Ola Saam 69:3-29

³Mi nokap na brom jinginatbat langa yu blanga album mi, en main throut im nogud du. Mi ardim ai brom lukaranbat blanga yu blanga album mi.

⁴Detlot pipul hu nomo laigimbat mi fo najing, olabat jidan detmatj na, mowa den ol main heya langa main hed. Main enami olabat oldei dalimbat laiya stori blanga mi. Olabat strongbala en dei wandi kilim mi ded. Deibin meigim mi gibit ola ebrijing langa olabat weya ai nomo bin stilim.

⁵God, ai kaan haidim ol main nogudbalawei brom yu. Yu sabi wen mi jidan nogudbala.

⁶Yu na YAWEI, det Brabli Boswan God. Nomo larram mi meigim sheim langa ol detlot hu trastim yu. God blanga Isreil, nomo larram mi meigim sheim langa detlot hu weship yu.

⁷Blanga yu na najalot pipul bin meigim fan langa mi, en mi jidan garram sheim brabliwei na.

⁸Mi wulijim streinja langa main femilimob. Langa main femilimob mi jis laik brom najawan kantri.

⁹Mi laigim det Serramoni Pleis blanga yu brabliwei. Main filing insaid im barn wulijim faiya. Wen pipul tok nogudwan wed langa yu, im meigim mi nogud du.

¹⁰Wen ai nomo dagat daga blanga meigim miselp lobala, pipul tokabat nogudwei langa mi.

¹¹Wen mi werrimon sekbeigwan klos blanga jidan soribalawei, olabat laf langa mi.

¹²Olabat tokabat mi ebriweya langa roud, en drangginwan pipul meigimap song blanga mi.

¹³Bat mi, ai garra prei langa yu, YAWEI. God, langa yu ron taim yu ensim mi. Yu ensim mi, dumaji yu garram bigwan filing blanga laigim pipul brabliwei, en dumaji yu oldei kipum blanga yu pramis blanga seibumbat pipul.

¹⁴Seibum mi God. Pulumat mi brom det mad. Nomo larram mi sinkdan. Kipum mi seif brom main enami olabat. Seibum mi brom det dipwan woda.

¹⁵Nomo larram fladwoda gaburrumap mi, en nomo larram mi draun, en nomo larram mi godan langa greib.

¹⁶Ensim mi YAWEI, dumaji yu na brabli gudwan en yu kipgon laigimbat mi detmatj. Dumaji yu brabli kainbala, wal yu kaman langa mi.

¹⁷Nomo haidim miselp brom mi, yu wekinmen. Ai garram bigwan trabul. Yu ensim mi na.

¹⁸Kaman langa mi en seibum mi. Seibum mi brom main enami olabat.

¹⁹Yu sabi hau ai oldei abum adtaim, en hau mi jidan garram sheim, en nomo garram eni rispek. Yu gin luk ol main enami olabat.

²⁰Det nogudwan wed bin meigim mi nogudbinji en ai kaan dum enijing na. Aibin wandim pipul blanga sori langa mi, bat najing. Aibin wandim pipul blanga kaman langa mi blanga meigim mi gudbinji, bat najing.

²¹Wen aibin hanggri deibin gibit mi poisinwan bif. Wen aibin thesti deibin gibit mi biniga.

²²Meigim olabat seikridwan padi panishim olabat gin. En meigim olabat jidan nomo garram enijing.

²³Meigim olabat blainwan, en meigim olabat garrimap hebiwan loud olagijawan.

²⁴Gitwail en ranimap olabat raidap yu gajim olabat. Dumaji yu wail langa olabat, wal yu panishim olabat.

²⁵Meigim olabat kemp jidan emtiwan. Nomo larram enibodi jidan laibala langa olabat kemp.

²⁶Olabat mokimbat ol detlot pipul weya yubin panishim. Olabat tokabat blanga detlot pipul weya jidan garram detmatj pein dumaji yubin panishim.

²⁷Yu raidimdan ola nogud ting weya dei dumbat. Nomo larram olabat joinin garram detlot pipul weya yubin meigim jidan fri.

²⁸Rabumat olabat neim brom det speshalwan buk blanga laif. Nomo larram olabat neim jidan garram ola neim blanga yu pipul olabat.

²⁹Bat mi ardim en ai nomo sabi wanim ai garra dum. Yu lidimap mi God, en seibum mi.