Kap 72:1-16

¹Solomon dakon kap kɨnda. Piŋkop, aŋpakgo kɨlegɨ uŋun kɨla amɨn madep do iyɨŋ dekbɨ gen kokwin kɨlegɨ asak.

²Aŋaki aŋpak kɨlegɨkon da mɨŋat amɨn kabɨyogo ae yoni mɨni amɨn gen kokwin tagɨsi aŋ yomjak.

³Kɨla amɨn madep aŋpak kɨlegɨ asak, uŋun do ɨleŋ madep ae monɨŋɨkon jap bamɨ tagɨsi pani.

⁴Aŋpulugaŋbɨ kɨla amɨn madep da bupmɨ amɨn paŋpulugaŋban tagɨsi egɨpni. Ae yo do wadak wadak aŋ amɨn dakon gwakni paŋpulugosak. Mani amɨn do yokwi aŋyomaŋ amɨn uŋun pabɨŋ yopjak.

⁵Kɨla amɨn madep aŋpulugaŋbɨ gɨldat ae kanek tonjil da arɨpmon egɨpjak.

⁶Kɨla amɨn madep aŋpulugaŋbɨ aŋpak tagɨsi baŋgɨn asak. Aŋaki sɨkak da maŋek jap paŋɨreŋ asak uŋun da tɨlak aŋpakni tagɨ da tagɨsi noman tosak.

⁷Mɨktɨmon egɨpjak bɨsapmon amɨn aŋpak kɨlegɨsi baŋgɨn ani. Kanek da taŋ aŋaŋ kɨsak bɨsapmon yo kɨnda do wadak wadak dɨma ani.

⁸Kɨla amɨn madep egek tap terɨ kɨnda da tap terɨ kɨnda mɨktɨm daman tosok, gat ae Pakbi Yupretis kon da mɨktɨm morap taŋ aŋaŋ kwaŋ uŋun gat kɨsi kɨla akdɨsak.

⁹Mɨktɨm kɨbɨrɨ tɨmon amɨn da gawagek pasal ɨmni. Ae uwalni da mɨktɨmonsi maŋ pagek pasal ɨmni.

¹⁰Spen mɨktɨm dakon kɨla amɨn madep gat ae tap binap mɨktɨm tɨm toŋ uŋun dakon kɨla amɨn madep kɨsi da gawat gawat aŋ ɨmɨŋek yo tomni madep baŋ ɨmni. Arebia mɨktɨm gat ae Seba mɨktɨm gat dakon kɨla amɨn madep da yaŋ gɨn akdaŋ.

¹¹Kɨla amɨn madep morap da ŋwakbeŋ aŋ ɨmɨŋakwa mɨŋat amɨn morapyo da oman aŋ ɨmdaŋ.

¹²Yoni mɨni amɨn da paŋpulugosak do yaŋ tɨdaŋba paŋpulugosak. Ae jɨgɨ paŋek paŋpulugogɨ mɨni amɨn paŋpulugosak.

¹³Ae amɨn tapmɨmɨ mɨni wadak wadak ekwaŋ uŋun do bupmɨ nandaŋek paŋpulugosak.

¹⁴Uŋuden amɨn do but dasi galak taŋ yomɨsak, do uwal da pabɨŋ yopmaŋek paŋupbal ani bɨsapmon uwal da kɨsiron baŋ pulugaŋ yopdɨsak.

¹⁵Kɨla amɨn madep uŋun bɨlak morapmɨ egɨpjak dosi nandɨsat. Arebia mɨktɨm amɨn da gol ɨmni. Gɨldat kɨnda kaloŋ Piŋkop da aŋpulugosak do mɨŋat amɨnyo da bɨsit aŋ ɨmni dosi nandɨsat.

¹⁶Lebanon mɨktɨmon wit tagɨsi kwoŋ, uŋudeŋ gɨn amɨn da pigaga yaŋ gɨn kwoni. Joŋ morap kwaŋ ɨreŋ toŋ uŋun da tɨlak kokup papmon amɨn yaŋ gɨn ɨreŋ toni.