SALMOS 119:170-175

¹⁷⁰Xijtacaquili cati nimitztajtanía quema nimotatajtía, huan techmanahui quej tiquijtojtoc techchihuilis.

¹⁷¹Na nimitzpaquilismacas, pampa ta technextilijtoc quenicatza nijchihuas nochi cati techyolmelajtoc ma tijchihuaca.

¹⁷²Nitepohuilis nochi cati tiquijtojtoc, pampa nochi motanahuatilhua senquisa xitahuac.

¹⁷³Ximocualtali para techmanahuis, pampa na nijtapejpenijtoc nijchihuas cati quiijtohuaj motanahuatilhua.

¹⁷⁴TOTECO, nijnequi techmaquixtiqui, pampa na san nimopaquilismaca ica moley.

¹⁷⁵Techcahuili ma noja niitzto para nimitzhueyimatis. Xijcahuili para motamachtil ma nechpalehui.