Salmo 141:2-7

²Awatem koma nan kararag ko ay kaman manseng-ew ay insinso ya kaman daton sin labi din itatag-ay ko ay takkay ko.

³Bomadang ka kod, Apo, ta annadak din tepek ko.

⁴Bomadang ka koma ta adiak masolisog ay mangamag si lawa ono makikadwa sin am-amagen di laway nemnem da ya adiak makikan sin fiesta da.

⁵Mabalin ay domosa ya bomagbaga din nalinteg gapo sin seg-ang da. Ngem adiak polos awaten din panangidayaw di makedse ay ipogaw, tan kanayon ay ikararag ko di maikontra sin lawa ay am-amagen da.

⁶Bigbigen to din kaipoipogaw ay tet-ewa din enak inbaga mo maitep-a sin deppas din tuturay da.

⁷Maiwalang din tong-a da sin labaw di kaot da, namekmek ay bato di kaiarigan da.