Tingtoeng 69:3-29

³Ka pang te khaw ka kohnue coeng. Ka olrhong khaw koh coeng. Ka Pathen te ka lamtawn ah ka mik kha coeng.

⁴Lunglilungla la ka lunguet rhoek loh ka lu dongkah sam lakah yet. A honghi mai neh kai aka biit ka thunkha rhoek loh yet uh. Ka huen pawt te ka sah.

⁵Ka anglat te Pathen namah loh na ming tih ka dumlai he nang taeng lamloh a thuh uh moenih.

⁶Ka Boeipa caempuei Yahovah, nang aka lamtawn rhoek te kai kong ah yahpok uh boel saeh. Israel Pathen nang aka tlap rhoek te kai kong ah a hmaithae uh boel saeh.

⁷Nang ham te kokhahnah ka phueih tih ka maelhmai he mingthae loh a dah.

⁸Ka pacaboeina rhoek taengah ka hlanglak tih ka manu ca rhoek taengah ka kholong.

⁹Na im thatlainah dongah kai n'yoop tih nang aka veet rhoek kah kokhahnah khaw kai soah tla.

¹⁰Te dongah ka hinglu kah yaehnah neh ka rhap dae kai taengah kokhahnah la pawk.

¹¹Ka tlamhni pueinak ka bai vaengah amih ham thuidoeknah la ka om.

¹²Vongka kah aka ngol rhoek loh kai taengah lolmang a taeng uh tih yu o rhoek kah rhotoeng la ka om khoeng.

¹³Tedae Pathen kah kolonah tue vaengah, kai loh BOEIPA nang taengah ka thangthuinah te, na sitlohnah cangpai dongah namah kah khangnah oltak neh kai nan doo.

¹⁴Tangnong khui lamkah kai n'huul lamtah m'buek sak boeh. Ka lunguet neh tui dung lamkah n'huul lah.

¹⁵Tuili tui loh kai n'yo boel saeh lamtah a laedil la kai n'yoop boel saeh. Tangrhom loh kai a ka n'khuep thil boel saeh.

¹⁶Na sitlohnah a then dongah kai n'doo lah BOEIPA. Na haidamnah cungkuem neh kai taengla ha mael lah.

¹⁷Te dongah na maelhmai te na sal taeng lamkah thuh boel mai. Ka taengah n'daengdaeh dongah a loe la kai n'doo dae.

¹⁸Ka hinglu taengla ha yoei lamtah n'tlan dae. Ka thunkha rhoek kongah kai n'lat dae.

¹⁹Namah loh kai kah kokhahnah, yahpohnah, ka mingthae neh na hmaikah kai aka daengdaeh boeih khaw na ming.

²⁰Kokhahnah dongah ka lungbuei rhek tih ka mangoeng sut. Te dongah aka suem ham ka lamtawn dae om pawt tih, aka hloep ham khaw ka hmu pawh.

²¹Ka buh dongah anrhat han hlum uh tih ka tuihalh vaengkah ham a thuui n'tul uh.

²²Amih kah caboei te amih mikhmuh ah pael la, rhoepnah te hlaeh la om pah saeh.

²³Amih kah mik te a tueng khui lamkah hmuep saeh lamtah a cinghen khaw khun yoeyah saeh.

²⁴Amih te na kosi lun thil lamtah na thintoek thinsa loh amih te doom saeh.

²⁵Amih kah lumim te kho pong la om saeh lamtah a dap ah khosa hlang om boel saeh.

²⁶Na ngawn te a hloem uh tih na rhok kah nganboh te a tae uh.

²⁷Thaesainah te amamih kah thaesainah neh a koei dongah nang kah duengnah te bawn uh boel saeh.

²⁸Hingnah cabu khui lamkah phae lamtah hlang dueng rhoek neh hmaih daek boeh.

²⁹Tedae kai mangdaeng thakkhoeih he, Pathen namah kah khangnah neh n'hoeptlang lah.