SAAMUNƆ 72:1-16

¹Sulemanu lɛ̀. Luda, ǹ dada kínanɛ à yãkpaɛ kɛ kↄ̃n yãpuraao, ǹ tó kínɛ yã maaa kɛ lán nɛɛ̀ kɛ nà,

²lɛ à dↄ n gbɛ̃nↄnɛ aɛ a zɛ́a, à yã gↄ̃gↄ̃ talakanↄnɛ súusu,

³kpiiinↄ é gbasa wà mↄ́ gbɛ̃nↄnɛ kↄ̃n aafiao, sĩ̀sĩnↄ é tó aↄ̃gↄ̃ kú nnamana guu.

⁴Kína é tó yã bↄ kↄ̃n talakanↄo nna, eé takaaside nɛ́nↄ mì sí, eé gbãamↄnnɛrinↄ dúgu zↄ̃.

⁵Eégↄ̃ kuu lán ↄfãntɛ̃ ègↄ̃ kuu nà, lán mↄvura ègↄ̃ kuu nà wɛ̃̀ kↄ̃n wɛ̃̀o.

⁶Eégↄ̃ dɛ lán loumana buraa bà, lán mↄdↄ kɛ̀ è kpá tↄↄtɛa bà.

⁷Gbɛ̃ maaanↄ é ↄ tá a gurↄↄa, nnamana égↄ̃ bíta ai mↄↄ tóngↄ̃ kuu dↄro.

⁸Eé kí ble zaa ísia baa kɛ̀ kpa kↄ̃n baa kãa kpaao, sɛna zaa Yuflatia ai gana anduna lɛ́a.

⁹Borii kɛ̀ aↄ̃ↄ kú gbáa guunↄ é mↄ́ wà kúɛnɛ, à ibɛɛnↄ é daɛ ń puua à aɛ.

¹⁰Taasisi kína kↄ̃n ísia baa kínanↄ é tángba kpáa, Seba kↄ̃n Sɛba kínanↄ é mↄ́ wà gba danɛ.

¹¹Kínanↄ é mↄ́ wà kúɛ à aɛ ń píngi, bori píngi é zↄ̀ blenɛ.

¹²Zaakɛ eé wɛ̃ndadee kɛ̀ aↄ̃ wiii dↄↄnↄ bↄmɛ, eé takaasidee kɛ̀ aↄ̃ↄ dↄnlɛri vĩroonↄ mì sí.

¹³Eé gbãasaideenↄ wɛ̃nda gwa, eé takaasideenↄ bↄ gaa lɛ́zĩ.

¹⁴Eé ń bↄ gbãamↄnnɛrinↄ ↄzĩ kↄ̃n gbɛ̃ pãsĩnↄo, zaakɛ à ye ń arukwɛɛnaziro.

¹⁵Luda kína dↄ̃ kↄ̃n aafiao! Wàgↄ̃ à gbaa Seba bùsu vura, wàgↄ̃ adua kɛɛnɛ yãana sai, wàgↄ̃ sa maaa oonɛ gurↄ píngi.

¹⁶Ǹ tó burapↄnↄ kɛ à bùsun maamaa, à lánↄ gↄ̃ da sĩ̀sĩnↄ musu sí plɛ̀plɛ, aↄ̃ nɛ́ i wà pia lán Lɛbanↄ lákpɛ bà, aↄ̃ gbã lán kàbapu bà sɛ̃̀tɛ.