21Bra kanꞌ mxkwen Jesús ꞌin neꞌ: ―Nten nu nnan chaꞌ nu nchkwiꞌ Ndiose loꞌo neꞌ, loꞌo ngiꞌni neꞌ kanꞌ nchga tñan nu ndlo Ni ꞌin neꞌ, sa ñaꞌan si lka neꞌ jyaꞌaǎn, sa ñaꞌan si lka neꞌ taꞌaǎn, ngwañaꞌan lka neꞌ kanꞌ ―ndukwin Jesús ꞌin neꞌ.
22Ngwa ska tsan mdoꞌo Jesús loꞌo neꞌ nu ngiꞌni xaꞌan chaꞌ ꞌin yu, ndyaa neꞌ tuꞌwa tiyuꞌ. Bra kanꞌ yten neꞌ ska niꞌ yka naꞌan xuwe ti ndyaa neꞌ. ―Tsaan xka laꞌa tsuꞌ tiyuꞌ re ―ndukwin Jesús ꞌin neꞌ. Ndyaa neꞌ loꞌo Jesús bra kanꞌ.
23Bra nu ti ndiꞌin neꞌ niꞌ yka naꞌan kanꞌ lo tyiꞌa, yuꞌwi ꞌa sla Jesús; bra ti yijaꞌ yu chinꞌ. Bra kanꞌ lye ꞌa mdyisnan kwiꞌin mskwa loo tiyuꞌ kanꞌ. Loꞌo lye ꞌa ngatsa kulooꞌ loo tyiꞌa tiyuꞌ bra kanꞌ, yten tyiꞌa niꞌ yka naꞌan kanꞌ, sa wa sten ti yka naꞌan kanꞌ niꞌ tyiꞌa.
24Bra kanꞌ ndyaa mlyo neꞌ sla Jesús nde seꞌen nskwa yu lajaꞌ yu. Ykwiꞌ neꞌ loꞌo yu bra kanꞌ: ―¡Yu kula, yu kula! ―ndukwin neꞌ ꞌin yu―, ¡xaa tiiꞌ! ¡Wa sten ti yka naꞌan re niꞌ tyiꞌa, kajaan bra kanꞌ! Mdyituun Jesús bra kanꞌ, ngulo yu tñan ꞌin kwiꞌin loꞌo kulooꞌ kanꞌ. Bra ti ngwa tiin ran bra kanꞌ; ja mskwa ꞌa kwiꞌin, ja ngutsa ꞌa kulooꞌ.
25Bra kanꞌ ykwiꞌ Jesús loꞌo neꞌ nu ngiꞌni xaꞌan chaꞌ ꞌin yu: ―¿Ni chaꞌ ja ndyaa ñaꞌan tiꞌ wan ꞌin Ndiose chaꞌ ka ꞌin Ni kuꞌni Ni ngwañaꞌan a? ―ndukwin Jesús ꞌin neꞌ kanꞌ. Ytsen ꞌa neꞌ kanꞌ, yuwe ꞌa tiꞌ neꞌ ñaꞌan neꞌ ꞌin Jesús bra kanꞌ. ―¿Ti ka nu lka yu re a? ―ndukwin neꞌ ꞌin taꞌa neꞌ―, chaꞌ ynan kwiꞌin, ynan kulooꞌ chaꞌ nu nchkwiꞌ yu ―ndukwin neꞌ ꞌin taꞌa ngiꞌni xaꞌan neꞌ.
26Laꞌa tiyuꞌ nde re, lo yuu ꞌin neꞌ Galilea lka; bra kanꞌ xka laꞌa tsuꞌ tiyuꞌ, lo yuu ꞌin neꞌ Gadara lka kanꞌ. Bra kanꞌ ndyaa neꞌ niꞌ yka naꞌan xuwe ti kanꞌ, mdiya neꞌ lo yuu ꞌin neꞌ Gadara bra kanꞌ.
27Bra wa mdoꞌo neꞌ niꞌ yka naꞌan kanꞌ, bra kanꞌ ndyukwa taꞌa Jesús loꞌo ska yu kiꞌyu neꞌ Gadara nu msñi kwiꞌin xaꞌan ꞌin yu. Wa sꞌni nsuꞌwi kwiꞌin kanꞌ ꞌin yu; ti bra kanꞌ ja nchkuꞌ yu steꞌ yu, ja ndyiꞌin yu niꞌ ñaꞌan. Ndaꞌan yuꞌwi ti yu, ndyaꞌan yijaꞌ yu niꞌ lyoꞌoo seꞌen ndyuꞌwi ayman.
28Bra wa naꞌan yu ꞌin Jesús, bra kanꞌ kwen ꞌa msiꞌya yu, mlyuu yu tloo Jesús. ―¿Nan lka kuꞌnii loꞌoǔn a?, yu kula Jesús ―ndukwin yu tiꞌí kanꞌ―. Jlyo tiǎnꞌ chaꞌ lkaa Sñiꞌ Ndiose nu lka ndloo la ti. Kuꞌnii chaꞌ tlyu tiꞌ ꞌñaǎn, ja taa nu tiꞌí ꞌñaǎn ―ndukwin yu tiꞌí kanꞌ ꞌin Jesús.
29Ngwañaꞌan ykwiꞌ yu chaꞌ wa ngulo Jesús tñan ꞌin kwiꞌin xaꞌan kanꞌ, chaꞌ tyoꞌo kwiꞌin kanꞌ ꞌin yu. Ti ngwa sꞌni tyun yaꞌ mxlyuu kwiꞌin kanꞌ ꞌin yu; kanꞌ chaꞌ ndiꞌin nten kwan ꞌin yu, nchkanꞌ yaꞌ yu, nchkanꞌ kiyaꞌ yu loꞌo karenan chkwan. Loꞌo kanꞌ ja nduwe tiꞌ yu ꞌin karenan kanꞌ, bra ti nsiꞌyu kuꞌ yu chkwan kanꞌ. Kwiꞌ ngwañaꞌan, ndyaꞌan loꞌo kwiꞌin xaꞌan kanꞌ ꞌin yu, nxnan yu niꞌ kixinꞌ seꞌen ja ndiꞌin nten.
30Bra nu ndyukwa taꞌa Jesús loꞌo yu tiꞌí kanꞌ, bra kanꞌ mnichaꞌ Jesús ꞌin yu: ―¿Ni sa ñaꞌan naan nuꞌwin a? ―ndukwin Jesús ꞌin yu. ―Kaꞌan ꞌa loo niǐn ―ndukwin yu tiꞌí kanꞌ ꞌin Jesús, chaꞌ kaꞌan ꞌa kwiꞌin xaꞌan yꞌni tiꞌí ꞌin yu.
31Ntsen ꞌa kwiꞌin xaꞌan kanꞌ si kulo Jesús tñan ꞌin ran chaꞌ tyaa ran tuwiin seꞌen mdoꞌo ran nde niꞌ yuu. Kanꞌ chaꞌ yꞌni kwiꞌin chaꞌ mjñan yu tiꞌí kanꞌ ꞌin Jesús chaꞌ ja kulo yu tñan chaꞌ tyoꞌo kwiꞌin kanꞌ.
32Ti kwiꞌ tsan kanꞌ mdaꞌan ska ta tnun kuweꞌ siꞌ kiꞌya nu ndiꞌin kwiꞌ seꞌen ti kanꞌ. Bra kanꞌ mjñan yu tiꞌí kanꞌ chabiyaꞌ ꞌin Jesús chaꞌ kanun kwiꞌin xaꞌan kanꞌ loꞌo kuweꞌ. Mda Jesús chabiyaꞌ ꞌin kwiꞌin kanꞌ bra kanꞌ.
33Mdoꞌo kwiꞌin xaꞌan kanꞌ ꞌin yu tiꞌí kanꞌ, msñi ran ꞌin kuweꞌ bra kanꞌ. Bra ti msnan nchga kuweꞌ kanꞌ nde ska loo kwaꞌan kiꞌñi, mdiyuu iꞌ ndyaa iꞌ lo tyiꞌa tiyuꞌ; ngujwi iꞌ bra kanꞌ, chaꞌ yiꞌo iꞌ tyiꞌa tiyuꞌ kanꞌ.
34Bra wa naꞌan neꞌ chaꞌ kanꞌ, neꞌ nu mdaꞌan loꞌo kuweꞌ kanꞌ, msnan neꞌ ndyaa neꞌ bra kanꞌ. Ndyaa neꞌ nde kichen tyi neꞌ, ndyaa ytsaꞌ neꞌ chaꞌ kanꞌ ꞌin taꞌa kichen tyi neꞌ; loꞌo ytsaꞌ neꞌ ꞌin nchga nten nu ndiꞌin niꞌ kixinꞌ kwiꞌ seꞌen ti sa ñaꞌan ngwa chaꞌ kanꞌ.
35Bra kanꞌ mdoꞌo neꞌ kichen kanꞌ, mdiyan naꞌan neꞌ chinꞌ ꞌin yu kanꞌ, nan lka ngwa ꞌin yu. Bra wa mdiyan neꞌ seꞌen ndiꞌin Jesús, bra kanꞌ naꞌan neꞌ ꞌin yu kiꞌyu nu yuꞌwi kwiꞌin xaꞌan ꞌin, chaꞌ wa nchkaa yu; ndukuꞌ yu steꞌ yu, tiin ti ndukwa yu tloo Jesús. Ytsen ꞌa neꞌ bra kanꞌ.
36Bra kanꞌ nten nu naꞌan bra nu ngulo Jesús kwiꞌin kanꞌ ꞌin yu, ytsaꞌ neꞌ kanꞌ ꞌin taꞌa neꞌ sa ñaꞌan ngwa chaꞌ nchkaa yu kanꞌ.
37Bra kanꞌ lye ykwiꞌ nchga neꞌ kichen kanꞌ loꞌo Jesús chaꞌ tyoꞌo tsuꞌ yu, chaꞌ ja kanun ꞌa Jesús lo yuu kanꞌ; ytsen ꞌa neꞌ kichen kanꞌ. Kanꞌ chaꞌ mdoꞌo Jesús ndyaa yu niꞌ yka naꞌan xuwe kanꞌ.
38Loꞌo yu kiꞌyu nu tka mdoꞌo ti kwiꞌin xaꞌan ꞌin, mjñan ꞌa yu ꞌin Jesús chaꞌ tsaa yu loꞌo Jesús niꞌ yka naꞌan bra kanꞌ; loꞌo ja mda Jesús chabiyaꞌ chaꞌ tsaa yu loꞌo.
39―Yaa lyaa naꞌan tyii ―ndukwin Jesús ꞌin yu nu wa mꞌni kwiꞌin loꞌo kanꞌ―. Katsaaꞌ ꞌin nchga nten, nchga chaꞌ tnun nu wa yꞌni Ndiose loꞌoo. Ndyaa yu bra kanꞌ, ytsaꞌ yu chaꞌ kanꞌ ꞌin nchga nten taꞌa kichen tyi yu, nchga chaꞌ tnun nu wa yꞌni Jesús loꞌo yu.
40Bra kanꞌ mxitukwi Jesús ndyaan laꞌa tiyuꞌ nde re xiyaꞌ. Suꞌwe ꞌa ngwa tiye neꞌ kichen kanꞌ chaꞌ ngala yu xiyaꞌ; suꞌwe ꞌa ykwiꞌ neꞌ loꞌo yu, chaꞌ ngita ꞌa neꞌ ꞌin yu sa bra nu tyaan yu xiyaꞌ.
41Bra wa ngala Jesús, bra kanꞌ bra ti mdiyan ska yu kiꞌyu nu naan Jairo seꞌen ndiꞌin yu; yu kula lka yu kanꞌ, nu nduun loo la niꞌ lyaa lka yu kanꞌ. Mdiyan yu bra kanꞌ, mduun xtyinꞌ yu tloo Jesús, lye ꞌa mjñan yu kanꞌ chaꞌ tlyu tiꞌ ꞌin Jesús chaꞌ tsaa Jesús naꞌan tyi yu.
42Ska ti sñiꞌ Jairo nsuꞌwi, ska nu kunaꞌan kuneꞌ nu nsuꞌwi tii tyukwa ti yijan. Loꞌo ni, tiꞌí ꞌa nu lyuꞌ kanꞌ, wa kaja ti. Kanꞌ chaꞌ ndyaa Jesús loꞌo yu kula kanꞌ, loꞌo kaꞌan ꞌa nten taꞌa ndaꞌan yu. Tkanꞌ ꞌa ndiꞌin nten tuwiin seꞌen ndyaa Jesús.
43Laja nten kanꞌ ndyaa ska nu kunaꞌan nu tiꞌí ꞌa. Wa mdyii tii tyukwa yijan tiꞌí nu kunaꞌan kanꞌ, xkwiꞌ kicha nu ndiꞌya tnen nsuꞌwi ꞌin nu kunaꞌan kanꞌ. Wa mdyii tñi ꞌin nu kunaꞌan kanꞌ ngwiji, siyaꞌ neꞌ joꞌó, ja ska nten ngwa ꞌin kuꞌni joꞌó ꞌin nu kunaꞌan kanꞌ.
44Loꞌo ni, yan nu kunaꞌan kanꞌ nde chunꞌ Jesús, ylaꞌ kiyaꞌ steꞌ yu; bra ti msiꞌyu kuꞌ chaꞌ ngalu tnen kanꞌ, bra ti nchkaa nu kunaꞌan kanꞌ.
45Bra kanꞌ mnichaꞌ Jesús ꞌin neꞌ nu mdaꞌan loꞌo: ―¿Ti ka nu ylaꞌ steěnꞌ a? ―ndukwin. Nchga nten ykwiꞌ chaꞌ ja tukwin ylaꞌ steꞌ Jesús. Kanꞌ chaꞌ loꞌo Tyu loꞌo xka ta taꞌa ndaꞌan yu, mxkwen neꞌ ꞌin Jesús bra kanꞌ: ―Yu kula ―ndukwin neꞌ―, nchga chuunꞌ tkanꞌ ꞌa ndiꞌin nten. Ni chaꞌ lka nchkwiiꞌ sikwa: “¿Ti ka nu ylaꞌ steěnꞌ a?”
46Bra kanꞌ xiyaꞌ mxkwen Jesús ꞌin neꞌ kanꞌ: ―Chañi chaꞌ wa ylaꞌ ska nten ꞌñaǎn ―ndukwin―. Mgii tiǎnꞌ chaꞌ wa mdoꞌo chinꞌ chaꞌ tiya ꞌñaǎn chaꞌ wa yꞌniǐn joꞌó ꞌin ska nten.
47Bra kanꞌ jlyo tiꞌ nu kunaꞌan kanꞌ, chaꞌ ngwa biyaꞌ tiꞌ Jesús chaꞌ kanꞌ, kanꞌ chaꞌ ytsaꞌ ꞌin yu; nchkwaan ti nu kunaꞌan kanꞌ ndijyan chaꞌ ytsen ꞌa. Bra kanꞌ mduun xtyinꞌ nu kunaꞌan kanꞌ tloo Jesús; tloo nchga nten nu nduun nde kwa ytsaꞌ ꞌin yu ni chaꞌ lka ylaꞌ steꞌ yu, loꞌo wa nchkaa bra ti bra kanꞌ.
48Kanꞌ ykwiꞌ Jesús loꞌo nu kunaꞌan kanꞌ: ―Chaꞌ wa ndyaa ñaꞌan tiiꞌ chaꞌ ka ꞌin Ndiose kuꞌni chaꞌ tnun, kanꞌ chaꞌ wa nchkaa ni, sñiěnꞌ ―ndukwin Jesús ꞌin nu kunaꞌan kanꞌ―. Ja kuwe tiiꞌ, tyaa lyaa ni.
SAN LUCAS 8
SAN LUCAS 8:21-48