SALMOS 60:3-12

³Beno' ga neto', benách chio' ka', wžé' zedlto'. Beno' ga gok cheto' ka we'jto' to da' benen ga bejchégwto'.

⁴Benn chegak benne' ka' ẕžébegake' Le' to da' gak bian', dan' wḻoé'e ḻawn da' nak dot da' li.

⁵Bze nag chia'. Beslá ḻégake' ḻen yeḻa' wak chio', nich lagak benne' ka' nži'ikzlo' Le'.

⁶Ḻo latje la'y chie' wnná Dios: “Yebekzla' neda'. Chisa' chele yežlyó chegak benne' Sikem ka'. Wžix̱a' chele yežlyó dan' žen' kwit yegw Sukot.

⁷Yežlyó Galaad naken chia', na' ḻezka' yežlyó chegak ẕa'só Manasés ka'. Yežlyó chegak ẕa'só Efraín ka' naken ka to x̱ḻapa' da' žape chi'in yichja'. Yežlyó chegak ẕa'só Judá ka' naken gan ẕnna bi'a,

⁸san yežlyó chegak benne' Moab ka' naken ka to ẕiga' ya da' yožen nis wná'a. Ḻo yežlyó chegak benne' Edom ka' cho'na' ẕela' gole ka'. Si'a ba nez yežlyó chegak benne' Filistea ka'.”

⁹¿Noẕkze wchi'e neda' nich tíḻ-ḻena' yež zoa to ze'e sibe dan' žape chi'in yežen'? ¿Noẕkze wchi'e neda' nich tíḻ-ḻena' benne' Edom ka'?

¹⁰¿Kege Le' wchi'o neda', Dios? Le' wléj yichjo' neto', na' bi wyéjḻeno' benne' cheto' ka' ḻo wdiḻe.

¹¹Gokḻen neto' nich gak tíḻ-ḻento' benne' ka' ẕdíḻ-ḻengake' neto', dan' gak dáche'ze gákḻengak benne' ka' neto'.

¹²To ẕen ḻen Dios gonžo to da' ẕenḻe'e, na' Ḻe' wlage' benne' ka' ẕdíḻ-ḻengake' žo'o.