يَبُرَ 78:4-57

⁴مُشُ مُ نٍيٍ نْشُنمَ عٍ بْنسْييٍ مَ، مُشُ عَلَتَلَ شَ مَتْشْي قَلَمَ نّ عٍ شَنبِرَتِيٍ بّ، مُشُ عَ سّنبّ نُن عَ شَ كَابَنَكٌي مَسٍنمَ نّ عٍ بّ.

⁵عَلَ بَرَ يَامَرِيٍ مَسٍن يَشُبَ بّ، عَ سّرِيّ سَ عِسِرَيِلَ بْشِ كُي، عَ وٌن بٍنبَيٍ يَمَرِ عٍ شَ نَ مَسٍن عٍ شَ دِيٍ بّ،

⁶عَلَكٌ دِ نَشٍيٍ قَمَ تِنَ، نٍيٍ شَ نْ عَ كٌلٌندٍ، عٍ قَن شَ عَ مَسٍن عٍ فبٍ دِيٍ بّ عٍ قَمَ نَشٍيٍ بَرِدٍ.

⁷نَ كُي عٍ قَمَ عٍ شَ لَنلَنتٍيَ سَدٍ عَلَ مَ، عٍ مُ نّيمُمَ عَ شَ وَلِ شُنفبٍيٍ مَ، عٍ عٍ حْشْ سَمَ نّ عَ شَ يَامَرِيٍ شْن مَ.

⁸عٍ مُ لُمَ عَلْ عٍ بٍنبَيٍ، نَشٍيٍ تُلِ شْرْشْ، نَشٍيٍ قِندِ مَتَندِلَيٍ رَ، نَشٍيٍ تُن مُ رَبّشِ، نَشٍيٍ شَشِلِ مُ تِشِ عَلَ كٍرٍن نَ.

⁹عٍقِرَ مِكَيٍ شَلِ كَنيِيٍ نَشَ عٍ كٌبٍ سٌ فٍرٍ رَ،

¹⁰عٍ مُ عَلَ شَ سَاتّ رَكَمَلِ، عٍ مُ بِرَ عَ شَ سّرِيّ قْشْ رَ.

¹¹عٍ نَشَ نّيمُ عَ شَ وَلِ مَفَاشُشِيٍ رَ، عَ نُن عَ شَ كَابَنَكٌي رَ عَ نَشٍيٍ مَسٍن عٍ بّ.

¹²عَ كَابَنَكٌ رَبَ نّ عٍ بٍنبَيٍ يَ شْرِ مِسِرَ، سٌوَن قِيلِ مَ.

¹³عَ نَشَ بَا عِبْو، عَ عٍ رَفِرِ، عَ يٍ رَتِ عَلْ بِلِشِ.

¹⁴عَ نَشَ عٍ رَحّرّ نُشُي سَابُي رَ يَنيِ رَ، عَ نَشَ عٍ رَحّرّ تّ يَنبّ رَ كْي رَ.

¹⁵عَ نَشَ قَنيٍ عِبْو فبٍنفبٍرٍنيِ مَ، عَ يٍ فبٍفبٍ رَ مِنِ نَ كُي عَلْ دَبٌنيِ.

¹⁶عَ نَشَ يٍ رَ مِنِ فّمّ لٌنفٌرِ رَ، عَ لُ عَلْ شُرٍ.

¹⁷كْنْ عٍ مُ فبِلٍن عٍ شَ يُنُبِ رَبَقٍ قْشْ رَ، عٍ قَ عَلَ مَتَندِ فبٍنفبٍرٍنيِ مَ.

¹⁸عٍ نَشَ عَلَ مَتٌ دٌنسٍيٍ مَشْرِنقٍ رَ.

¹⁹عٍ نَشَ عَلَ مَبٍرٍ عَ قَلَقٍ رَ، «عَلَ نْمَ وٌن نَبَلٌدٍ يِ فبٍنفبٍرٍنيِ كُي؟

²⁰عَ بَرَ يٍ رَ مِنِ قَنيٍ كُي، كْنْ عَ نْمَ تَامِ قَن قِدٍ عٍ مَ؟»

²¹عَلَ تٌ نَ مّ، عَ نَشَ شْنْ كِ قَنيِ رَ، عَ قَ تّ رَدّشّ يَشُبَ شَ حَمَ شِلِ مَ، عَ قَ شْنْ عِسِرَيِلَ حَمَ مَ،

²²بَرِ مَ عٍ مُ نُ لَشِ عَلَ رَ، عٍ مُ عٍ شَشِلِ تِشِ عَ شَ كِسِ رَ.

²³نَ كُي عَلَ نَشَ يَامَرِ قِ كٌورٍ نَادّيٍ شَ رَبِ،

²⁴«مَنَ» شَ فٌرٌ عٍ مَ بَلٌي رَ، نَشَن قِندِ كٌورٍ تَامِ رَ.

²⁵بِرِن نَشَ نَ سّنبّمَيٍ شَ تَامِ دٌن، عٍ قَ وَ سَ نَ رَ.

²⁶عَلَ نَشَ قٌيٍ رَقَ كٍلِ سٌفٍتٍدٍ بِرِ، عَ قٌيٍ رَقَ عَ سّنبّ رَ كٍلِ يِرٍقَنيِ مَ،

²⁷نَشَن عَ نِيَ شْنِيٍ شَ فٌرٌ عٍ مَ عَ فبٍفبٍ رَ عَلْ شُبٍ نُن بَا دّ مّيّنيِ.

²⁸عَ نَشَ عٍ فبٍفبٍ رَيٌلٌن عٍ يٌنكِندٍ تَفِ، عٍ شَ كِرِ بَنشِيٍ رَبِلِنيِ مَ.

²⁹عٍ نَشَ نَ دٌن هَن عٍ وَ سَ. عَلَ نُ بَرَ عٍ هَيِ لِ.

³⁰كْنْ هَلِ عٍ تٌ نُ بَرَ دٌنسٍ سْتْ، عَ مُ بُ

³¹عَلَ شَ شْنّ مَن نَشَ فٌرٌ عٍ مَ، عَ عِسِرَيِلَ سّنبّمَيٍ نُن عٍ قٌنِكٍ قَشَ.

³²هَلِ نَ بِرِن تٌ رَبَ، حَمَ مُ تِن فبِلٍندٍ عٍ شَ يُنُبِيٍ قْشْ رَ. عٍ مُ لَ عَلَ شَ كَابَنَكٌي رَ.

³³نَ كُي عَ نَشَ عٍ لُ عٍ شَ قُيَنتٍ كُي، هَن عٍ شَ قٍ نَشَ رَحْن فَاشُي كُي.

³⁴قٌ قَشّ نَ دُتُن عٍ مَ، عٍ قَ سٌ عَلَ قٍنقٍ، عٍ عٍ يّتّ رَفبِلٍن عَ مَ،

³⁵عٍ عٍ رَتُ عَ عَلَ نَن عٍ سّنبّ رَ، عَ عَلَ شِلِ شُنفبٍ كَنيِ نَن عٍ رَكِسِمَ رَ.

³⁶كْنْ عٍ نُ وَ مَ عَ مَدَشُقٍ عٍ شَ وْيّنيِيٍ نَن نَ، عٍ وُلٍ قَلَ عَ بّ عٍ دّ رَ.

³⁷عَ شَ قٍ مُ نُ نَ عٍ بْحّ مَ، عٍ مُ نُ بِرَ مَ عَ شَ سَاتّ قْشْ رَ.

³⁸كْنْ عَلَ تٌ قِندِ هِننّنتٍ رَ، عَ نَشَ عٍ شَ يُنُبِيٍ شَقَرِ، عَ عٍ حَشَنكَتَقٍ لُ نَا. عَ نَشَ دِحّ عٍ مَ سَنيَ وُيَشِ، عَ مُ تِن عَ شَ شْنّ بِرِن شَ مِنِ.

³⁹عَ نُ عَ كٌلٌن عَ بّندّ نَن تُن لَنشِ عٍ مَ، عٍ حّنفِ نَ دَن، عَ مُ فبِلٍن سْنْن.

⁴⁰سَنمَيَ يٍرِ عٍ مُرُتَمَ عَ مَ فبٍنفبٍرٍنيِ مَ، سَنمَيَ يٍرِ عٍ عَ رَشْنْمَ نَ يِرٍ مَشَرٍ مَ؟

⁴¹عٍ نُ لُمَ عَلَ مَتٌ رَ، عٍ نُ تِ عِسِرَيِلَ شَ سّنِيّنتْي كَنكٍ.

⁴²عٍ مُ عٍ رَتُ عَ سّنبّ مَ. عٍ نّيمُ عَ مَ عَ عٍ رَكِسِ عٍ فٍرٍقَيٍ مَ تّمُي نَشّ.

⁴³عٍ نّيمُ عَ شَ تْنشُمَيٍ مَ عَ نَشٍيٍ مَسٍن مِسِرَ بْشِ مَ. عٍ نّيمُ عَ شَ كَابَنَكٌي مَ عَ نَشٍيٍ رَبَ سٌوَن قِيلِ مَ.

⁴⁴عَ نَشَ عٍ شَ نِلِ شُرٍ نُن عَ سَلٌنيِيٍ قِندِ وُلِ رَ هَن عٍ مُ نْ نَ يٍ مِندٍ.

⁴⁵عَ نَشَ شّيرِيٍ رَدِن عٍ مَ عٍ هَلَكِقٍ رَ. عَ نَشَ لَنشَنسَرِ مَيٍ مَلَن مّننِ عٍ كَسَرَقٍ رَ.

⁴⁶عَ نَشَ تُفُمِيٍ رَدِن عٍ شَ شّيٍ مَ، كَتٌي نَشَ شّ بٌفِ دٌن فبِكِ.

⁴⁷عَ نَشَ عٍ شَ وّنِ سَنسِيٍ كَنَ بَلَبَلَنيِ رَ، عَ نَشَ عٍ شَ سِكٌمٌرٌ بِلِيٍ تُشُنسَن تُنّ شِنبٍلِ رَ.

⁴⁸بَلَبَلَنيِ نَشَ عٍ شَ شُرُ سٍيٍ قَشَ، فَلَنيِ نَشَ عٍ شَ فْورّيٍ سْنتْ.

⁴⁹عَ نَشَ عَ شَ شْنّ شْرْشْي رَ مِنِ عٍ مَ، عَ بْحّ نَشَ تٍ عٍ مَ، هَن عَ نَشَ مَلٍكّ كَسَرَتِيٍ رَفٌرٌ عٍ شِلِ مَ.

⁵⁰عَ نَشَ عَ شَ شْنّ قُلُن عٍ مَ، عَ مُ عٍ نِي رَتَنفَ قَشّ مَ، عَ قٍ شْرْشْييٍ رَدِن عٍ مَ.

⁵¹عَ نَشَ مِسِرَ دِ سِنفٍ بِرِن قَشَ، عٍ هَمِ بْنسْييٍ قٌنِكٍ بِرِن قَشَ.

⁵²نَ نَن عَ رَ عَ نَشَ عَ شَ حَمَ رَ مِنِ عَلْ يّشّي فْورّ، عَ نَشَ عٍ رَحّرّ عَلْ شُرُ سٍيٍ فبٍنفبٍرٍنيِ مَ.

⁵³عَ نَشَ عٍ شَنِن بْحّسَ كُي فَاشُي يٌ مُ عٍ سْتْ، كْنْ عَ نَشَ عٍ يَشُييٍ مَدُلَ بَا مَ.

⁵⁴نَ كِ، عَ نَشَ عٍ شَنِن عَ شَ بْشِ سّنِيّنشِ مَ، عَ شَ فٍيَ عَ نَشَن سْتْ عَ سّنبّ رَ.

⁵⁵عَ نَشَ بْنسْييٍ كٍرِ عٍ يَ رَ، عَ قَ نَ بْشِيٍ عِتَشُن عِسِرَيِلَ بْنسْييٍ مَ كّ رَ، عَ مّننِ قِندِ عٍ سَبَتِدٍ رَ.

⁵⁶كْنْ عٍ مَن نَشَ فٍرٍفِرِ عَلَ شِلِ شُنفبٍ كَنيِ مَ، عٍ تٌندِ عَ شَ يَامَرِيٍ رَبَتُدٍ.

⁵⁷عٍ نَشَ عٍ مَكُيَ عَلَ رَ، عٍ قِندِ يَنقَنتٍ رَ عَلْ عٍ بٍنبَيٍ عَ رَبَشِ كِ نَشّ، عٍ لُ عَلْ شَلِ كَنَشِ.