SALMOS 41:1-6

¹Paqui nopa masehuali cati motequipachohua pampa quinicnelía cati teicneltzitzi, pampa TOTECO quipalehuis quema hualas taohuijcayot.

²TOTECO quimocuitahuis para amo aqui quimictis. Huan TOTECO quitiochihuas miyacapa ipan tali Israel. Yaya amo quicajtehuas, yon amo quicahuas inimaco icualancaitacahua para ma quichihuilica cati inijuanti quinequise.

³Quema huetztos ipan taijyohuilisti, TOTECO quitananas ipan itapech huan quiijcuenilis nopa cocolisti.

⁴Na niquilhui TOTECO: “TOTECO, na nitajtacolchijtoc ica ta. Techtasojta huan techchicahua.”

⁵Nocualancaitacahua quinequij ma nechajsi cati fiero. Camanaltij fiero ten na huan quinequij ma nimiqui huan ayecmo aqui nechelnamiquis.

⁶Quema nechpaxalohuaj, mochihuaj quej nohuampoyohua, pero amo melahuac ten quiijtohuaj. Quema itztoque nohuaya san quitacaquilíaj taya onca para huelis quipatase ica cati más fiero, huan teipa quisase huan teyolmelajtinemise ten na.