Salmo 142:2-7

²Isnan sangoanam et ibagak amin ay danag ko ya problimak.

³Ammom di kosto ay amagek mo komapsot di namnamak. Nan-isagana dan kalaban ko sin pandanak si tagdey ay maknaak.

⁴Anapek mo waday olay esa ay kabadang ko, ngem maga baw, tan adi dan pagan-ano. Maga di mabalin ay pankamangak, tan magay lawa na en daida mo mateyak.

⁵Apo, kedawek din badang mo, sik-a din salaknib ko, sik-a anggoy di masapol ko isnan biyag ko.

⁶Dengngem kod nan kararag ko, tan nay kinmapsot nan nemnem ko. Isnan kalaban ko omisalakan ka, tan nay adiak kabaelan di pigsa da.

⁷Isnan naibalodak omisalakan ka koma ta sin sangoanan di ipogaw mo idaydayaw kos sik-a, din kinasiged mon sak-en di gapo na.