Luke 8:21-48

²¹Jesus yesa kangalur bo, “Rechokla re rongrong mala yalol Deus ngo re itol deper iyang mele seley mo bisiy.”

²²Seral le Jesus mo mokwe redabeyal re dage seyay boat ngo Jesus yesa kangalur bo, “Siya loh mo rel laom le rela sere.” Iwe resa loh.

²³Yodwe re teteragloh ngo Jesus yesa masor loh. Re tedaploh chog ngo yesa kkel doh sew yaeng lal laom we ngo yesa momos boat we, ngo resa mel luwul hammerah.

²⁴Mokwe redabeyal resa faengludah ngo resa kangalu bo, “Masta, Masta! Sible mes!” Yesa chemdah Jesus yesa malili ngal yaeng mo lokowe re sala possloh. Iwe sala malululoh.

²⁵Iwe ngo yesa kasiyar bo, “Ifa tugul we yami?” Ir resa lluwdah ngo re motog ngo resa kasiy fengal uwor. “Itey mal le yebe malili ngal yaeng mo law ngo rema talenga yalol?”

²⁶Jesus mo mokwe re dabeyal resa teragloh irel mekla faluyel Gerasa le ye mel rel Laom we Galilee rela sere.

²⁷Yodwe yela hola fulu ngo Jesus sala chungu semal mall haplom we le yor moniyan uwol. Yesa sulay yal tayma mengag ngo tayma mel lubugtal bo sa mamel fedal chog luwul tot pey.

²⁸Yodwe mal we yela wiri Jesus ngo yesa tawul le ye hapalingi yalol. Ngo yesa hachepragidiy mo imol Jesus ngo yesa malili moniyan we uwol le ye hapalingi yalol. “Jesus le Lol Deus le ye Hartal Tagiyet meda mele ho luluwale ngalyey? Fael pechem ngo ho towe hafohoyuyey!”

²⁹Moniyan we ye sor mele bo fal mala Jesus yesa kangalu bo be chuy mo uwol mal we. Yesa cholop yodka yema kkel doh moniyan wol mal we le haramwo re chena paol mo pechel ngo yema musdu. Iwe ngo moniyan we yesa hasiloh lobokla le ye tolmayloh.

³⁰Jesus yesa kasiya mal we bo, “Ifa idem?” Iwe yesa sor bo, “Ngang Buwa.” Ye sor mele bo fal mala ye cholop moniyan uwol.

³¹Moniyan kawe resa hafal pechey Jesus bo towe fang diy ier lal Infiyerno.

³²Ye mel sew mwodol pabiy lengcher le re momongoy wol sew teplag. Ngo moniyan kowe resa hafael pechey Jesus bo be tahcher bo re bela mel uwol pabiy kowe. Iwe yesa tahcher.

³³Iwe moniyan kowe resa chuy mo uwol mal we re sala mel uwol pabiy kowe. Resa hamdawey pabiy kowe mo wol metal teplag we resa muslong lal chael we yar malom loh.

³⁴Chol hamongol pabiy kowe re wiri mokwe ye weldoh. Iwe re sala sor fedal luwul haplom ngo re wol kangalur chol milay.

³⁵Resa roloh yarmat bo rebe kemahoy mele sa wel. Rela budoh irel Jesus re sala wiri mal we le ye mel lengchel le sa chuy moniyan mo uwol, ngo yesa mengag, ngo yesa repiy. Panger rechokwe ngo resa motog.

³⁶Rechokwe re wiri molwe ye wel resa kangalur rechokwe re moch budoh sangsengal yael Jesus hachuya moniyan mo uwol mal we.

³⁷Iwe ngo pangal yeramtal fulu we ngo resa kangalu Jesus bo be chuy bo yesa kkel yar motog. Iwe Jesus yesa chudah yuchul boat we sa loh.

³⁸Mal we sa chuy moniyan mo uwol yesa hafaelpech ngal Jesus le ye sor bo, “Fael pechem ngo ibe daboh.” Iwe ngo Jesus sa halho le ye kangalu bo,

³⁹“Hola tefael loh lubugtam bo ho bela sor mokwe Deus sa faor ngalug.” Iwe mal we yesa loh luwul haplom we ye sala sor fedal mokwe Jesus yesa faor ngali.

⁴⁰Yodwe Jesus yela tefael ngal rel chael we sere ngo resa tteydoh yarmat bo rebe habngu bo resa rraey irel bo sa ssulay yar wedwed loh chog irel.

⁴¹Iwe ngo yesa budoh semal mal le Jairus idal le iy semal tamol imwel tteywe yar. Yesa hasubgudiy mo imol Jesus ngo yesa hafaelpech bo Jesus yebe dabeloh irel imw la imwal.

⁴²Bo mala lol le moch seg mo ruwow lepal ragel ila sa cchow yal tomay ngo ila chog lepal lol tarfefel. Yodwe Jesus ye dedarloh ngo yarmat resa rol hapilsedaw doh mo isre mo isre iy.

⁴³Ye mel semal fefel luwulur rechokwe le sa seg mo ruwow raeg yal machpol. Sa tapeliloh lol salpiy irel paliyer togta ngo tor semal ir le ye yoh bo be hachuya yal tomay.

⁴⁴Yesa hadidilong luwul buwa we mo lutugrul Jesus sala yangsi ngachel molwe mengagol. Yodwe chog ngo ye chuyloh yal tomay.

⁴⁵Jesus sa kasiy, “Itey le ye yangsiyey?” Semal ngo ye sor bo te iy. Pedrus sa sor bo, “Masta, be ifa sengal chog ngo siya gola irel buwa le resa hadibal ngalug.”

⁴⁶Iwe ngo Jesus sa wol sor, “Semal sa yangsiyey, bo imeyafi le ye buyoy kkemal mo uwoy.”

⁴⁷Fefel we sa gola le yarmat resa gola bo iy molwe, iwe ngo yesa budoh irel Jesus le yesa rerer irel yal rusmes. Ye sala hasubgudiy mo imol Jesus. Fefel we yesa kangalu Jesus mo imol pangal yarmat fael mele yela yangsi iyang mo igegel ttiril yal chuyloh yal tomay.

⁴⁸Iwe Jesus yesa kangalu bo, “Layi, yam tugul mele yesa hachuya yam tomay. Ho loh luwul hopos.”