Buk Song 139:15-24

¹⁵Taim mi kamap isi isi long ples hait insait long bel bilong mama, yu bin lukim olgeta bun bilong mi i kamap na i pas wantaim.

¹⁶Yu lukim mi taim mama i no karim mi yet. Mi no kamap yet long graun, tasol yu raitim pinis long buk bilong yu olgeta de yu laik bai mi mas i stap long graun.

¹⁷God, i hat tumas long mi save long olgeta tingting bilong yu. Tingting bilong yu i no liklik, na i no gat rot long mi ken save long en.

¹⁸Sapos mi kaunim ol samting yu save tingting long en, bai namba bilong ol i winim namba bilong olgeta wesan long nambis. Taim mi kirap long slip mi stap yet wantaim yu.

¹⁹God, mi laik bai yu kilim i dai ol man nogut. Na mi laik bai ol man bilong pait i mas lusim mi.

²⁰Ol dispela man i save tok nogut long yu. Na ol i save mekim ol kain kain tok nogut long nem bilong yu.

²¹Bikpela, mi no laikim tru ol man i no laikim yu. Na mi bel nogut tru long ol man i save bikhet long yu.

²²Tru tumas, mi no laikim tru ol dispela man. Mi lukim ol i olsem ol birua bilong mi yet.

²³God, skelim mi gut na bai yu save long olgeta tingting i stap long bel bilong mi. Traim mi, na bai yu save gut long olgeta tingting bilong mi.

²⁴Skelim mi gut, nogut sampela tok giaman i stap long tingting bilong mi. Na yu mas bringim mi long rot bilong kisim laip bilong i stap gut oltaim oltaim.