Yaburina 78:4-57

⁴en mi ne luxunɲɛ en ma diine ma. En Alatala matɔxɔ feene nun a sɛnbɛn nun a kabanako feene falama en mamanden famatɔne xa.

⁵A bata tɔnne so Yaxuba bɔnsɔnna yii. A mɔn yi sariyan so Isirayila yii. A en fafane yamari, a e xa e diine xaran na ma,

⁶alogo muxu famatɔne xa e kolon. Hali diin naxanye munma bari singen, ne fan yi a fala e diine xa.

⁷Nayi, e fan e yigi sama Ala fari nɛn. E mi fa ɲinanma a wanle xɔn ma, e yi a yamarine suxu.

⁸Nayi, e mi luma alo e benbane yi kii naxan yi nun. Tengbesendene nun murutɛdene nan yi ne ra nun naxanye mako mi yi Alaa fe yi, e mi yi tɔgɔndiyaxi Ala ma.

⁹Xanla yi Efirami bɔnsɔnna muxun naxanye yii, ne e gi nɛn yɛngɛn lɔxɔni.

¹⁰E Alaa layirin nabeɲin, e tondi a sariyan suxɛ.

¹¹E ɲinan nɛn Ala kɛwanle xɔn, a kabanako feen naxanye yitaxi e ra.

¹²A kabanako feene liga nɛn e benbane yɛɛ xɔri Misiran yamanani, Soyan yi.

¹³A yi fɔxɔ igeni taxun a tagi a yi e ragidi. A yi a liga igene yi mate ayi e bode fari alo banxi kankena.

¹⁴A ti e yɛɛ ra yanyin na kundani. A mɔn yi ti e yɛɛ ra kɔɛɛn na tɛɛ dɛgɛni.

¹⁵A fanyeni bɔ tonbonni, a yi tigin namini, e yi e min.

¹⁶A yi xuden namini gɛmɛne yi, igen yi godo alo baana.

¹⁷Koni e lu yulubin ligɛ a ra, e murutɛ Kore Xɔnna Ala ma tonbonni.

¹⁸E yi a nata, a e xa Ala bunba, e yi e waxɔn donseen maxɔdin Ala ra.

¹⁹E yi Ala mafala, e naxa, “Ala nɔɛ donseen naminɛ tonbonni ito yi ba?

²⁰A to gɛmɛn bɔ, igen nan mini ayi yati, koni a nɔɛ burun nun suben soɛ a muxune yii ba?”

²¹Na ma, Alatala e xuiin mɛxina, a fitina. A yi xɔlɔ Isirayila ma, tɛɛn yi mini Yaxuba bɔnsɔnna xili ma.

²²Amasɔtɔ e mi yi laxi Ala ra, e mi yi e yigi saxi a marakisini.

²³Koni a yi kuyen yamari, a koren dɛɛne xa rabi,

²⁴a yi Manna donseen nagodo e ma, a ariyanna donseen so e yii.

²⁵Adamadiine yi malekane burun don. Ala yi donseen nasiga e ma han e lugo.

²⁶Ala yi foyen nafa keli sogetede binna ra. A mɔn yi foyen namini yiifanna ma a sɛnbɛn na.

²⁷A yi xɔline ragodo e ma naxanye yi wuya alo baan mɛɲɛnsinna.

²⁸E yi yolon e daaxaden tagi e bubune rabilinni.

²⁹Yamaan yi e dɛge han e lugo. E yi waxi naxan xɔn ma Ala na so nɛn e yii.

³⁰Koni benun e xa wasa, donseen mɔn yi e dɛ,

³¹Ala yi xɔlɔ e ma, a yi e sɛnbɛmane faxa, Isirayila banxulanne.

³²Hali na birin to liga, e mɔn lu nɛn yulubin ligɛ! Hali a to kabanako feene liga e mi dɛnkɛlɛya.

³³Nayi, a yi e dunuɲa yi gidin lu fuuni, han e yi faxa kuisanni.

³⁴A to ndee faxa, a dɔnxɛne yi tubi, e yi Ala fen sɔbɛɛn na.

³⁵A yi rabira e ma fa fala Ala nan e kantan fanyen na, a Kore Xɔnna Ala nan yi e xunba muxun na.

³⁶Koni e falane mi yi fixaxi, e yi wulen nan falama a xa.

³⁷E mako mi yi Alaa fe yi, e mi yi tinxinxi Ala layirini.

³⁸Koni bayo a kininkinin, a yi e hakɛne mafelu. A mi e halagi. A xɔlɔn lu dɔxɔɲa ma wuyaxi, a mi fitina e xili ma.

³⁹A a kolon fa fala daɲɔxɔn nan tun e ra, e siimayaan luxi nɛn alo foyedina naxan danguma a mi xɛtɛ.

⁴⁰E murutɛ Ala ma nɛn tonbonni sanɲa ma wuyaxi. A yi sunu e fe ra burunna ra sanɲa ma wuyaxi!

⁴¹E yi Ala bunbama yɛ yo yɛ. E yi a liga Isirayilaa Ala Sariɲanxin yi xɔlɔ.

⁴²E ɲinan nɛn a sɛnbɛ gbeen xɔn, e nun a e xunba e yaxune yii lɔxɔn naxan yi.

⁴³E ɲinan nɛn a taxamasenne xɔn Misiran yi, e nun a kabanako feen naxanye liga Soyan yi.

⁴⁴A yi e baane findi wunla ra. Ige yo mi yi na nun Misiran kaane yi naxan minɲɛ.

⁴⁵A tugetuge xɔlɛne rasiga e ma naxanye e don. Xunɲɛne fan yi e bɔxɔn kala.

⁴⁶A e siseene so suɲɛne yii. A bogiseen birin so tuguminne yii.

⁴⁷A yi e wudi binle kala balabalan kɛsɛne ra. A yi e xɔdɛ binle kala xunbenla ra.

⁴⁸A yi e ɲingene faxa balabalan kɛsɛne ra. Galanna yi e xuruseene faxa.

⁴⁹A fitinaxin yi a xɔlɔ ɲaxin nun a bɔɲɛ teen nun a maraɲaxun nagodo e ma. Halagi ti ganla nan yi ne ra.

⁵⁰A mi xɛtɛ a xɔlɔn fɔxɔ ra, a mi tin e niine yi rakisi, a yi e faxa fitina furene ra.

⁵¹A yi dii sarane faxa Misiran denbayaan birin yi. Xami a denbayane dii singene birin naxanye singe e fangan mayita.

⁵²A yi fa a yamaan na keli Misiran yi alo xuruse kuruna. A yi e kantan burunna ra.

⁵³A yi ti e yɛɛ ra, sese mi e sɔtɔ, nanara e mi gaxu. Koni fɔxɔ igen yi a ragali e yaxune ma.

⁵⁴A yi fa e ra a bɔxɔ sariɲanxini na geyaan ma a naxan sɔtɔ a sɛnbɛn xɔn.

⁵⁵A siya gbɛtɛne kedi nɛn a yamaan yɛɛ ra, a yi e bɔxɔne yitaxun e ra. A yi Isirayila bɔnsɔnne rasabati e konne yi.

⁵⁶Koni e yi murutɛ Kore Xɔnna Ala ma, e yi a bunba. E mi e xaxili lu a maxadi xuine xɔn,

⁵⁷e yi e masiga a ra, e yanfan ti alo e benbane. E mi fa tinxinxi alo xalimakuli yidɔxina.