Text copied!
CopyCompare
Icamanal toteco; Santa Biblia - SALMOS - SALMOS 72

SALMOS 72:1-16

Help us?
Click on verse(s) to share them!
1NoTeco Dios, techmaca motamachtil huan techpalehui na cati nitanahuatijquet, para ma nitetajtolsencahua xitahuac quej ta titetajtolsencahua. Huan xijpalehui nocone para ma monejnemilti xitahuac teipa.
2Xijpalehui para quintajtolsencahuas xitahuac nochi momasehualhua, huan cati teicneltzitzi nojquiya.
3Xijchihua para nochi ipan ni tali ma paquica pampa nopa tanahuatijquet quichihua cati xitahuac, hasta eltoc quej nochi cuame cati onca ipan tepeme huan ipan tachiquilme nojquiya paquij huan temacaj cuali inintajca.
4Yaya quinmanahuis cati itztoque ipan tequipacholi huan cati amo teno quipiyaj. Nojquiya ma quintatzacuilti nopa masehualme cati tetaijyohuiltíaj.
5Huan cati teicneltzitzi huan amo teno quipiyaj mitzimacasise mitzixpanose nochi tonali quema noja eltos tonati huan metzti. ¡Quena, ma mitzhueyimatica para nochipa!
6Huan nochi altepeme ipan itanahuatilis nocone ma eli cuajcualtzi huan temachti, quej nopa at cati huetzi para ma chamanica cuame, o quej nopa ajhuechti cati quixolonía nopa tali.
7Huan nochi masehualme cati itztoque xitahuaque huan cuajcualme, ma itztoca ica cuajcualtzi quema yaya tanahuatis. Quema yaya tanahuatis, oncas miyac tasehuilisti hasta itamiya tonali.
8Itanahuatilis nocone ma ajsi hasta campa pehua huan hasta campa ontami nopa hueyi at. Ma ajsi ten campa nopa hueyi at Eufrates hasta campa ontantoc taltipacti.
9Nochi masehualme cati itztose ipan huactoc tali mohuijtzomase iixpa, huan icualancaitacahua motancuaquetzase iixpa hasta quipipitzose taltepocti.
10Nochi nopa tanahuatiani cati itztoque itejteno nopa hueyi at cati itoca Mediterráneo, huan nopa tanahuatiani ten tali Tarsis huan nopa tanahuatiani ten tali Sabá huan Seba quihualiquilise miyac nemacti.
11¡Quena, nochi tanahuatiani ten campa hueli talme quitamajmacase! ¡Huan nochi inijuanti motancuaquetzase iixpa huan quitequipanose!
12Yaya quinmanahuis nopa teicneltzitzi huan cati amo teno quipiyaj quema quitajtanise tapalehuili. Pampa inijuanti amo quipiyaj ajquiya quinpalehuis.
13Yaya quintasojtas cati amo quipiyaj chicahualisti huan cati teicneltzitzi, huan quinmanahuis.
14Quinmanahuis para amo quintaijyohuiltise huan para amo quintehuise. Pampa quiitas para ininemilis tahuel miyac ipati iixpa.
15Huan quema noja itztos nopa tanahuatijquet, quimacase miyac oro cati onca ipan tali Sabá. Huan imasehualhua quisenhuiquilijtose motatajtijtose ica Toteco huan mojmosta quitascamatise.
16Ma oncas miyac trigo ipan nochi nopa tali, huan hasta nopa cuame cati onca ipan tepeme ma temacase inintajca quej temacaj nopa cuame cati onca ipan tali Líbano. Huan ma onca miyac masehualme ipan altepeme, quej imiyaca nopa xihuime cati onca ipan cuatitamit.

Read SALMOS 72SALMOS 72
Compare SALMOS 72:1-16SALMOS 72:1-16