Gesami Hea:su 78:4-57

⁴Ninia da ninia mano amo ilia mae nabima:ne ilima hame wamolegei dialumu. Ninia da fa:no fifi mabe ilima Hina Gode Ea gasa bagade hou, amola liligi noga:idafa ninima hamoi amo olelemu.

⁵E da Isala:ili dunu fima sema iasi, amola hamoma:ne sia:i amo Ya:igobe egaga fifi manebe ilima iasi. E da ninia aowalali amo ilima, Ea malasu amo ilia mano ilima olelema:ne olelelesi.

⁶Amalalu, eno fa:no fifi manebe ilia da amo dawa:ma:ne amola ilia da bu alofele ili baligia fifi manebe mano ilia dawa:ma:ne lelema:ne sia:i.

⁷Agoane hamobeba:le, ilia da Godema bu bagadewane dawa:mu amola Ea hahamoi hou amo hamedafa gogolemu, be eso huluane Ea hamoma:ne sia:i amo fa:no bobogelalumu.

⁸Ilia da ilia aowalali amo ili agoai hame ba:mu. Ilia da lelesu amola hame nabasu hou hamosu dunu galu. Ilia da Godema mae yolele, dafawaneyale dawa:su hou da gasa hame galu.

⁹Ifala:ime dunu da dadi amola oulali gaguiwane asili, be gegesu eso da doaga:beba:le ilia da hobeale afia:i.

¹⁰Ilia da Godema Gousa:su sema hamoi, amo hame dawa:i dialu. Ilia da Ea hamoma:ne sia:i amoma fa:no bobogemu higa:i galu.

¹¹Ilia da Ea hahamoi liligi amo gogolei amola musa: hame ba:su hou ilima hamosu ilia ba:su, amo gogolesu.

¹²Ilia aowalali da sosodolaloba, Gode da musa: hame ba:su hou amo Soua:ne, umi soge amo da Idibidi soge ganodini dialu, amogai hamoi.

¹³E da hano wayabo amo dogoa damunisili, ili amodili oule asi. E da hano amo dobea fei agoane dialowane hamoi.

¹⁴Esomogoa, E da mumobi amoga ili oule ahoasu. Amola gasia E da lalu amoga ili oule ahoasu.

¹⁵E da hafoga:i soge ganodini igi goudagala:le amoga hano sa:i amola amoga ilia moma:ne hano i.

¹⁶E da si hano magufu damanadi misa:ne hamobeba:le, hano da bagade sa:ili, hano bagade hamoi.

¹⁷Be ilia da mae yolele Gode Ea ba:ma:ne wadela:i hou gebewane hamonanu, amola hafoga:i soge ganodini ilia da Gode Baligili Bagadedafa Ema lelesu hou hamosu.

¹⁸Ilia da Godema adoba:musa:, ha:i manu ilia hanaidafa amo ilima ima:ne gebewane adole boba:su.

¹⁹Ilia da Godema gadele amola agoane sia:i. “Gode da hafoga:i soge ganodini ha:i manu ninima sagoma:bela:?

²⁰Amo da dafawane, E da igi damana fabeba:le hano da musa:le sa:i. Be E da ninima agi ima:bela:? Amola Ea fi dunuma hu moma:ne ima:bela:?”

²¹Amaiba:le, Gode da ilia amane sia:dabe amo nababeba:le, E da ougi galu. E da Ea fi dunu ilima lalu amoga doagala:i, amola Gode Ea ilima ougi hou bagadewane heda:lalu.

²²Bai ili da Ema dafawaneyale hame dawa:i, amola E da ili gaga:mu amo ili dafawaneyale hame dawa:i.

²³Be E muagado ea logo ga:su doasisima:ne sia:i.

²⁴E da ilia moma:ne, ‘ma:na’ amo Hebenega gadonini salisisi.

²⁵Amaiba:le, ilia da a:igele dunu ilia ha:i manu amo mai dagoi, amola Gode da ilia hanai amo defele i.

²⁶E da gusudili mabe fo amo misa:ne hamosu, amola Ea gasa amoga ga (south) amodili mabe fo amoma fane susugai.

²⁷Amola E da Ea fi dunu ilima sio osea:idafa amo da hano bega: sa:i boso su amo idi defele ilima iasi.

²⁸Amo sio da ilia logoa helefisu diasu gaguli gagai, amo dogoa amogai amola abula diasu gaguli gagai amo beba:le huluane dafia:i.

²⁹Amalalu, dunu huluane ilia da amo maiba:le bagade sadigia:i ba:i. Gode da ilia hanai amo defele ilima i.

³⁰Be ilia edegenanusu da hamedafa yolei, amola ilia da mae yolele gebewane nana ahoana,

³¹Gode da ilima ougiba:le, E da ilia gasa bagade dunu amola Isala:ili ganodini ayeligi dunu noga:idafa, amo fane lelegei.

³²Gode da ilima gasa bagade hame ba:su hou hamosu, be ilia da amo mae dawa:le, gebewane wadela:i hou hamonanusu amola ilia da Ema dafawaneyale hame dawa:su.

³³Amaiba:le, E da ilia esalusu eso amo mifo heda:be defele hedolowane dagolesi, amola ilia esalusu da hedolodafa gugunufinisi ba:i.

³⁴E da dunu oda fane lelegeloba, dunu mogili hame bogogia:i esalebe ilia da Ema sinidigisu. Ilia da ilia wadela:i hou hamoi huluane sisane, dafawane Ema fofada:ne iasu.

³⁵Ilia da dawa:loba, Gode da ili gaga:sudafa esala, amola Hina Bagadedafa da hidadea ili fidila misi.

³⁶Be ilia sia: huluane da ogogosu sia: fawane sia:su. Ilia sia: da udigili sia: fawane sia:su.

³⁷Ilia da Ema hame fuligala:su. Ilia da Gode Ea Gousa:su ilima hamoi amoma mae fa:no bobogele, yolesi dagoi.

³⁸Be Gode da Ea fi dunuma asigi galu. E da ilia wadela:i hou hamoi gogolema:ne olofosu, amola ili wadela:le hamoiba:le hame gugunufinisisu. Eso bagohame, E da Ea ougi hou amo Hi gagulaligisu amola Ea ougi hou bagade amo Hi guminisisu.

³⁹E da dawa:loba, ilia da osobo bagade dunu fawane. Ilia da fo agoane misini bu asi hame ba:sa, amo agoai defele ba:su.

⁴⁰Ilia eso bagohamedafa, hafoga:i soge ganodini Ema lelesu hou hamosu. Amola eso bagohamedafa ilia da Ema da:i diosu ianusu.

⁴¹Ilia da enoenoia Godema adoba:su hou hamonanu, amola Isala:ili fi dunu ilia Hadigi Gode Ema se nabasu iasu.

⁴²Ilia da Ea gasa bagade hou amo gogolei, amola ilima ha lai dunu ilia, ili wadela:lesisa:besa:le Ea gaga:i hou amo gogolei.

⁴³Amola Ea gasa bagade hou hamosu amola musa: hame ba:su hou amo da Soua:ne umi soge amo da Idibidi soge ganodini, hahamoi, amo gogolei.

⁴⁴E da hano huluane afadenene maga:me agoane hamoiba:le, Idibidi dunu ilia da hano manu hamedei ba:i.

⁴⁵Gode da Idibidi dunuma se nabasu ba:ma:ne, amola ilia soge wadela:lesima:ne, gagoba: amola guama iasi.

⁴⁶Gode da ilia ha:i manu bugi wadela:lesima:ne, danuba: iasi.

⁴⁷Gode da ilia waini bugi amo fane salima:ne, mu gene iasi. Amola ilia figi ifa bugi amo anegagi ofo amoga dubu fili wadela:gia:ma:ne hamoi.

⁴⁸Gode da ilia bulamagau fofoi amo mu gene sa:ili fane bogogia:ma:ne, mu gene iasi amola ilia ohe fofoi amo ha:ha:naga fane lelegema:ne hamoi.

⁴⁹Gode da Ea gasa bagade hou amo Isala:ili dunu ilia noga:le dawa:digima:ne, ilima, Ea ougi hou amo iasi. Amo da sia: adola ahoasu dunu agoane bogosu ilima oule misi.

⁵⁰E da Ea ougi hou amo hame gumi, amola ilia esalusu amo hame gaga:i. Be E da ili medole legemusa:, olo bagade ilima iasi.

⁵¹E da Idibidi dunu ilia sosogo fi amoga magobo dunu mano huluane fane lelegei.

⁵²Amalu Gode da Ea fi dunu amo sibi ouligisu dunu ilia sibi ouligibi defele Isala:ili dunu amo gadili oule asili, hafoga:i soge ganodini ili noga:le fidisu.

⁵³Gode da ili noga:le oule asi amola ilia da hame beda:gia:i. Be hano wayabo da ilima ha lai dunu amo gadulisiba:le, ilia da bogogia:i.

⁵⁴Gode da Isala:ili dunu amo Ea hadigi soge amoga oule misi. Amo goumia fi dunu Gode Hi Hisu hasalasilalu samogene lai, amo goumiga oule misi.

⁵⁵Isala:ili dunu da gusuba:i mogodigili ahoanoba, Gode da ilia ha lai dunu gadili sefasilalu. E da soge amo momogili, ilima sagolesi. Amola ilia ha lai dunu ilia diasu amo lale, Ea fi dunu ilima sagolesi.

⁵⁶Be Ea fi dunu da Gode Bagadedafa amoma odoga:i. Amola Ema adoba:su hou hamoi. Ilia da Ea hamoma:ne sia:i, amo hame nabasu.

⁵⁷Ilia da ilia aowalalia hou defele, lelesu bagade hamoi amola Godemagale hame fuligala:i. Ilia da gugaloi dadi defele, moloi hame ba:i.