LUUKA 8:21-48

²¹Hili a’di o uni gwo mo ki: Ata’dam pem dhali ikam pem ta uni gwansan kun ciḵ gwo ma Arumgimis mo dhali mii uni mo be.

²²Ka cima kamu/ mo tani a’di seki’da ḵur mo nyaḵki imanciḵ a’di gwo mo dhali a’di ki o uni gwo mo ki: Dhalki ana ’ciṯẖa/ gap̱ ki ’bana kamu/ ma al mo ma. Wakan uni karkina ḵur ’pen mo be.

²³Dhali me’d jin hashkina uni mo eya ḵur yi’de/ mo tani a’di ishki e mo. Dhala p̱unthar ’tham p̱u’dki’d ap̱o/ ma al yi’de/ mo dhali uni ’tu’dkina yi’de/ bwa ḵur mo dhali uni ’kokin mo e mo jin ṯagu wu mo be.

²⁴Dhali uni iikin mo mmomer a’di e mo mmo/o a’di gwo mo ki: Tap̱a, Tap̱a, ana ’ce’du/ sho’k mo. Dhali a’di merki e mo dhali ḵucur ’tham ki gwo mo dhali yi’de/ jin bir bakal mo. Dhali uni daḵkan mo dhali mo dosh ki biyuu mo be.

²⁵Dhali a’di ki o uni gwo mo ki: Mane moŋgam gwo is bum mane? Dhali uni ḵo/ki is mo be dhali uni merkin mo mmo/o gwo ka rem ’kup̱ mo ki: Wathi/ yan ta’da ja sa/ haali/ a’di ḵanki ’tham gwo mo dhali yi’de/ mo, dhali uni ha gwom piti e mo be.

²⁶Dhali uni merkin mo e bampa/ gi Paŋ Gadara mo a’di jin di’d ka par ’twa/ ki Pany Jaliil mo be.

²⁷Dhali ki a’di thulki’d ka ’cesh mo tani wathiŋ kamu/ ’peni ’peŋkuman bampa/ jin ta’d ga ruma ’cesh mo gamki a’di ’kup̱ mo. Haali/ isa gush mo tani a’di diki hi’th burrinyeŋ kamu/ i/is mo dhali a’di diki c̱a’b e gu’b mo, hili a’di c̱a’bki’d mo e bwaman moŋ’kup̱aje mo.

²⁸Ki a’di p̱arki’da Yesus e mo tani a’di cuu’d ki ’twa/ jin caaca mo dhali biṯa ’cesh mo mbwambori a’di mo dhali o gwo mo ki dhan ’twa/ jin caaca ki: /e mini mii aha/ katinta mo, Yesus jin ta Ya/ ma Arumgimis jin Cayaa/ e ki Ca mo? Aha/ ’thokina /e mo ki dhalku/ ki ṯocaa/ ’kus mo.

²⁹Haali/ a’di ḵanki’da rum thus jin nyo/o’d gwo mo mmoya ka pije/ mo ’peni wathi/ mo. (Haali/ me’d ka ris a’di bu’thki a’di mo dhali a’di karkunu mo mmoji mo dhali a’di deḵkunu ka jindhiir mo dhala maḵḵiya mo, hili a’di ’ce’dki mondeḵ mo dhali a’di urkin ma ruma ’cesh ka pije/ mo e bwam ma si’b mo.)

³⁰Yan’ko’d Yesus ki doṯ a’di ki: Gway pini yuḵu kata mo? Dhali a’di ki thoḵ a’di gwo mo ki: Karis mo. Haali/ ama’dinya ruma ’cesh uni sekini a’di mo be.

³¹Dhali uni ’thoki a’di mo mmodiki ḵan uni gwo mo mmo/ii mo e bwany jisa ’kulga/ mo.

³²Dhali hili ama’diny ḵuthar caaca shwani ’bambala wosh mo dhali uni ’tho a’di mo mmodhal uni bway mo mmose i uni gwansan mo be. Wakan a’di dhalki uni bway mo be.

³³Dhali yan’ko’d aruma ’cesh iikin ka pije/ ’peni wathi/ mo dhali cic̱ mo e bwam ḵuthar mo dhali ama’diny ḵuthar uni yakina ŋwac̱a/ mo ka luŋgu’b mo eya gap̱a al jin ’kula’kul mo mbwaman ma al mo dhali uni loskunu mo be.

³⁴Ki imanhil ḵuthar p̱arki a’di jin miikunu e mo tani uni son mo dhali ṯor a’di e ’peŋkuman bampa/ mo dhali e pa ’baar mo.

³⁵Dhali yan’ko’d ’kwani iikin ka pije/ mo mmop̱ar to jin miiki’d e mo dhali uni p̱u’dkina Yesus mo dhali uni ki gam wathi/ ’peni a’di jin pikin ma ruma ’cesh ka pije/ mo mmoc̱a’b e sho’k ma Yesus mo mmodi ki burrinye/ i is mo dhali mmoc̱a’b ka dum ’boro’d mo dhali uni ’kokin mo mmoḵo/ is mo be.

³⁶Dhali uni gwansan kun p̱arki a’di e mo tani ṯorki uni gwo mo gom a’di jin bu’thkin ma ruma ’cesh mo tani a’di wac̱kunu mo be.

³⁷Dhali yan’ko’d aris ’kwani kun ’kona bampa/ ki jiŋ ’kam mo e Paŋ Gadara mo tani uni doṯki a’di mo mmoya mo ’peni uni mo haali/ uni butha moŋḵo/ is jin caaca kagahara mo. Wakan a’di seki’d mo e bwam ma ḵur mo dhali doḵ ka nyaŋ’ko’d mo be.

³⁸Wathi/ jin yakin ma aruma ’cesh ka pije/ mo ’peni cine/ mo tani doṯki a’di mo mmo’taki nyaḵ ya ki a’di mo. Hili a’di hashki a’di mo mmo/o gwo mo ki:

³⁹Doḵku/ bway pam pini mo ma dhali ṯora ris to jin miikin ma Arumgimis i /e mo. Dhali a’di yaki’d mbway mo mmoṯora ris to gwansani ’baar mo eya ris ’peŋkuman bampa/ gom tony caaga/ jin miikin ma Yesus gom a’di mo be.

⁴⁰Dhali ka Yesus doḵki’d ka nyaŋ’ko’d mo tani awaambuhany ’kwani hanki a’di mo haali/ uni ’kokin mo mmoc̱or a’di mo be.

⁴¹Dhali wathiŋ kamu/ p̱u’dki’d mo jin yuḵu gway ka Yaa/irus mo. A’di ta tap̱a gi gu’b gi montul is mo, dhali a’di ki biṯa ’cesh e sho’k ma Yesus mo mmoŋap̱ a’di mo mmoya bway gu’b piti mo be.

⁴²Haali/ a’di ta’d gi jasi ’bwa/ jin di’d ’deŋ gana/ mo. A’di ’kona yili ’kume’d i’ce’dka su/ mo ki cam piti mo dhali ayim muru’di wu mo be. Ki a’di yaki’d mo tani ’kwani ḵalki a’di ka bor mo be.

⁴³Dhala ’boma kamu/ jin gus ma bas ki yili ’kume’d i’ce’dka su/ mo dhali a’di molu wac̱ mo ki miiŋ kamu/ mo.

⁴⁴A’di p̱u’dki’di bwamp̱o/ a’di mo dhali ta a’di ’twaman burrinyem piti is ki me’d mo, dhali ki jahanne/ abas ma yim jin guski’d mo tani daḵki’d mo be.

⁴⁵Dhala Yesus ki o gwo mo ki: Kaja a’di jin tayaa/ is ki me’d mo? Ki uni ’baar mo urki gwo mo tani Buṯerus ki o a’di gwo mo ki: Tap̱a, awaambuhany ’kwani caaca kagahara ḵal /e ki is mo dhali yap̱ /e mo.

⁴⁶Hila Yesus o gwo mo ki: Jin ṯal ’deŋ kamu/ taki aha/ is ki me’d mo, haali/ aha/ nyiṯẖa ki mom’bi’th yaki’d mo ’peni aha/ mo be.

⁴⁷Dhali ka ’bom mishki’d ki a’di ’kokunu ki mol mo tani ayim p̱u’dki’d mo dhali deena is kagahara mo dhali biṯa ’cesh mo ibwambori a’di mo dhali a’di ki ṯor gwo mo e bwambori ’kwani ’baar mo mmotana a’di a’di is ki me’d mo dhali mmowac̱kunuwa yim ki jahanne/ mo be.

⁴⁸Dhali a’di ki owa yim gwo mo ki: ’Bwa/um, moŋgam gwo is pini wac̱ki /e mo be. Yaku/ /e ki moŋḵu’th is mo ma.