3Ma wii lɛ̀ ma kpasa, ma kòto nàɛ, ma wɛ́ɛ dↄ̀ ma Ludazi ai ma wɛ́ɛ kɛ̀ yↄ̀ↄↄ.
4Gbɛ̃ kɛ̀ aↄ̃ zàmagu pãanↄↄ pari dɛ ma mìkãnↄla. Ma ibɛɛnↄↄ lɛ́ vĩro, aↄ̃ↄ yezi wà ma dɛ pↄ́ke wíńnɛ sai. Pↄ́ kɛ̀ mɛ́ɛ à kpãi oroon aↄ̃ bè mà i mà kpáḿma.
5Luda, ń ma yↄ̃nkↄyãnↄ dↄ̃, ma taarinↄↄ utɛnannɛro.
6Dii Luda Zĩ̀kpɛde, gbɛ̃ kɛ̀ aↄ̃ wɛ́ɛ dↄnziinↄ ǹton tó wí ń kũ ma yãnziro. Isarailinↄ Luda, gbɛ̃ kɛ̀ aↄ̃è n kii wɛtɛnↄ ǹton tó aↄ̃ tↄ́ yaka ma yãnziro.
7Zaakɛ n yãnzin mɛ́ɛ mɛnaa kↄ̃n sↄ̃sↄ̃ozi, ben wí gɛ̃̀ ma wɛ́ɛn
8Ma gↄ̃ gbɛ̃ zĩ̀tↄ ũ ma gbɛ̃nↄ tɛ́, ma gↄ̃ gbɛ̃ miradodee ũ ma da bɛdeenↄ tɛ́.
9N ua yã ma kũ gbãa maamaa, gbɛ̃nↄ dↄkɛnanyo gↄ̃̀mɛ.
10Tó ma lɛ́ yì pↄsiaa guu, wègↄ̃ ma sↄ̃sↄ̃ↄ.
11Tó ma pↄsia utanↄ fĩ̀fĩma, wègↄ̃ ma faboomɛ.
12Gbɛ̃ kɛ̀ aↄ̃ↄ vɛ̃ɛna gãalɛnↄ è ma pe, ígbãamirinↄ è lɛ̀ damao.
13Mↄde tó à gↄ̃̀ ma yãnzi, Dii, ḿbe mɛ́gↄ̃ wɛ́ɛ kɛɛmma a gurↄↄa. Ǹ wemala Luda n gbɛ̃kɛ bíta yãnzi, ǹ ma mì sí yãpura.
14Ǹ ma bↄ foon, ǹton tó mà vlɛ̃ɛnlo. Ǹ ma bↄ í lↄ̀n, ǹ ma sí ma zangurinↄa.
15Ǹton tó ísↄ̃ ma blero, ǹton tó mà kpáɛ í lↄ̀nlo, ǹton tó wɛ̀ɛ tatamalɛro.
16Ǹ wemala Dii, zaakɛ n gbɛ̃kɛɛ maa, ǹ aɛ dↄma n sùu bíta guu.
17Ǹton mìkpɛɛ zu n zↄ̀blerinɛro, ǹ wemala kpakpaa, zaakɛ ma gↄ̃ kagurakɛna.
18Ǹ sↄ̃mazi ǹ ma mì sí, ǹ ma faaba kɛ ma ibɛɛnↄ yãnzi.
19Ń ma sↄ̃sↄ̃na dↄ̃ kↄ̃n ma wídammao kↄ̃n ma kpɛbↄnao, nɛ́ɛ gbɛ̃ kɛ̀ aↄ̃ↄ ma kũna yãonↄ ee.
20Sↄ̃sↄ̃na ma swɛ̃̀ zↄ̃̀, ma gↄ̃ gbãaa sai, gbɛ̃ kɛ̀ eé ma wɛ̃nda gwaan má wɛ̀tɛ, mɛ́ɛ ero, gbɛ̃ kɛ̀ eé ma nↄ̀sɛ kpáɛmɛɛn ma wɛ́ɛ dↄ̀zi, à kuuro.
21Aↄ̃ ɛ̃zɛ̃ zaaa kàmɛ pↄ́bleen, kɛ̀ ímii ma dɛ, aↄ̃ wɛ̃ kpã̀kpãa kpàma ma mi.
22Aↄ̃ zĩbaakɛna gↄ̃ńnɛ takutɛɛ ũ à ń kũ à yã lúńnɛ.
23Aↄ̃ wɛ́ɛ sisi lɛ aↄ̃ton guu ero, aↄ̃ wó gↄ̃ kokona.
24Ǹ n pɛ̃tɛ̃ pitaḿma, ǹ n pↄfɛ̃ pãsĩ pisiḿma.
25Aↄ̃ bɛɛ gↄ̃ bɛzĩ ũmɛ, aↄ̃ gbɛ̃ke tóngↄ̃ kuu lɛ à vɛ̃ɛ ń kpɛ́n dↄro.
26Zaakɛ aↄ̃è wɛ́ɛ tã gbɛ̃ kɛ̀ n ń lɛ́nↄa, aↄ̃è gbɛ̃ kɛ̀ n ń kari kɛ̀nↄ wãwã yã o.
27Ǹ ń yã píngi taari dińnɛ, aↄ̃ baka tóngↄ̃ kú n mìsina guuro.
28Ǹ ń tↄ́ gogo wɛ̃̀ndi takada guu, lɛ aↄ̃ tↄ́ tóngↄ̃ kú kↄ̃n gbɛ̃ maaanↄ tↄ́oro.
29Luda, má kú wãwãa guu kↄ̃n yã'ↄ̃ammao, ǹ ma sɛ́ lezĩ lɛ mà bↄ aafia.
SAAMUNƆ 69
SAAMUNƆ 69:3-29