San Lucas 8:21-48

²¹Istakꞌwi Comam tet anma: —Macn̈eticꞌa chiꞌaben Istzotiꞌ Comam Dios cat isyijeni, haꞌ ton huntekꞌan tuꞌ hacaꞌ inmiꞌan yehi, haꞌ hacaꞌ wuẍtajan yepaxoj, ẍi Comam tet anma tuꞌ.

²²Ay huneꞌ tzꞌayic xin octo Comam Jesús yul teꞌ barco yeb ebnaj chicuywi yinta Comam. Yalni Comam tet ebnaj: —Ton̈we bey iskꞌaxepicꞌto haꞌ lago tiꞌ, ẍi Comam. Isto ebnaj yeb Comam xin.

²³Hayet lan̈an yecꞌto ebnaj yiban̈ ha haꞌ yul teꞌ barco tuꞌ, iswaycan̈ Comam yul teꞌ. Istit huneꞌ niman jakꞌekꞌ sicꞌlebil, ismakꞌnicto jakꞌekꞌ ha haꞌ yul teꞌ. Etza xin tocano teꞌ yich haꞌ.

²⁴Yuxin oc ebnaj yikꞌalo iswayan̈ Comam. Yalni ebnaj tet Comam: —Mam cuywawom, Mam cuywawom, lan̈anxa coto yich haꞌ, ẍi ebnaj tet Comam. Yaben̈e Comam tzet yal ebnaj xin, yahwano Comam, yalni Comam tet jakꞌekꞌ yeb tet ha haꞌ ta chislin̈ba isba, ispaxtzꞌin̈na xin.

²⁵Yalni Comam tet ebnaj: —¿Tzet yin̈ xin mach cheyaco Comam Dios yipo heyanma? ẍi Comam. Caw xiw ebnaj, iscꞌayilo iscꞌul ebnaj, yallen ebnaj tet hunun: —¿Tzet yelapno ye huneꞌ naj winaj tiꞌ? Caw chisyije jakꞌekꞌ yeb ha haꞌ tzet chal naj, ẍi ebnaj yin̈ Comam.

²⁶Lahwi tuꞌ xin yecꞌ apno ebnaj iskꞌaxepicꞌto haꞌ lago yul ismajul Gadara yetcꞌulal Galilea.

²⁷Hayet yel Comam Jesús yul teꞌ barco istiꞌ haꞌ tuꞌ, yapni huneꞌ naj ay yul con̈ob tuꞌ iscꞌatan̈ Comam, ayco ischejab naj matzwalil yin̈ naj. Txꞌiꞌalxa tiempo istzabchati naj, matxaticꞌa chaco naj xil iskꞌap, matxa xin choche naj chicancano naj yul hunu n̈a, haxan̈e xolaj panteón yul camposanto chꞌecꞌ naj.

²⁸Hayet yilnito naj Comam Jesús, yah yaw naj, isjahbanoyo isba naj sata Comam, yalni naj yin̈ caw ip: —¿Tzet hawoc win̈an Jesús, Iscꞌahol Comam Dios caw aycano yip? Chinkꞌanan tawet mach chawakꞌ ecꞌoyaꞌ wanmahan, ẍi naj tet Comam.

²⁹Yal naj huneꞌ tuꞌ yuto ischejilo Comam ebnaj ischejab naj matzwalil yin̈ naj. Txꞌiꞌalxa el chietalax naj yu ebnaj ischejab naj matzwalil tuꞌ. Chꞌalaxico chꞌen cadena yin̈ iskꞌab naj yu anma, cat iscꞌalbalax yoj naj yu chꞌen cadena tuꞌ yun̈e machi bay chito naj, yaj chislin̈to naj chꞌen, cat yijbalaxto naj yu ischejab naj matzwalil bey txꞌotxꞌ desierto.

³⁰Iskꞌamben Comam tet naj: —¿Tzet habi? ẍi Comam. Istakꞌwican̈ naj tet Comam: —Legión inbihan, ẍi naj tet Comam. Hac tuꞌ yute yalni naj tet Comam yuto caw tzetcꞌa ebnaj ischejab naj matzwalil ayco yin̈ naj.

³¹Yalni ebnaj ischejab naj matzwalil tet Comam ta machi chalaxto ebnaj yu Comam bey yul huneꞌ niman xab.

³²Cꞌuxan xin tzetcꞌa noꞌ txitam lan̈an islo yin̈ iscꞌul witz iscawilal istiꞌ haꞌ lago tuꞌ. Yalni ebnaj ischejab naj matzwalil tet Comam ta chichejlaxto ebnaj yin̈ noꞌ txitam tuꞌ. Ishehla Comam tet ebnaj xin.

³³Hac tuꞌ xin yu yel ebnaj ischejab naj matzwalil yin̈ naj, yapnicano ebnaj yin̈ noꞌ txitam. Iskꞌojnito isba noꞌ sat pahaw, yay apno noꞌ yul haꞌ lago tuꞌ, ishikꞌnito noꞌ haꞌ.

³⁴Hayet yilni ebnaj tan̈em txitam huneꞌ tuꞌ, yelcan̈ ebnaj yin̈ an̈e, yalnicꞌo ebnaj yul con̈ob yeb xin tet macta pujanto yatut xolaj telaj.

³⁵Yuxin sunil anma apni ilno tzet yu tuꞌ. Hayet yapni anma bay ay Comam, yilni anma naj ayticꞌaco ischejab naj matzwalil yin̈, tzꞌon̈anayo naj yich yoj Comam. Ayxaco xil iskꞌap naj, caw tohol anmaxa naj, yuxin sunil anma tuꞌ caw xiwcan̈.

³⁶Haꞌ ebnaj ilni huntekꞌan tzet iswatxꞌe Comam Jesús tuꞌ, haꞌ ebnaj halni tet huntekꞌanxa anma apni ilno yin̈ tzet yu iscawxican̈ naj bay ayico ischejab naj matzwalil.

³⁷Yu huneꞌ tzet yu tuꞌ yuxin sunil anma ay bey yul ismajul Gadara tuꞌ oc halno tet Comam ta chiꞌel Comam yul ismajul Gadara tuꞌ, yuto caw xiw ebnaj yin̈ tzet yuhi. Yocto Comam yul teꞌ barco, ispaxto Comam.

³⁸Iskꞌanto isba naj bay el ischejab naj matzwalil tuꞌ yinta Comam. Yalni Comam tet naj ta chican naj bayticꞌa ay tuꞌ.

³⁹Yalnicano Comam tet naj: —Meltzan̈to hawatut, cat hawalnicꞌo iscꞌulal mayu Comam Dios tawin̈, ẍi Comam tet naj. Isto naj xin, ispujbanicꞌo naj yul con̈ob tzet yu iscawxican̈ naj yu Comam.

⁴⁰Lahwi tuꞌ xin ispaxto Comam Jesús bey iskꞌaxepicꞌto haꞌ lago. Hayet yapni Comam, caw chitzala anma sunil yuto caw echmabil Comam yu anma.

⁴¹Ay huneꞌ naj iswiꞌehal yeco yijbali yin̈ iscapilla ebnaj Israel, Jairo isbi naj. Apni naj iscꞌatan̈ Comam Jesús, yay jahno naj yich yoj Comam. Iskꞌanni naj tet Comam tato chito Comam bey yatut naj,

⁴²yuto ay hunpilan iscutzꞌin naj caw lan̈anxa iscami, cablahon̈ebxa habil ix. Hayet isto Comam Jesús yinta naj, caw chiswitz isba anma isto bulbon yinta Comam.

⁴³Xol anma tuꞌ xin, ayco huneꞌ ix yaꞌay, cablahon̈ebxa habil mach chilin̈i yay istxꞌahwobal ix. Wal xin xaꞌiscꞌaytzelo ix sunil tzet aya yu yan̈chahi, yaj maẍticꞌa huno mac kꞌoji yan̈ten ix.

⁴⁴Tzujanico ix xol anma ayco yinta Comam, ishitzico ix iscꞌatan̈ Comam, ispitni ix istiꞌ xil iskꞌap Comam. Lan̈antoticꞌa xin islin̈ina yay istxꞌahwobal ix.

⁴⁵Iskꞌambenilo Comam tet anma: —¿Mac anmahil huneꞌ manpitnihan? ẍi Comam. Yaj yal anma sunil ta machi mac pitni Comam. Yalni naj Pedro tet Comam: —Mamin, ¿tom mach chawila ta witzꞌan yehico anma tawin̈? Tzetcꞌa mac chistenico isba tawin̈, cat xin hakꞌambenpaxoj, ¿mac maquinpitnihan? cachi, ẍi naj tet Comam.

⁴⁶Yalni Comam xin: —Tzicꞌanab yin̈ machi mac heyalni, wal xin ay mac maquinpitnihan yuto mawabehan ta ay huneꞌ anma macawxinacan̈ yu wipan, ẍi Comam.

⁴⁷Hayet yilni ix ta mach chu yebanayo ix huneꞌ tuꞌ, toxan̈e chicꞌarla yah ix, yay jahno ix sata Comam. Yalnilo ix yin̈ sat sunil anma tuꞌ tzet yin̈ yuxin ispit ix Comam, yeb tzet yu yan̈cha ix yin̈ an̈e.

⁴⁸Yalni Comam tet ix: —Miyay, macachcawxican̈ yuto maxawayto yul hawanma win̈an. ¡Paxan̈toj! Maꞌoc hawanma yul yehobal, ẍi Comam tet ix.