Luka 8:21-48

²¹Ia arinadi i heuio i ribalau aridi eai, i ene, “Sinagu eo egu tataoyao isi ede Eaubada ena riba se ataiei, eo se abiwatai hinage.”

²²Asubena esau eai, i gerusae waga eai ena heaheatayao maenayao: i ribalau aridi eai, i ene, “Ta lau gabogabo hari sana awasi eai.” Isi abo se geru.

²³Ma adaudi na ie eno: gabogabo eai mana lailai abo i lagelagei; ma esega abo butubutu se iniinisae waga alona i hemonau, se adau baaea.

²⁴Arinai abo se lau ia se hanoi, si ene, “Tanuagamai e, abo ta mate!” Ia abo i toro, mana eo butubutu lailai wa i ribahetarudi: se lautom, abo i daumori.

²⁵I ribalau aridi eai, i ene, “Emi sunuma wa haedi?” Isi se matausi se noonooei, se heunaboisaha, si ene, “Tau ta ie saha? mana eo butubutu i lauhesomdi, eo ia se awaabiei?”

²⁶Isi se duna Gerasene tataodi edi oea eai, Galilaia hari sana awasi eai.

²⁷Ia i pesao, tau esau eanua eai i laoma se hailobai, huia lohaloha demoni ia se lui, lulu nige i luidi, eo nige ie mia numa alo eai, bousa eai mo i miamia.

²⁸Ia Iesu ie ita, i eabalailai, matana eai ie guri, i arina lailai, i ene, “Iesu Eaubada Saesaeariri Natuna e, saha abo u abi arigu eai? Ea awanorilaoa tabu u heamamnagu.”

²⁹(Paana ia earua biibiina i lauhesom tau boeana eai wa i lulagema. Huia gamagari earua tau wa i toatoai: maina poasi eo poasi adidiri arinai tau wa se auaui; maina wa i hetautusidi eo demoni wa ia i henau barabara eai.)

³⁰Iesu i hesiolau ia arinai, i ene, “Oa esam wa?” Ia i ene, “Legeona”: paana demoni gamagaridi ia boeana eai se lui.

³¹Isi se awanorilau ia arinai tabu i lauhesomdi se lau gabotum eai.

³²Metai sarai eawoidi lailai oea eai se aibai: se awanori ia arinai bena se lulau isi boeadi eai. Ia abo ie eari.

³³Demoni wa tau wa abo se pesagabaei, se lulau sarai boeadi eai: eawoidi wa abo se haidagoidi se lau malasarisari eai, se beu gabogabo eai, abo se galamosi.

³⁴Tauheaidi wau wa se ita, abo se dago, se lau eanua eai eo oea eai se wasaduaiei.

³⁵Isi abo se pesa se lau se ita; se laoma Iesu arinai, tau wa demoni se laugabaei wa, i bawabigabiga Iesu aena gegesina eai, ana lulu i lui, eo nuana i sibasibao: arinai isi se matausi.

³⁶Headi laulau wa matadi eai se ita se ribaei laulau sahasaha se abiabiei, arinai demoni tauluina se hemauri.

³⁷Gerasene oeadi se hetaiiri tataodi gamagaridi se awanorilau ia arinai bena i laugabaedi; paana isi matausi lailai se hearo: abo i gerusae waga eai, ie uio.

³⁸Tau wa, demoni se pesagabaei wa, i awanori Iesu arinai bena maena se mia. Iesu mo i hetamari, i ene,

³⁹“U uio em numa eai, ginauri saesaedi Eaubada i abidi arim eai u hemasarahadi.” I lau ena dobila eai, eanua se ohihai, wau abiabina wa Iesu ie abi ia arinai, i heribadi.

⁴⁰Iesu ie uio, tatao gamagaridi maenayao se hailobai matadi se soasoari: paana gamagaridi ia se nuanuaiei.

⁴¹Na tau esau i laoma esana Iairo, ia sunago tanuagana esau: i guridobi Iesu aena eai, i awanori ia arinai, bena i laoma ena numa eai.

⁴²Ia natuna siu esega mo, ena borimai saudoudoi‐labui, ia ie ota matena i hanahanaui.

⁴³Sine esau asiebo osina ie abi borimai saudoudoi‐labui, ena moni gamagari i moseohi doketa aridi eai, nige esau ia i helolo.

⁴⁴Ia Iesu murina eai i laoma, ana lulu dedeana i abiita: ma esega abo asiebo osina i lautom.

⁴⁵Iesu i ene, “Eai i abiitaguma?” Gamagaridi se harere, abo Petero ma ana sasaguyao si ene, “Tanuagamai e, moutuana wa se lauihiihiem, eo se heduheduiahalaim, hinage u ene, Eai i abiitaguma?”

⁴⁶Iesu i ene, “Esau i abiitagu: paana ea nuatuiyao gigiborigu i leyao.”

⁴⁷Sine wa ie ita ia nige i tauyamuyamui, i laoma ma tabutabubuna ia matana eai i guridobi, eo tatao gamagaridi matadi eai Iesu ena abiitana paana i riba hemasaraha, eo ma esegana i mauri.

⁴⁸Ie ribalau ia arinai, i ene, “Natugu e, nuam ie taru: em sunuma eai u mauri; ma nuabigabigam u lau.”