SALMOS 78:4-57

⁴Quena, nimechmatiltis para anhuelise anquinpohuilise amoconehua nochi nopa cuajcualtzitzi huan huejhueyi tamanti, cati TOTECO quichijqui ica ihueyi chicahualis.

⁵Toteco Dios quimacac miyac tanahuatilme Jacob ipan tali Israel para ma monejnemiltica xitahuac, huan quinnahuati tohuejcapan tatahua ma quinnextilica ininconehua,

⁶huan iniixhuihua cati tacatise teipa. Huan quej nopa nochi masehualme quinixmatise itanahuatilhua Toteco.

⁷Yeca hasta ama miyac masehualme quintepanitaj itanahuatilhua Toteco Dios, huan motemachíaj ipan ya para quinmocuitahuis. Huan amo ma quielcahuaca nochi nopa huejhueyi tamanti cati quichijtoc Toteco. Monequi ma quitoquilijtinemica nochi itanahuatilhua.

⁸Pampa amo quinamiqui para elise quej inihuejcapan tatahua cati moyoltetilijque huan amo tatepanitaque. Inijuanti amo elque temachme ica Toteco Dios, yon amo quimactilijque iniyolo, yon ininemilis.

⁹Nopa masehualme ten tali Efraín mocuepatoj huan cholojque ipan nopa tonali quema yahuiyayaj tatehuitij. Quena, cholojque masque quipiyayayaj miyac teposti para tatehuise.

¹⁰Amo quintepanitaque itanahuatilhua Toteco Dios, huan amo quinejque nejnemise ipan iojhui.

¹¹Quielcajque nochi tamanti cati yaya hueli quichihua. Amo quielnamijque nopa cuajcualtzi tiochicahualnescayot cati quichijqui Toteco.

¹²Quena, Toteco Dios quichijqui miyac tamanti iniixpa inihuejcapan tatahua ipan tali Egipto campa itoca Zoán.

¹³Quitajcoxelo nopa hueyi at huan quichijqui ma panoca. Ipan ome lados nopa at moquetzqui quej tepamit.

¹⁴Tonaya quinyacanqui ica se mixti para quinecahuilis, huan ica tayohua ica se mixti cati taahuiyaya quej tit.

¹⁵Ipan huactoc tali quitapo nopa hueyi tet huan quisqui miyac at para atique hasta aixhuique.

¹⁶¡Quena, ipan tet quisqui miyac at cati motalo quej se hueyat!

¹⁷Pero inijuanti quisenhuiquilijque amo quitepanitaque. Huan nepa campa huactoc tali tajtacolchijque ica Toteco Cati Más Hueyi.

¹⁸Pampa quiyejyecojque Toteco Dios huan quitajtanijque tacualisti cati iniyolo quinequiyaya.

¹⁹Hasta cualanque ica Toteco huan quiijtojque: “¿Huelis Toteco Dios techtamacas ipan ni huactoc tali?

²⁰Xiquitaca, Toteco Dios quitapo nopa hueyi tet huan quisqui miyac at quej elisquía se hueyat hasta atzonpoli tali, pero ¿huelis nojquiya hueli techmacas tacualisti? ¿Huelis techtamacas tiimasehualhua ica nacat?”

²¹Huan quema TOTECO quicajqui ni tamanti, tahuel cualanqui. Huan ipan icualancayo quisqui tit ica israelitame, inijuanti cati iixhuihua Israel,

²²pampa inijuanti amo quineltocaque Toteco Dios, yon amo motemachijque ipan ya para quipiya chicahualisti para quinmaquixtis.

²³Pero masque quej nopa quichijque, Toteco Dios quinahuati nopa mixti huan quitapo ilhuicacti.

²⁴Huan quichijqui ma huetzi nopa tacualisti cati itoca maná para ma quicuaca quej quema huetzi at. Quinmacac tacualisti cati hualajqui ten ilhuicac.

²⁵Masehualme quicuajque cati elqui inintacualis ilhuicac ehuani. Quena, quintamacac hasta cuali ixhuique huan hasta mocajqui nopa tacualisti.

²⁶Ica ihueyi chicahualis quihualicac nopa ajacat cati huala campa quisa tonati huan cati huala ica tani para ma taajaca campa ilhuicacti.

²⁷Quichijqui ma hualaca miyaqui totome quej imiyaca taltepocti. Quena, hualajque totome quej mixti huan quej imiyaca xali cati onca iteno hueyat.

²⁸Huan Toteco quichijqui para nopa totome ma huetzica tatajco campa quichijtoyaj iniyoyoncal.

²⁹Huan nopa masehualme tacuajque hasta ixhuique. Toteco quinmacac nacat quej iniyolo quinequiyaya.

³⁰Pero quema sanoc tantoyaj tacuaj, huan hasta noja quipixtoyaj nacat ipan inincamac,

³¹Toteco Dios motananqui ica ihueyi cualancayo, huan quintzontamilti nochi nopa telpocame cati más tapejpenilme ipan tali Israel.

³²Pero masque Toteco quinchihuili ya nopa, nopa masehualme quisenhuiquilijque tajtacolchijque, huan amo quineltocaque nopa huejhueyi tiochicahualnescayot cati yaya quichijqui iniixpa.

³³Yeca Toteco quintaijyohuilti ipan nochi ininemilis huan quintzontamilti san ica se talojtzi.

³⁴Pero teipa, quema ya quintzontamiltijtoya sequij, huajca quena, ne sequinoc quitemojque Toteco Dios. ¡Quena, nimantzi mocuetque huan quitoquilijque!

³⁵Huan quielnamijque para yaya Toteco Dios cati quinmocuitahuiyaya para amo quinajsis cati amo cuali. Huan quielnamijque para Toteco Cati Más Hueyi san yaya inintemaquixtijca.

³⁶Pero nopa israelitame amo quitoquiliyayaj ica nochi iniyolo. ¡Amo! Quitoquiliyayaj san ica inincamac.

³⁷Pampa iniyolo eltoya huejca ten Toteco. Huan amo quichihuayayaj cati quitajtolcahuilijtoyaj Toteco para quichihuase.

³⁸Pero Toteco quipixqui hueyi iyolo ica inijuanti. Quintapojpolhuiyaya inintajtacolhua huan amo quintzontamiltiyaya. Miyac huelta quitilquetzqui icualancayo para amo quintatzacuiltis.

³⁹Pampa Toteco quielnamijqui para inijuanti san elij masehualme cati ininemilis ixpolihui san ica se talojtzi, huan amo quema mocuepaj sempa.

⁴⁰Nepa ipan huactoc tali, tahuel miyac huelta amo tatepanitaque ica Toteco Dios huan quiyolcocojque.

⁴¹Talojtzitzi quiyejyecojque, huan ica ya nopa quichihualtiyayaj para Toteco ma quintzontamilti. Yon amo quicahuilijque para Toteco ma quintiochihua, yaya cati ininDios israelitame huan cati Tatzejtzeloltic.

⁴²Quielcajque ihueyi chicahualis huan iteicnelijcayo. Huan quielcajque quenicatza quinmanahui inimaco inincualancaitacahua.

⁴³Quielcajque quenicatza Toteco quititanqui tatzacuiltili ipan Zoán ipan tali Egipto.

⁴⁴Quielcajque quenicatza quicuetqui esti nopa at huan ayecmo aqui huelqui quiic.

⁴⁵Quielcajque quenicatza quintitanqui tahuel miyac sayolime hasta quitemitijque nopa tali. Quielcajque quenicatza nopa temasolime quitemitijque nopa tali Egipto.

⁴⁶Toteco quintitanqui ocuilime huan chapolime para ma quicuaca inintatochui huan ininpixquilis.

⁴⁷Ica tesihuit quitzontamilti inixocomecamil huan inihiguera mil.

⁴⁸Inihuacaxhua mijque ipan potrero pampa Toteco Dios quinmajcahuili tesihuit cati tahuel huejhueyi. Huan ininborregojhua mijque ica tapetancayot.

⁴⁹Quena, Toteco tahuel cualanqui ica inijuanti, huan yeca quintitanili tacuajcualocayot huan taohuijcayot. Huan quintitanili se grupo ten ilhuicac ehuani cati tetzontamiltíaj.

⁵⁰Cualanqui nelchicahuac huan amo quimanahui yon se Egipto ejquet. Senquisa quintitanili tatzacuiltili huan huejhueyi cocolisti.

⁵¹Teipa Toteco quinmicti nopa achtohui ehuani ipan sese familia ten tali Egipto. Quena, quinmicti cati elqui ininachtohui fuerza quema pejque quinpiyaj coneme.

⁵²Pero quinquixti imasehualhua quej elisquíaj pilborregojtzitzi, huan quinyacanqui ica cuajcualtzi ipan nopa huactoc tali.

⁵³Quinyacanqui ica miyac temachili para ma amo majmahuica. Pero nopa hueyi at quinatzonpolihuilti inincualancaitacahua.

⁵⁴Huan quinhuicac hasta campa inepa nopa tali cati tatzejtzeloltic. Nopa tali cati quipiya miyac tepeme cati Toteco quintanili para inijuanti.

⁵⁵Iniixpa quinquixti nopa masehualme cati itztoyaj ipan nopa tali. Teipa quitamachijqui huan quinmajmacac nopa huejhueyi familias ten israelitame para iniaxca. Huan nopona quincajqui ma itztoca.

⁵⁶Pero masque quinchihuili ya nopa, inijuanti quisenhuiquilijque quiyejyecohuaj huan quicualancamacaj Toteco Cati Más Hueyi. Huan amo quinejque quitepanitase icamanal.

⁵⁷Yeca mocuetque para amo calaquise ipan nopa tali tatencahuali huan quicamaijixnamijque san se quej inintatahua quichijque. Huan quej se cuataminti cati huijcoltic amo yahui xitahuac quema quimajcahuaj, inijuanti nojquiya amo yajque xitahuac para quichihuase ipaquilis Toteco.