SALMO 139:15-24

¹⁵Mamaynipa wiksanpi kuerpuyni wiñaptin mana ni pi kawawaptinpish kanmi kawawashkanki.

¹⁶Kuerpuyni wiñaykaptin kawawashkanki. Libruykipi tukuy chaykunata killkashkanki. Manara kawsaptinira yachashkanki mashna diyakunatami kawsasha nishpa.

¹⁷A, Tata Dios, favorninipa allimata yuyaykanki. Yuyanaykikunaka sukaman mana yupaypa layami.

¹⁸Rurashkaykita yupanayashpayni playatashina mana atipanichu yupayta. Puñushkaynimanta atarishpayni kanllawan kani.

¹⁹A, Tata Dios, tukuy sakra mana alli rurak runakunata kastigaysapa. Chay wañuchiwanayak runakunata ñukamanta anchuchiysapa.

²⁰Washanchashuk runakunata yankamanta chiknishuk runakunata kastigaysapa.

²¹A, Tata Dios, chiknishuk runakunata chiknini. Mana kasushunayak runakunata mana nimatashina kawanisapa.

²²Tukuy shunku paykunata chikninisapa. Chay chiknishuk runakunata yuyani chikniwak runakuna kanankunata.

²³A, Tata Dios, allita kawaway yachanaykipa allitachu manachu kuyayki nishpa. Riksiway allitachu manachu yuyaykuni nishpa.

²⁴Kawaway ichará mana allikunata ruraykani nishpa. Chashna mana allita ruraptini yanapaway allita rurashpa alli ñannikita katinaynipa.