Irocas 8:21-48

²¹Yotabitaiganaqueri Jesos: —Inato aisati igue iriantiegui quemaigabaquero Irinibare Tosorintsi, iquemisantaiguëro. Icaegui irianti quemisantatsiri nomatsiguengatacari.

²²Basiniquë cataguiteri yotetaigacaro pitotsi Jesos aisati irogomere, icantaiguëri: —Intsome omontiaiganaquima antatinta angaare. Aro iátocotaiguë,

²³páigotanëri coguentima. Inariaca Jesos isamasegui. Omanapague pipoque oquibeguinte coguentima, omotoncaatanë nija, potiatanaca pitotsiquë, pënibaqueme iritsiticoiganaque.

²⁴Iátasiqueri Jesos, icabocapëri, icantaiguëri: —¡Ogometinari! ¡Ogometinari! ¡Atsiticoiguëni! ¡Pigabisaicotái! Icaguitë Jesos, icanque: —Omairiatanaeta angaare, osantocotanaeta coguentima. Aito cara omairiatasantanai angaare, osantocotanai coguentima.

²⁵Icantaiguëri irogomere Jesos: —¿Pairo te pinguemisantobitina? Itsorogasantaiganaque irogomere, iquenganeintasantaigacari icantobaca: —¿Pairi Ica? Inibatë, aro oquemisantasantanëri coguentima aisati angaare. Yoguimairenquero.

²⁶Ipaniaigaca Garireaquë Jesos aisati irogomere, yaretocotaigapa antatinta Gararaquë.

²⁷Cara yagatanë, yaguëtanë Jesos, iniobëri Gararasati inancari camagari. Cosamani te inguitsagatima iguitsagare, te intime pongotsiquë, carari itimi cara itia camatsirini.

²⁸Cara iniopëri Ira Jesos, yobaticagueritotasitobacari, icaimapëri icampë: —¿Pairo pinganquena? Nigóquimi, Jesos, Obiro Itomi Tosorintsi jonoquënintaberi. Quero pitsipiriacaguina.

²⁹Icaimë negaca aroquenta igáqueri Jesos iriátabitsatiri sërari. Igóque camagari cara irojoqueri Jesos. Tojai yágapininqueri camagari ira sërari. Aisati tojai yoguëshotapinintaigabitacari imatsiguenga sogatsaquë coshori cara ibacoquë aisati iguitiquë, carari itimishairo yobëshopiantairo te iragabiaigueri. Ira camagari yáganëri cara tera ontimingani.

³⁰Yosamitëri sërari Jesos: —¿Pairo pijita? Yotabitanëri sërari: —Tojai najita. Icanque tojai aroquenta inantaigacari arosonori camagari.

³¹Yamanaiguëri cara quero igátaiguiri iriáiguë omoroquë játaque tsomaguisonori.

³²Ainta inaigasegui arosonori chancho yapaigasegui cara tongagariquë. Aro yamanaiguëri Jesos camagari: —Aroca pijocaiguëna, pigátaiguena cara chanchoeguiquë ninampëmari iriro. Yotabitanëri Jesos: —¡Atsi pijáigue!

³³Aro iátopitaiguëri sërari camagari, inantaigapari ira chanchoegui. Aro isigaiganaca chancho cara tarangaquë, imatsematseiganaque angaarequë tobotn tobotn tobotn. Itsiticaiganaque ijogataiganaca omagaro chancho.

³⁴Aro ira omisantaiguiri chancho isigaiganaca icomantagueigapëri imatsiguenga cara poeboroquë aisati togantsiquë.

³⁵Aique iátasitaiguëri Jesos tojai Gararasati iraniaiguëro omagaro ati ocanta. Iniaigapëri Jesos aisati ira inantabeca camagari. Ainta isobiaque iguitiquë Jesos, iquitsagata, iquengaa inibatë caninasati. Itsorogaigapë matsiguenga.

³⁶Ira netsaiguëro antagaisati icomantasantaigabaqueri basini ati icanta Jesos yogabisaicoqueri ira inantabeca camagari.

³⁷Aro omagaro Gararasati itsorogaiguëri Jesos, yamanaiguëri: —Atsi pijátaje yamai, quero pipocaji yaca aisati. Aro yotetanaa Jesos pitotsiquë, pënibaque iriátëgotë,

³⁸ira inantabeca camagari yamanabecari Ira Jesos: —Nocoguini naguiatanëmi. Carari te iranintacaguiri Jesos, icanqueri:

³⁹—Quero pipoqui. Pijátasitiri pomatsiguenga cara pobangoquë, pingomantiri ora icanquemi Tosorintsi tojai icábintsëmi. Aique iáque sërari icomantagueantapë omagaro Gararasati ati ocanta cara yogabisaicoqueri Jesos.

⁴⁰Aique imontiaigapaa Jesos aisati irogomere. Yoguiaigabaqueri tojai matsiguenga, yágacaninataigabaqueri.

⁴¹Itonguibocari sërari jitacha Jairo. Iriro obatacaguiri jorío cara pongotsiquë cara yapatotaiga. Yobaticagueritotasipari iguitiquë Jesos, yamanopëri icanqueri: —Intsome nobangoquë.

⁴²Pënibaque ongamaque nasinto. Ainta paniro irisinto, ocarati osarinite 12. Cara iáigasegui, itsinatsinataiganaqueri matsiguenga tojai.

⁴³Ainta tsinane piraaseque cosamani ocarati 12 osarini. Pipënabentaguetabecari jompiantatsiri omagaro ora pasinta, te aropei ongantima, te iromitocotëmatiro.

⁴⁴Aro piátasiqueri itisitaquë Jesos potsagaqueri cara ocarati iguitsagare. Aito cara pibeganaa, ocaratanai oraa.

⁴⁵Aro Jesos yosamitë icanque: —¿Pairi otsagaitënaro naguitsagare? Yotabitaiguëri antagaisati: —Teni pairi otsagatimine. Aique icanqueri Peroro aisati basini tsipacari: —Ogometinari, ishongaiguëmi tojai matsiguenga itsinatsinataiguëmi.

⁴⁶Carari icanqueri Jesos: —Ainta otsagaquina. Nigónijinca cara pogaguibegajiro natasorintsite.

⁴⁷Aro pigóque tsinane cara igóquero Jesos, aro parepari omogomogoatapa, pobaticagueritotasipari ocomantapëri: —Naro otsagaquero piguitsagare; iroro nibegantanaa cara niraaseinteque.

⁴⁸Yotabitanëro Jesos: —Nomatsiguenga, aroquenta piquemisanquina nogaguibegajimi. Yamai pijáte pingaigasëretanë, pomagoriasëretanë.