SALAMO 60:3-12

³Oi ese oiemu bese taudia oi hisihisi henidia bada vadaeni. Ai ese uaina momo ai inua vadaeni bamona, ai raka kerere noho.

⁴Oi ese oi dekenai idia gari taudia dekenai, heau mauri gabuna do oi henia, idia ese unuseni do idia heau lao, peva ena diba idia dika momokani neganai.

⁵Oiemu goada dekena amo ai do oi hamauria. Aiemai noinoi mani do oi kamonai, vadaeni ai, oi lalokau henia taudia, be oi ese do oi hamauria.

⁶Iena gabu helagana dekena amo Dirava ia hereva, ia gwau, “Mai kwalimu danu lau ese Sekema tano do lau hapararaia, bona Sukoto Koura, be egu bese dekenai do lau haria.

⁷Gileada be egu tano, Manase danu be lauegu. Eparaima be egu tuari kwara gauna, bona Iuda be egu dagi toana auna.

⁸To lau ese Moaba do lau abia, egu aena huria disi bamona, bona Edoma ena latanai egu tamaka do lau negea lao, lau ese lau biagua ena toana. Pilistia tano danu do lau abia, mai kwalimu ena boiboi danu.”

⁹To Dirava e, daika ese hanua mai maguna danu dekenai be lau do ia hakaua vareai? Daika ese Edoma dekenai lau do ia hakaua lao?

¹⁰Dirava e, oi ese ai oi negea momokani vadaeni, a? Dirava e, aiemai tuari taudia danu, idia durua totona do oi raka mai lou lasi, a?

¹¹Dirava e, ai do oi durua, ai idia tuari henia taudia be ai ese do ai halusia totona, badina be taunimanima edia durua be anina lasi.

¹²Bema Dirava be iseda kahana dekenai ia noho neganai, ita be do ita kwalimu. Dirava ese ita dekenai idia tuari henia taudia do ia halusia.