ni ga’ngin. Machane urngin e girdi’ nu Israel ni yad ra yornag faglicha’ ni li’row fare nifiy ni SOMOL e pi’ nge yib.

⁷Dab mmarod u langan e mab ko fare Tent nga wean, ya gimed ra yim’, ya kan liyefmed ko fare gapgep ni fin e mathiy rok SOMOL.” Aram miyad rin’ ni bod nike yog Moses.

⁸Me ga’ar SOMOL ngak Aron,

⁹“I gur nge fapi pumo’on ni fakam e nap’an ni gimed ra unum e wayin ara ban’en ni yima ching ngay ma dab kumbad ngalan fare Tent u p’eowcheg; ya fa’an gimed ra rin’, ma gimed ra yim’. Ren’ey e nge par nib motochiyel rok e pi’in owchamed e chiney i yan nga ram.

¹⁰Thingar mu ki’eged e tin fen Got ban’en nge tin yug fenay, nge tin tabgul ban’en nge tin ba ta’ay.

¹¹Ma thingar mu filed ngak e girdi’ nu Israel urngin fapi motochiyel ni kug pi’ ngomed u daken Moses.”

¹²Me ga’ar Moses ngak Aron nge fa gali pumo’on ni fak ni kar magey gow, ni aram Eleazar nge Ithamar, “Mu feked fare maligach ni grain ni ke’aw ko fapi ggan ni kan pi’ ngak SOMOL ngam ngongliyed e flowa riy ndab ntay e is ngay ngam ked u to’oben fare altar, ya re maligach ney e rib tabgul.

¹³Thingar mu ked u bang nib tabgul; ya ireram e f’oth rom nge pifakam ni pumo’on ko fapi ggan nni pi’ ngak SOMOL. Ya irera’ rogon nike yog SOMOL ngog.