SALMOS 78:67-72

⁶⁷Pero Toteco quintahuelcajqui nopa huejhueyi familias cati hualajqui ten José huan Efraín.

⁶⁸San quintapejpeni ihueyi familia Judá, huan nopa tepet Sion cati yaya tahuel quiicneliyaya.

⁶⁹Huan nopona quichijchijqui itiopa cati cuajcualtzi huan temachti, huan cati huejcahuasquía para nochipa quej huejcahua ilhuicacti huan taltipacti.

⁷⁰Quitapejpeni itequipanojca, David, quema quinmocuitahuiyaya borregojme,

⁷¹quema yahuiyaya inintepotzco nopa tena borregojme cati quinpiyayayaj ininconehua, huan quinhualicayaya para ma quinmocuitahui. Huan Toteco quichijqui David ma quinyacana imasehualhua, nopa israelitame cati quintapejpenijtoya para iaxcahua.

⁷²Huan quena, David quinmocuitahui imasehualhua Toteco ica nochi ichicahualis huan ica nochi iyolo.