Yontu 72:1-16

¹Sɑlʋmɔŋ kʋŋmɑŋmɑɑtʋ. Hɑɩ, Ɩsɔ, hɑ wulɑʋ kɛ nyɑ́ hʋʋlɛ, nɑ ń hɑ wulɑʋ pəyɑlʋ kɛ nyɑ́ tɑmpɑnɑ təŋʋɣʋ ləmɑɣɑsəlɛ.

²Ɩlɛnɑ ɩ́ təŋəɣɩ tɑmpɑnɑ nɑ kʋsiɣisim nɑ ɩ́ hʋʋkənɑ nyɑ́ yəlɑɑ kʋnyɔntʋnɑɑ.

³Pɔɔŋ nɑ pulɑsɩ ɩ́ kɔnɑ yəlɑɑ kɛ hɛɛsʋɣʋ nɑ tɑmpɑnɑ təŋʋɣʋ.

⁴Wulɑʋ ɩ́ hɑ tɑmpɑnɑ kɛ yəlɑɑ kʋnyɔntʋnɑɑ nɑ ɩ́ wɑɑsɩ wɑhɑlɑ nyə́mɑ, nɑ ɩ́ wɑkəlɩ pɑ ŋmɑkəllɑɑ.

⁵Ɩlɛ pɑɑ nyɑŋnɑ-ŋ, hɑlənɑ kʋyɑŋku ilim kɑ́ yele nyɑɣɑʋ nɑ ɩsɔtʋ nɑ́ɑ́ yele nɑʋ tɔ.

⁶Wulɑʋ ɩnɩ ɩ kɑ́ wɛɛ kɛ́ ɩsɩɩ tɛʋ ŋku kʋ nɩɩkʋɣʋ tɑɑlɛ nte tə nyɩɩtʋ pɑ hɑlɑɑ tɔ. Yɑɑ ɩsɩɩ tɛʋ sɔsɔɔʋ nɩɩkʋɣʋ hɑləm tɔ.

⁷Pɩɩ cɑɣɑnɑ siɣisilɑɑ kɛ kʋyɑkʋ ŋkʋ. Nɑ pɑ́ wɛɛ hɛɛsʋɣʋ sɔsɔɔŋkʋ tɑɑ, hɑlənɑ kʋyɑŋku ɩsɔtʋ kɑ sɩɩ tənɑɣɑ tɔ.

⁸Ɩ kɑ́ tɔɣɔ kɑwulɑɣɑ kɛ pə kpɑɣɑʋ teŋku nɑ pə́ sɩɩnɑ lɛlʋ tɔ, nɑ pə́ kpɑɣɑ pɔɣɔ sɔsɑɣɑ hɑlənɑ ɑntulinyɑ tənɑɣɑ tɔ.

⁹Ɩ kolontunɑɑ kɑ́ həntɩ-ɩ ɑtɛ nɑ ɩ pɑtɑnɑɑ mpɛ pɑ́ niisi mʋsʋɣʋ.

¹⁰Tɑɑsisi tɛtʋ nɑ tɛtʋ nti lʋm cɔɔnɑɑ tɔ pə ɑwulɑɑ kɑ fɛlɩ lɑmpuunɑɑ. Sepɑ nɑ Sɑpɑ pə nyə́mɑ nɑ́ɑ́ lɑpɩ-ɩ kʋcɔɔŋ.

¹¹Awulɑɑ tənɑ kɑ́ həntɩ-ɩ ɑtɛ, nɑ piitimnɑɑ tənɑ nɑ́ɑ́ lɑkɩ-ɩ təmlɛ.

¹²Ɩlɛnɑ ɩnɩ ɩ wɑɑsɩ kʋnyɔntʋ wei ɩ wiikinɑ-ɩ tɔ nɑ wɑhɑlɑ tɔɣɔlʋ wei ɩ fɛɩnɑ sənlʋ tɔ.

¹³Wulɑʋ kɑ́ wɛɛnɑ ɩcɑm nɑ kʋnyɔntɔɣɔlʋ nɑ mpɑ pɑ pɑsəɣɩ pɑ tɩ tɔ pɑ pətɔɔtəlɛ, nɑ ɩ́ yɑ́ pɑ weesiŋ.

¹⁴Wulɑʋ kɑ́ yɑ pɑ weesiŋ kɛ ŋmɑkəlʋɣʋ nɑ mʋsʋŋ niŋ tɑɑ. Mpi tɔ, pɑ kɛ́-ɩ pʋlʋ sɔsɔɔm kɛ́.

¹⁵Pɑɑ wɛɛnɑ weesuɣu nɑ pɑ́ hɑ-ɩ Sepɑ nyə́mɑ wʋlɑ. Pɑɑ sələməɣɩ Ɩsɔ kɛ́ ɩ tɔɔ kɛ́ tɑm kɛ́, nɑ pɑ́ kooliɣi-ɩ kʋpɑntʋ kɛ pɑɑ kʋyɑkʋ ŋku.

¹⁶Tɔɣɔnɑɣɑ hɑləm kɑ wɑɑsɩ tɛtʋ tɑɑ nɑ pə́ kpɛnnɑ pulɑsɩ nyɔɔŋ tɑɑ. Nɑ kɑ pee ciɣitiɣi ɩsɩɩ Lipɑŋ tɩɩŋ sɔsɔɔŋ, nɑ yəlɑɑ huki ɑcɑlɛɛ tɑɑ ɩsɩɩ nyɩɩtʋ kɛ tɑwɑ tɑɑ.